ກຽມໃຈໃສ່ປີໃໝ່

284 05 ມ.ສ. 2019 ນານາສາລະ

    ເປັນ​ເລື່ອງ​ທຳ​ມະ​ດາ​ຂອງ​ຄົນ​ລາວ ທີ່​ຈະ​ເລືອກ​ເອົາ​ໄລ­ຍະ​ປີ​ໃໝ່​ພັກ­ຜ່ອນ-ທ່ຽວ​ຫຼິ້ນ ເພື່ອ​ຄວາມ​ເບີກ­ບານ​ມ່ວນ­ຊື່ນ ເຊິ່ງ​ລວມ​ກັບ​ການ​ກິນ​ດື່ມ​ໃຫ້​ໜຳ­ໃຈ ເພາະ​ປີ​ໜຶ່ງ​ມີ​ຄັ້ງ​ດຽວ ຢ່າງ­ໃດ​ກໍ​ຕາມ ພວກ​ເຮົາ​ກໍ​ຢ່າ​ລືມ​ແຈ້ງ​ການ​ຂອງ​ນະ­ຄອນ­ຫຼວງ ທີ່​ຝາກ​ໃຫ້​ທຸກ​ຄົນ​ຫຼິ້ນ​ບຸນ­ປີ­ໃໝ່​ຢ່າງ​ມີ​ສະ­ຕິ ມີ​ລະ­ບຽບ ຖືກ​ຕາມ​ຮີດ­ຄອງ​ປະ­ເພ­ນີ ຫົດ­ສົງ​ນ້ຳ​ກໍ​ເລືອກ​ເອົາ​ນ້ຳ​ທີ່​ສະ­ອາດ ຝ່າຍ​ຖືກ​ຫົດ​ຈຶ່ງ​ບໍ່​ເສຍ​ໃຈ ເພາະ­ວ່າ​ປີ​ໃໝ່​ຕ້ອງ​ດີ­ໃຈ ແລະ ໃຈ­ດີ ຊີ­ວິດ​ຈຶ່ງ​ຈະ​ດີ​ຂຶ້ນ.

    ເວົ້າ​ເຖິງ​ການ​ຫຼິ້ນ​ບຸນ­ປີ­ໃໝ່​ໃຫ້​ຖືກ​ຕາມ​ຮີດ­ຄອງ​ປະ­ເພ­ນີ ຖ້າ​ຈະ​ອີງ­ໃສ່​ແຕ່​ແຈ້ງ​ການ​ນະ­ຄອນ­ຫຼວງ​ຢ່າງ​ດຽວ ຄົງ​ບໍ່​ສົມ­ບູນ​ທົ່ວ​ເຖິງ ແຕ່​ສຳ­ຄັນ​ກໍ​ແມ່ນ​ພໍ່​ແມ່​ຜູ້​ປົກ­ຄອງ​ຊ່ວຍ​ກັນ​ອົບ­ຮົມ​ລູກ​ຫຼານ ໃຫ້​ເຂົ້າ­ໃຈ​ຄວາມ​ເໝາະ​ສົມ​ໃນ​ການ​ຫຼິ້ນ​ທ່ຽວ​ໄປ​ມາ ພໍ່​ແມ່​ຮັກ​ລູກ​ຈົນ​ຫຼົງ​ຕາມ­ໃຈ ໂດຍ​ບໍ່​ເຄີຍ​ສັ່ງ­ສອນ ຊີ້​ແຈງ​ເຫດ­ຜົນ ແລະ ບໍ່​ເຄີຍ​ຂັດ­ໃຈ ລູກ​ບາງ​ຄົນ​ຢູ່​ເຮືອນ​ຕໍ່­ໜ້າ​ພໍ່​ແມ່​ປານ​ຜ້າ​ພັບ​ໄວ້ ພໍ​ອອກ​ນອກ​ບ້ານ​ປານ​ຜີ​ຂຶ້ນ​ຈາກ​ໝໍ້​ນາ­ຮົກ ຂີ່​ລົດ​ຊິ້ງ​ບໍ່​ສົນ­ໃຈ​ສັງ­ຄົມ ແນວ​ພໍ່​ແມ່​ບໍ່​ສັ່ງ­ສອນ... ບາດ​ລົດ​ຕຳ​ຕາຍ ຂາ​ຫັກ ຫົວ​ແຕກ ແລ້ວ​ເສຍ​ໃຈ​ພາຍ­ຫຼັງ ເວົ້າ​ເຖິງ​ມາ­ລະ­ຍາດ​ໃນ​ການ​ກິນ​ດື່ມ ກໍ​ຄວນ​ເຄົາ­ລົບ​ໃຫ້​ກຽດ​ໝູ່​ເພື່ອນ ສ້າງ​ຄ່າ​ນິ­ຍົມ​ເປັນ​ຄົນ​ມີ​ມາ­ລະ­ຍາດ​ການ​ສຶກ​ສາ ! ບໍ່​ບັງ­ຄັບ​ກັນ ໃຜ​ດື່ມ​ໄດ້​ສ່ຳ​ໃດ​ກໍ​ຂຶ້ນ​ກັບ​ສຸ­ຂະ­ພາບ​ຂອງ​ແຕ່­ລະ­ຄົນ ເພາະ​ພື້ນ­ຖານ​ຊີ­ວິດ​ຂອງ​ແຕ່­ລະ­ຄົນ​ຕ່າງ​ກັນ ຢ່າ​ໄປ​ເອົາ​ຄຳ​ຕອບ​ດຽວ​ກັນ​ທີ່​ມາ​ຈາກ​ຄຳ​ຖາມ​ຕ່າງ​ກັນ.

