ຂ່າວຫຼ້າສຸດ

ປີໃໝ່ລາວ ພ.ສ 2562 ປີກຸນ (ປີໝູ)

1.910 08 ມ.ສ. 2019 ນານາສາລະ

    ປີ​ໃໝ່​ລາວ ພ.ສ 2562 ຫຼື ຈ.ສ 1381 ຄ.ສ 2019, ສິ່ງ​ຕິດ​ພັນ​ກັບ​ປີ​ໃໝ່ ແມ່ນ “ໂຫລະ​ສາດ” ເຊິ່ງ​ນັກ­ປາດ​ອາ­ຈານ​ຂອງ​ລາວ​ເຮົາ ຕັ້ງ­ແຕ່​ສະ­ໄໝ​ບູ­ຮານ​ນະ​ການ ໄດ້​ປະ­ມູນ​ມໍ­ລະ­ດົກ​ທາງ​ສະ­ຕິ​ປັນ­ຍາ​ໄວ້​ໃຫ້​ຫຼາຍ​ຢ່າງ ເປັນ­ຕົ້ນ ປຣັຊ​ຍາ​ແຫ່ງ​ການ​ດຳ­ລົງ​ຊີ­ວິດ ປະ­ຈຳ​ວັນ​ທີ່​ຕິດ​ພັນ​ທາງ​ຄະ­ຕິ​ທຳ ຊຶ່ງ​ໄດ້​ກາຍ­ເປັນ​ຄະ­ຕິ​ສອນ​ໃຈ​ໃຫ້​ລູກ​ຫຼານ​ຜູ້​ສືບ​ທອດ​ຕາມ​ມາ​ໄດ້​ນັບ­ຖື​ຄື: ໃຫ້​ຮູ້­ຈັກ ບາບ ບຸນ ຄຸນ ໂທດ ແລະ ນຳ​ໃຊ້​ເຂົ້າ​ໃນ​ການ​ດຳ­ລົງ​ຊີ­ວິດ​ປະ­ຈຳ​ວັນ. ເພື່ອ​ໃຫ້​ກາຍ­ເປັນ​ພົນ­ລະ­ເມືອງ​ດີ ມີ​ລະ­ບຽບ​ວິ­ໄນ ປະ­ຕິ­ບັດ​ກົດ­ໝາຍ​ບ້ານ​ເມືອງ​ຢ່າງ​ຖືກ­ຕ້ອງ ສອດ­ຄ່ອງ ອັນ​ເປັນ​ການ​ປະ­ກອບ­ສ່ວນ ເຮັດ​ໃຫ້​ຊີ­ວິດ​ສັງ­ຄົມ ເດີນ​ໄປ​ຂ້າງ​ໜ້າ ຢ່າງ​ມີ​ຄວາມ​ສະ­ຫງົບ​ໝັ້ນ​ທ່ຽງ ປາດ​ສະ​ຈາກ​ປາ­ກົດ­ການ​ຍໍ້​ທໍ້....

    ນອກ­ຈາກ​ນີ້ ສຳ­ຄັນ​ກໍ​ຄື​ມູນ​ມໍ­ລະ­ດົກ ທາງ​ດ້ານ “ໂຫລະ​ສາດ” ໄວ້​ໃຫ້​ຄຳ­ນວນ​ຄິດ­ໄລ່ ຕາມ​ຫຼັກ​ເກນ​ທີ່​ເພິ່ນ​ຕັ້ງ​ໄວ້ (ສະ­ເພາະ​ຜູ້​ໄດ້​ຮຽນ) ມີ​ດ້ານ​ຕ່າງໆ​ຊຶ່ງ​ລ້ວນ​ແຕ່​ພົວ­ພັນ​ກັບ​ຊີ­ວິດ​ປະ­ຈຳ​ວັນ​ທັງ​ນັ້ນ (ຈະ​ເຊື່ອ​ຫຼື​ບໍ່​ກໍ​ຂໍ​ໃຫ້​ເປັນ​ດຸນ​ພິ­ນິດ​ສ່ວນ​ບຸກ­ຄົນ). ປີ​ໃໝ່​ລາວ​ປີ​ນີ້​ແມ່ນ​ປີ​ກຸນ (ປີ​ໝູ ຫຼື ປີ​ທີ12). ກົງ​ກັບ ພ.ສ 2562, ຈ.ສ 1381, ຄ.ສ 2019. ປີ​ກຸນ ເອີ້ນ​ຕາມ​ສັບ​ໂຫ​ລາ​ສາດ​ວ່າ ປີ (ກັດ​ໃຄ້) ເອ­ກະ​ສົກ ປົກ­ກະ­ຕິ​ມາດ, ປົກ­ກະ­ຕິ​ວານ, ປົກ­ກະ­ຕິ​ສຸ​ຣະ​ທິນ.

