ປະທານປະເທດ ຢ້ຽມຢາມໂຄງການທາງລົດໄຟ ລາວ-ຈີນ ຢູ່ເມືອງນາຊາຍທອງ

230 08 ມ.ສ. 2019 ຂ່າວໜ້າ​ໜຶ່ງ

    ໃນ​ວັນ​ທີ 5 ເມ­ສາ 2019 ຢູ່​ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ແຫ່ງ ສປປ ລາວ ພ້ອມ​ດ້ວຍ​ຄະ­ນະ ໄດ້​ລົງ​ເຄື່ອນ​ໄຫວ​ຢ້ຽມ­ຢາມ​ໂຄງ­ການ​ທາງ​ລົດ­ໄຟ ລາວ-ຈີນ ຊຶ່ງ​ມີ​ບັນ­ດາ​ທ່ານ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ບໍ­ລິ­ສັດ​ຜູ້​ຮັບ​ເໝົາ ລາວ-ຈີນ ທ່ານ ຈີ້ ໂກ ຈ່ຽງ ປະ­ທານ​ສະ­ພາ​ບໍ­ລິ­ຫານ​ບໍ­ລິ­ສັດ​ລົດ­ໄຟ ລາວ-ຈີນ ພ້ອມ​ດ້ວຍ​ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ໂອ­ກາດ​ດັ່ງ­ກ່າວ ທ່ານ ຈີ້ ໂກ ຈ່ຽງ ໄດ້​ກ່າວ​ລາຍ​ງານ​ໃຫ້​ຮູ້​ວ່າ: ໂຄງ­ການ​ທາງ​ລົດ­ໄຟ ລາວ-ຈີນ ທິດ­ເໜືອ​ເຊື່ອມ​ຈອດ​ກັບ​ໂຄງ­ການ​ທາງ​ລົດ­ໄຟ ຍຸ໋ຍ​ຊີ-ບໍ່​ຫານ ທິດ­ໃຕ້​ຕິດ​ກັບ​ຊາຍ​ແດນ​ໄທ ເຊິ່ງ​ມີ​ແຜນ​ກໍ່­ສ້າງ​ແຕ່​ຈັງ­ຫວັດ​ໜອງ​ຄາຍ​ຫາ​ບາງ­ກອກ ຢູ່​ໃນ​ຊາຍ​ແດນ​ປະ­ເທດ​ລາວ ແຕ່​ແຂວງ​ຫຼວງ​ນ້ຳ​ທາ​ຜ່ານ​ແຂວງ​ອຸ­ດົມ​ໄຊ ນະ­ຄອນ­ຫຼວງ​ພະ​ບາງ ແຂວງ​ວຽງ​ຈັນ ຈົນ​ເຖິງ​ນະ­ຄອນ­ຫຼວງ​ວຽງ​ຈັນ ຄວາມ​ໄວ​ໃນ​ການ​ອອກ​ແບບ​ແມ່ນ 160 ກິ­ໂລ­ແມັດ​ຕໍ່​ຊົ່ວ­ໂມງ ສຳ­ລັບ​ຂົນ­ສົ່ງ​ຜູ້­ໂດຍ­ສານ ແລະ ສິນ­ຄ້າ​ໃຊ້​ລາງ​ດຽວ​ກັນ ໂດຍ​ໃຊ້​ພະ­ລັງ­ງານ​ໄຟ­ຟ້າ​ເປັນ​ແຮງ​ຂັບ​ເຄື່ອນ ມີ​ລາງ​ຍາວ​ທັງ​ໝົດ 414.332 ກິ­ໂລ­ແມັດ ລວມ​ມີ 32 ສະ­ຖາ­ນີ ໃນ​ໄລ­ຍະ​ເບື້ອງ​ຕົ້ນ ຈະ​ເປີດ​ນຳ​ໃຊ້​ກ່ອນ 20 ສະ­ຖາ­ນີ ຊຶ່ງ​ມີ​ພະ­ນັກ­ງານ​ທັງ​ໝົດ 16.000 ຄົນ ເສັ້ນ­ທາງ​ລົດ­ໄຟ​ດັ່ງ­ກ່າວ​ໃນ​ອະ­ນາ­ຄົດ ຈະ​ລົງ​ໄປ​ທາງ​ໃຕ້​ເຊື່ອມ​ຕໍ່​ກັບ​ເສັ້ນ­ທາງ​ລົດ­ໄຟ ຈີນ-ໄທ ຜ່ານ​ມາ​ເລ​ເຊຍ ໄປ​ຮອດ​ທ່າ­ເຮືອ​ສິງ­ກະ­ໂປ ເປັນ​ກະ­ແຈ​ດວງ​ໜຶ່ງ​ທີ່​ໄຂ​ສັງ­ກາດ​ໃໝ່ ຖື​ເອົາ​ຂະ­ແໜງ​ທາງ​ລົດ­ໄຟ​ເປັນ​ອັນ​ກະ­ຕຸກ​ຊຸກ­ຍູ້​ເສດ­ຖະ­ກິດ-ສັງ­ຄົມ​ຂອງ ສປປ ລາວ ຖືກ​ກັບ​ຄວາມ​ຝັນ​ຈະ​ສ້າງ​ໃຫ້​ປະ­ເທດ​ລາວ ເປັນ​ປະ­ເທດ​ເຊື່ອມ​ຈອດ​ໃຫ້​ປາ­ກົດ​ຜົນ​ເປັນ​ຈິງ ນັບ​ແຕ່​ໄດ້​ເປີດ​ໂຄງ­ການ​ກໍ່­ສ້າງ​ໃນ​ປີ 2016 ເປັນ­ຕົ້ນ​ມາ ຜູ້​ຮັບ​ເໝົາ​ໄດ້​ເອົາ­ໃຈ­ໃສ່​ໃນ​ການ​ກໍ່­ສ້າງ ມາ​ຮອດ​ທ້າຍ​ເດືອນ​ມີ­ນາ​ທີ່​ຜ່ານ​ມາ ທາງ​ລົດ­ໄຟ ລາວ-ຈີນ ໄດ້​ສຳ­ເລັດ​ການ​ລົງ­ທຶນ ລວມ 13 ຕື້​ກວ່າ​ຢວນ ໃນ​ນັ້ນ ວຽກ​ກໍ່­ສ້າງ​ພື້ນ​ທາງ​ໄດ້​ສຳ­ເລັດ 87% ວຽກ​ຂຸດ​ເຈາະ​ອຸບ​ມົງ​ຄືບ​ໜ້າ 54% ໃນ​ນີ້ ມີ​ອຸບ​ມົງ 13 ແຫ່ງ ໄດ້​ສຳ­ເລັດ​ການ​ຂຸດ​ເຈາະ​ແລ້ວ ວຽກ​ກໍ່­ສ້າງ​ຂົວ​ສຳ­ເລັດ​ແລ້ວ 43% ຮອດ​ທ້າຍ​ປີ 2019 ຄາດ​ວ່າ​ໜ້າ​ວຽກ​ຕ່າງໆ​ແມ່ນ​ຈະ​ຢູ່​ໃນ​ໄລ­ຍະ​ການ​ເກັບ​ລາຍ​ລະ­ອຽດ​ໂຄງ­ການ​ກໍ່­ສ້າງ.