    ບຸນ­ປີ­ໃໝ່​ປີ​ນີ້ (2019) ກົງ​ກັບ​ວັນ​ທີ 14-15-16 ເດືອນ​ເມ­ສາ ເຊິ່ງ​ອາດ​ຍັງ​ມີ​ຫຼາຍ​ຄົນ​ຫຼົງ​ເຂົ້າ­ໃຈ​ຜິດ​ວ່າ ຫຼັງ​ຈາກ​ປີ​ໃໝ່​ແລ້ວ​ຈະ​ເປັນ​ປີ ພສ 2562 ໂລດ ວັນ​ສັງ­ຂານ​ລ່ວງ​ນັ້ນ​ແມ່ນ​ວັນ​ສຸດ​ທ້າຍ​ຂອງ​ປີ ຈສ 1380 ເຊິ່ງ​ກົງ​ກັບ​ວັນ​ອາ­ທິດ ຂຶ້ນ 10 ຄ່ຳ ເດືອນ 5 ລາວ (14/04/2019) ວັນ​ເນົາ ຖືກ​ວັນ​ຈັນ (15/04/2019) ຂຶ້ນ 11 ຄ່ຳ ເປັນ​ມື້​ພິ­ເສດ​ຂ້າມ​ຜ່ານ​ໄປ​ຫາ​ປີ​ໃໝ່ ວັນ​ສັງ­ຂານ​ຂຶ້ນ (ມື້​ທີ 1 ຂອງ​ປີ ຈສ 1381) ຖືກ​ວັນ​ອັງ­ຄານ ຂຶ້ນ 12 ຄ່ຳ ກົງ​ກັບ​ວັນ​ທີ (16/04/2019) ດັ່ງ­ນັ້ນ ຈຶ່ງ​ບໍ່​ຄວນ​ເຂົ້າ­ໃຈ​ຜິດ​ວ່າ ຫຼັງ​ປີ​ໃໝ່​ຈະ​ເປັນ​ມື້​ປ່ຽນ ພສ ໂລດ ເພາະ​ມື້​ປ່ຽນ ພສ ແມ່ນ​ກົງ​ກັບ​ວັນ​ທີ 18 ເດືອນ 5 ພຸ້ນ ຈາກ ພສ 2561 ເປັນ ພສ 2562 ເຊິ່ງ​ກົງ​ກັບ​ວັນ​ວິ­ສາ­ຂະ­ບູ­ຊາ (15 ຄ່ຳ ເດືອນ 6 ລາວ).

    ສຳ­ລັບ​ປີ​ໃໝ່ ຈສ 1381 ນີ້ ນາງ​ສັງ­ຂານ​ຈະ​ເປັນ​ເທບ​ທິ­ດາ​ຄົນ​ທຳ​ອິດ​ຂອງ​ພະ­ຍາ​ກາ​ບິນ​ລະ​ພົມ ມີ​ຊື່­ວ່າ: ນາງ ທຸງ​ສະ​ເທວີ ສະ­ເຫວີຍ (ກິນ) ໝາກ­ເດື່ອ​ເປັນ​ອາ­ຫານ ມື​ຂວາ​ຖື​ຈັກ ມື​ຊ້າຍ​ຖື​ສັງ ເຊິ່ງ​ຂີ່​ພາ­ຫາ​ນະ​ແມ່ນ​ຄຸດ ບຸນ­ປີ­ໃໝ່​ລາວ ກໍ​ຂໍ​ໃຫ້​ເຈົ້າ​ໜ້າ­ທີ່​ເຂັ້ມ​ງວດ ເມົາ​ບໍ່​ຂັບ​ຂີ່ ເພາະ​ດື່ມ​ເມົາ​ແລ້ວ​ຂັບ​ລົດ ກໍ​ແມ່ນ​ສາ­ເຫດ​ໃຫຍ່​ເກີດ​ອຸ­ບັດ­ເຫດ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