ມື້​ວັນ ລືກ​ຍາມ​ທີ່​ກ່ຽວ​ພັນ​ກັບ​ປີ​ໃໝ່ ປີ​ກຸນ ຫຼື (ປີ​ໝູ)ພ.ສ 2562 ນີ້​ມີ​ຄື:

    - ວັນ​ສັງ­ຂານ​ລ່ວງ: ເດືອນ 05 ຂຶ້ນ 10 ຄ່ຳ ວັນ​ອາ­ທິດ ປີ​ຈໍ (ເປິກ​ເສັດ) ພ.ສ 2561 ກົງ​ກັບ​ວັນ​ທີ 14 ເມ­ສາ ຄ.ສ 2019 ຈ.ສ 1380 ເວ­ລາ 15 ໂມງ 12 ນາ­ທີ 55 ວິ­ນາ­ທີ.

    - ວັນ​ສັງ­ຂານ​ເນົາ: ເດືອນ 5 ຂື້ນ 11 ຄ່ຳ ວັນ​ຈັນ ປີ​ຈໍ (ເປິກ​ເສັດ) ພ.ສ 2561 ກົງ​ກັບ​ວັນ​ທີ 15 ເມ­ສາ ຄ.ສ 2019 ຈ.ສ 1380.

    - ວັນ​ສັງ­ຂານ​ຂື້ນ: ເດືອນ 5 ຂື້ນ 12 ຄ່ຳ ວັນ​ອັງ­ຄານ ປີ​ກຸນ (ກັດ​ໃຄ້) ພ.ສ 2561 ກົງ​ກັບ​ວັນ​ທີ 16 ເມ­ສາ ຄ.ສ 2019. ຈ.ສ 1380. ເວ­ລາ 19 ໂມງ 12 ນາ­ທີ 00 ວິ­ນາ­ທີ ເປັນ​ວັນ​ຖະ­ເຫຼີງ​ສົກ ຂຶ້ນ​ປີ​ໃໝ່​ລາວ ປ່ຽນ​ເປັນ​ຈຸ​ລະ​ສັກ­ກະ​ຣາດ 1381.

    - ນາງ​ສັງ­ຂານ: ປີ​ກຸນ ເອ­ກະ​ສົກ ເປັນ​ປົກ­ກະ­ຕິ​ມາດ, ປົກ­ກະ­ຕິ​ວານ, ປົກ­ກະ­ຕິ​ສຸ​ຣະ​ທິນ ກຸມ­ພາ 28 ວັນ.

    - ນາມ​ມະ­ຫາ­ສົງ­ການ: ສັງ­ຂານ​ລ່ວງ​ວັນ​ອາ­ທິດ ນາງ​ເທບ​ທິ­ດາ​ທີ 1 ຊື່­ວ່າ “ທຸງ​ສະ​ເທວີ” ທົງ​ພະ­ຫຸ​ຣັດ​ທັດ​ດອກ​ພິ­ລາ ອາ­ພອນ​ປະ­ດັບ​ດ້ວຍ​ແກ້ວ ປັດ­ທະ­ມະ​ຣາດ (ແກ້ວ​ພິ­ລາ) ພັກ­ສາ­ຫານ ອຸ­ທຸມ­ພອນ (ໝາກ­ເດື່ອ) ພະ­ຫັດ​ຂວາ​ທົງ​ຈັກ ພະ­ຫັດ​ຊ້າຍ​ທົງ​ສັງ ສະ­ເດັດ​ນັ່ງ​ມາ​ເໜືອ​ຫຼັງ​ຄຸດ ເປັນ​ພາ­ຫະ­ນະ. ຈຶ່ງ​ທວາຍ​ໄວ້​ວ່າ:

    - ສັງ­ຂານ​ລ່ວງ: ວັນ​ອາ­ທິດ ປີ​ນີ້​ໄຮ່­ນາ ຮົ້ວ​ສວນ​ບໍ່​ຄ່ອຍ​ດີ​ປານ­ໃດ.

    - ສັງ­ຂານ​ເນົາ: ວັນ​ຈັນ​ເກືອ​ຈະ​ແພງ (ສະ­ໄໝ​ໂບ­ຮານ​ອາດ​ຫາ​ເກືອ​ຍາກ) ນາງ​ພຣະ​ຍາ ຈະ​ໃຈ­ຮ້ອນ.

    - ສັງ­ຂານ​ຂື້ນ: ວັນ​ອັງ­ຄານ ອາ­ມາດ​ມົນ​ຕຣີ ຄະ­ນະ​ລັດ­ຖະ­ບານ ຈະ​ຢູ່​ເຢັນ​ເປັນ​ສຸກ ແມ່ນ​ຈະ​ກະ­ທຳ​ການ​ຕໍ່­ສູ້​ກັບ​ປັດ­ຈາ­ມິດ ໃນ​ທິດ​ໃດໆກໍຈະ​ມີ­ໄຊ­ຊະ­ນະ.

    - ນາກ​ປະ​ທານ​ຊົລ: ນາກ​ໃຫ້​ນ້ຳ​ເສດ 03 ນາກ​ຫຼີ້ນ​ນ້ຳ 03ໂຕ ຝົນ​ຈະ​ມີ​ພໍ​ສົມ­ຄວນ.

    - ເກນ​ພິ​ຣຸນ​ນະ​ສາດ: ເສດ 05 ພຣະ​ຫັດ​ເປັນ​ອະ­ທິ­ບໍ­ດີ ບັນ­ດານ​ໃຫ້​ຝົນ­ຕົກ 500 ຫ່າ:

      ຕົກ​ໃນ​ຈັກ­ກະ­ວານ 200 ຫ່າ;

      ຕົກ​ໃນ​ປ່າ​ຫິມ​ມະ​ພານ 150 ຫ່າ;

      ຕົກ​ໃນ​ມະ­ຫາ​ສະ­ໝຸດ 100 ຫ່າ;

      ຕົກ​ໃນ​ມະ­ນຸດ­ສະ­ໂລກ 50 ຫ່າ.

    ໝາຍ­ເຫດ: ຝົນ 1 ຫ່າ ເທົ່າ​ກັບ ເອົາ​ບາດ​ຄູ­ບາ​ໂຕ່ງ​ນ້ຳ​ຝົນ​ໃນ​ຫ່າ​ນັ້ນ​ໄດ້​ເຕັມ​ບາດ​ຈຶ່ງ​ເອີ້ນ​ເປັນ 1 ຫ່າ.

    - ເກນ​ທາ­ລາ​ທີ​ຄຸນ: ເສດ 1 ຣາ​ສີ​ປະ​ທະ­ວີ​ທາດ ທາດ​ດິນ ຈະ​ມີ​ນ້ຳ​ອຸ­ດົມ­ສົມ­ບູນ​ດີ

    - ທວຍ​ເລື່ອງ​ລົມ: ເສດ 14 ຈະ​ມີ​ລົມ​ພັດ​ມາ​ຫຼາຍ.

    - ເກນ​ທັນ​ຍາ​ຫານ: ເສດ 0 ຊື່­ວ່າ​ເຂົ້າ​ກ້າ​ໄຮ່­ນາ​ຈະ​ໄດ້­ຜົນ 1 ສ່ວນ ເສຍ​ໄປ 10 ສ່ວນ, ຈະ​ເກີດ​ທຸ​ພ​ພິກ​ຂະ​ໄພ ເພາະ​ທັນ​ຍາ​ຫານ​ຈະ​ແພງ ບາງ​ແຫ່ງ​ບໍ່​ພໍ­ໃຊ້.

