ຂ່າວຫຼ້າສຸດ

ຂ້າພະຍາດປົວເອົາຄົນ

951 03 ມ.ສ. 2019 ນານາສາລະ

    ຖ້າ­ວ່າ​ໃຜ​ກໍ​ຕາມ​ທີ່​ໄດ້​ເຮັດ​ວຽກ​ຮັບ​ໃຊ້​ຊາດ ໂດຍ​ຜ່ານ​ການ​ເປັນ​ສະ­ມາ­ຊິກ​ພັກ ແລະ ພະ­ນັກ­ງານ​ຂອງ​ລັດ ຍ່ອມ​ຈະ​ເຂົ້າ­ໃຈ​ວ່າ ໃນ​ບາງ​ໜ່ວຍ​ງານ​ຂອງ​ລັດ​ທີ່​ມີ​ສະ­ມາ­ຊິກ​ພັກ​ຮັບ­ຜິດ­ຊອບ​ຢູ່​ນັ້ນ ຍ່ອມ​ເຂົ້າ­ໃຈ​ສະ­ພາບ​ບັນ­ຫາ (ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ) ເຊັ່ນ: ເຮົາ​ຕ້ອງ​ຍອມ­ຮັບ​ຄວາມ​ຈິງ​ວ່າ ຫຼາຍ​ຄັ້ງ ຫຼາຍ​ກໍ­ລະ­ນີ ກໍ​ແມ່ນ​ສະ­ມາ­ຊິກ​ພັກ​ນັ້ນ​ແຫຼະ​ພາ​ໝູ່​ເພ ເສື່ອມ​ທາດ​ຂາດ​ຄຸນ ໂດຍ​ຫຼົງ​ໃນ​ຜົນ​ປະ­ໂຫຍດ​ດ້ານ​ການ​ເງິນ ເຊິ່ງ​ຖ້າ​ໝູ່​ຊຸບ​ຊິບ​ນິນ­ທາ​ວ່າ​ໃຫ້ ກໍ​ຄຽດ​ຂົມ​ອົມ​ທຸກ.

    ບາງ​ໜ່ວຍ​ງານ​ລັດ ແລະ ໜ່ວຍ​ພັກ​ຮາກ​ຖານ-ໜ່ວຍ​ພັກ​ເອ­ກະ­ລາດ ໄດ້​ເກີດ​ມີ​ປາ­ກົດ­ການ​ຫຍໍ້­ທໍ້​ທາງ​ດ້ານ​ການ​ເງິນ ເຊິ່ງ​ມັນ​ຊີ້​ບອກ​ວ່າ ຜູ້​ທີ່​ລະ­ເມີດ​ລະ­ບຽບ​ດັ່ງ­ກ່າວ ກໍ​ແມ່ນ​ພະ­ນັກ­ງານ​ການ​ນຳ​ໃນ​ໜ່ວຍ​ງານ​ດັ່ງ­ກ່າວ ເຊິ່ງ​ປາ­ກົດ­ການ​ຫຍໍ້­ທໍ້​ດັ່ງ­ກ່າວ​ນັ້ນ ມັນ​ເຮັດ​ໃຫ້​ພວກ​ເຮົາ​ຕ້ອງ​ມີ​ສະ­ຕິ​ຕື່ນ​ໂຕ ເພາະ​ຝ່າຍ​ປໍ​ລະ​ປັກ​ກົງ­ກັນ­ຂ້າມ​ຍິ່ງ​ຈະ​ຫາ​ໂອ­ກາດ​ໂຈມ​ຕີ​ແບບ​ຫັນ­ປ່ຽນ​ໂດຍ​ສັນ­ຕິ ຫາກ​ເວົ້າ​ເຖິງ​ພະ­ຍາດ​ຮ້າຍ​ແຮງ​ທີ່​ຕິດ​ພັນ​ໃນ​ແນວ​ຄິດ​ຂອງ​ພະ­ນັກ­ງານ​ພັກ-ລັດ​ບາງ​ຄົນ​ຄົງ​ໜີ​ບໍ່​ມົ້ມ​ພະ­ຍາດ​ອາດ­ຍາ​ສິດ ແລະ ເຫັນ­ແກ່​ຜົນ​ປະ­ໂຫຍດ​ສ່ວນ​ຕົວ ຂໍ​ຍົກ​ຕົວ­ຢ່າງ​ບາງ​ໜ່ວຍ​ງານ​ຂອງ​ລັດ​ທີ່​ສະ­ມາ­ຊິກ​ພັກ​ຮັບ­ຜິດ­ຊອບ​ບາງ​ຄົນ ກໍ​ບໍ່​ສົນ­ໃຈ​ແກ້​ໄຂ ເຝິກ­ອົບ­ຮົມ​ມະ­ຫາ­ຊົນ​ກ້າວ­ໜ້າ​ທີ່​ອາດ​ຍັງ​ມີ​ຂໍ້​ຂາດ​ຕົກ​ບົກ​ຜ່ອງ ບໍ່​ເຄີຍ​ຄິດ​ຂ້າ​ພະ­ຍາດ​ປົວ​ເອົາ​ຄົນ ເຊິ່ງ​ບໍ່​ຕ່າງ​ຫຍັງ​ກັບ​ປູກ​ຕົ້ນ­ໄມ້ ບໍ່​ເຄີຍ​ໃສ່​ຝຸ່ນ ຫົດ​ນ້ຳ ສະ­ມາ­ຊິກ​ພັກ​ບາງ​ຄົນ​ອາດ​ຫຼົງ​ໂຕ​ເອງ​ວ່າ ຖ້າ​ໃຜ​ບໍ່​ເຮັດ​ຕາມ​ເຮົາ​ຖື​ວ່າ​ບໍ່​ເດີນ​ຕາມ​ແນວ­ທາງ​ນີ້​ຄື​ອັດ­ຕາ​ທິ​ປະ​ໄຕ ມັນ​ບໍ່​ແມ່ນ​ແນວ­ທາງ​ຂອງ​ພັກ​ດອກ !.