    ໃນ​ໂອ­ກາດ​ນີ້ ທ່ານ ບຸນ​ຍັງ ວໍ­ລະ​ຈິດ ໄດ້​ໃຫ້​ກຽດ​ຊີ້​ນຳ​ຄະ­ນະ​ຮັບ­ຜິດ­ຊອບ​ໂຄງ­ການ ໃຫ້​ເອົາ­ໃຈ­ໃສ່​ຄຸນ​ນະ​ພາບ​ການ​ກໍ່­ສ້າງ ໃຫ້​ມີ​ຄວາມ​ແຂງ­ແຮງ ທົນ​ທານ ຮັບ­ປະ­ກັນ​ຄວາມ​ປອດ​ໄພ ຄວບ​ຄູ່​ກັບ​ການ​ຮັກ­ສາ​ສິ່ງ­ແວ­ດລ້ອມ ການ​ສ້າງ​ວຽກ​ເຮັດ​ງານ​ທຳ ດ້ວຍ​ການ​ເພີ່ມ​ຈຳ­ນວນ​ກຳ­ມະ­ກອນ​ລາວ ໃຫ້​ເຂົ້າ​ເຮັດ​ວຽກ​ໃນ​ຕຳ­ແໜ່ງ​ງານ​ຕ່າງໆ ເພື່ອ​ເປັນ​ການ​ສ້າງ​ບຸ​ຄະ­ລາ​ກອນ​ຂອງ​ລາວ ໃຫ້​ມີ​ຄວາມ​ສາ­ມາດ​ສືບ​ທອດ​ວຽກ​ງານ​ວິ­ຊາ​ການ​ກ່ຽວ​ກັບ​ເສັ້ນ­ທາງ​ລົດ­ໄຟ ປຸກ­ລະ­ດົມ​ປະ­ຊາ­ຊົນ​ທ້ອງ­ຖິ່ນ ໃຫ້​ປະ­ກອບ­ສ່ວນ​ເຂົ້າ​ໃນ​ວຽກ​ງານ​ປົກ​ປັກ​ຮັກ­ສາ​ເສັ້ນ­ທາງ​ລົດ­ໄຟ ພ້ອມ​ທັງ​ຊຸກ­ຍູ້​ຂະ​ບວນ​ການ​ຜະ­ລິດ​ຂອງ​ປະ­ຊາ­ຊົນ​ທ້ອງ­ຖິ່ນ ເພື່ອ​ກະ​ຕຸ້ນ​ເສດ­ຖະ­ກິດ​ທ້ອງ­ຖິ່ນ​ໃຫ້​ມີ​ການ​ຂະ­ຫຍາຍ­ຕົວ ແລະ ທັງ​ເປັນ​ການ​ສ້າງ​ລາຍ​ຮັບ​ໃຫ້​ເຂົາ­ເຈົ້າ  ທັງ​ນີ້​ເພື່ອ​ເປັນ​ການ​ປະ­ກອບ­ສ່ວນ​ເຂົ້າ​ໃນ​ສາຍ​ພົວ­ພັນ​ມິດ­ຕະ­ພາບ ຕາມ​ທິດ 4 ດີ.

ຂ່າວທີ່ກ່ຽວຂ້ອງ