    - ທວຍ​ການ​ເຮັດ​ນາ: ເສດ 05 ນາ​ລຸ່ມ ນາ​ໂນນ​ຈະ​ດີ​ທຸກ​ແຫ່ງ​ທັງ​ສອງ​ຢ່າງ.

    - ທວຍ​ເລື່ອງ​ໝາກ​ໄມ້: ເສດ 0 ໝາກ​ໄມ້ ຈະ​ເປັນ​ດ້ວງ ເປັນ​ບົ້ງ ເປັນ​ແມງ​ຫຼາຍ.

    - ເກນ​ກາ­ລະ​ໂຍກ: ເສດ 02 ວັນ​ຈັນ​ເປັນ​ວັນ ທຸງ­ໄຊ.

    // 0 ວັນ ເສົາ ເປັນ​ອະ­ທິ­ບໍ­ດີ;

    // 2 ວັນ​ຈັນ​ເປັນ​ວັນ​ອຸ­ບາດ;

    // 2 ວັນ​ຈັນ​ເປັນ​ວັນ​ໂລ­ກະ​ວິ­ນາດ.

    - ເກນ​ຣຸກ​ຂະ​ຊາດ: ເສດ 03 ໄມ້​ກ່ອມ​ເກາະ (ໄມ້​ສົ້ມ​ພໍ່, ໄມ້​ຂ່ອຍ, ໄມ້​ທົ່ມ) ເປັນ​ພະ­ຍາ ບ້ານ​ເມືອງ​ຈະ​ມີ​ສຸກ​ດີ ແຕ່​ທໍ່​ວ່າ​ເຄືອງ​ໃຈ​ຕື່ນ​ທ້ວງ​ກັນ​ເລັກ​ນ້ອຍ​ແລ.

    ດັ່ງ­ນັ້ນ ປີ​ໃໝ່​ລາວ​ປີ​ນີ້​ຄື​ດັ່ງ​ທີ່​ກ່າວ​ມາ​ຂ້າງ​ເທິງ​ນັ້ນ​ຈຶ່ງ​ແມ່ນ: ວັນ​ທີ 14 ເມ­ສາ 2019 ເປັນ​ວັນ​ສັງ­ຂານ​ລ່ວງ, 15 ເມ­ສາ 2019 ເປັນ​ວັນ​ເນົາ ແລະ 16 ເມ­ສາ 2019 ເປັນ​ວັນ​ສັງ­ຂານ​ຂື້ນ. ຈຶ່ງ​ຂໍ​ໃຫ້​ທຸກ​ຄົນ​ຫຼີ້ນ​ບຸນ­ປີ­ໃໝ່​ປະ­ຈຳ​ຊາດ​ຕົນ ດ້ວຍ​ຄວາມ​ເບີກ­ບານ​ມ່ວນ­ຊື່ນ ມີ​ສະ­ຕິ. ຂໍ​ອວຍ­ພອນ​ທຸກ​ທ່ານ​ຈົ່ງ​ປະ­ສົບ​ຜົນ­ສຳ­ເລັດ​ໃນ​ໜ້າ­ທີ່​ວຽກ​ງານ ປາດ​ຖະ​ໜາ​ສິ່ງ​ໃດ​ຈົ່ງ​ໄດ້​ດັ່ງ​ໃຈ​ປາດ​ຖະ​ໜາ. ຈົ່ງ​ມີ ອາ­ຍຸ ວັນ­ນະ ສຸ​ຂະ ພະ­ລະ ເທີ້ນ. ໂຊກ​ດີ​ປີ​ໃໝ່ ພ.ສ 2562,ຈ.ສ 1381, ຄ.ສ 2019 !

ຮຽບ​ຮຽງ​ໂດຍ: ດອກ​ຊ້ອນ ດອນ​ໂຂງ

ຂ່າວທີ່ກ່ຽວຂ້ອງ