    ບາງ​ຄົນ​ອາດ​ບໍ່​ເປີດ​ເອ­ກະ­ສານ​ລະ­ບຽບ​ຂອງ​ພັກ​ທີ່​ດັດ­ແປງ​ແກ້​ໄຂ​ອ່ານ (ບົດ​ລາຍ​ງານ​ດັດ­ແປງ​ກົດ​ລະ­ບຽບ​ຂອງ​ພັກ​ຕໍ່​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ) ໜ້າ 115 ໄດ້​ຂຽນ​ໄວ້​ແຈ້ງ­ວ່າ: ພັກ​ປະ­ຊາ­ຊົນ ປະ­ຕິ­ວັດ​ລາວ ຢຶດ​ໝັ້ນ​ລັດ­ທິ​ມາກ-ເລ​ນິນ ແນວ​ຄິດ ໄກ­ສອນ ພົມ­ວິ­ຫານ ເປັນ​ພື້ນ­ຖານ​ແນວ​ຄິດ​ທິດ​ສະ​ດີ​ຂອງ​ພັກ ເສີມ​ຂະ­ຫຍາຍ​ລັກ­ສະ­ນະ​ນຳ​ໜ້າ ລັກ­ສະ­ນະ​ສຶກ​ສາ​ອົບ­ຮົມ ພັກ​ເຄົາ­ລົບ ແລະ ປະ­ຕິ­ບັດ​ລັດ​ຖະ​ທຳ​ມະ­ນູນ ແລະ ກົດ­ໝາຍ ສະ­ມາ­ຊິກ​ພັກ​ທຸກ​ສະ­ຫາຍ​ສະ­ເໝີ­ພາບ​ກັນ ບົນ​ພື້ນ­ຖານ​ກົດ​ລະ­ບຽບ​ຂອງ​ພັກ ແລະ ກົດ­ໝາຍ​ຂອງ​ລັດ.

    ດັ່ງ­ນັ້ນ ຖ້າ​ສະ­ມາ­ຊິກ​ພັກ​ບາງ​ຄົນ​ບໍ່​ເປີດ​ອ່ານ ຫຼື ບໍ່​ຖື​ສຳ­ຄັນ​ແນວ­ທາງ​ຂອງ​ພັກ ຊ້ຳ​ກັບ​ໄປ​ຫຼົງ​ເອົາ​ແນວ​ຄິດ​ໂຕ​ເອງ​ເປັນ​ຫຼັກ ເພື່ອ​ໃຫ້​ຄົນ​ອື່ນ​ປະ­ຕິ­ບັດ​ຕາມ​ໂຕ​ເອງ ກໍ​ສາ­ມາດ​ເວົ້າ​ໄດ້​ວ່າ ສະ­ມາ­ຊິກ​ພັກ​ຜູ້​ນັ້ນ​ຫຼົງ​ທາງ ບໍ່​ເຄີຍ​ຄິດ​ຈະ​ສຶກ​ສາ​ອົບ­ຮົມ​ມະ­ຫາ­ຊົນ ບໍ່​ຂ້າ​ພະ­ຍາດ​ປົວ​ເອົາ​ຄົນ ເພາະ​ໂຕ​ເອງ​ກໍ​ມີ​ພະ­ຍາດ​ໃຈ​ຄັບ­ແຄບ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