ງານຊັບສິນທາງປັນຍາປີ 2019 ຈະຈັດຂຶ້ນທ້າຍເດືອນນີ້

159 09 ມ.ສ. 2019 ຂ່າວໜ້າ​ໜຶ່ງ

    ງານ​ມະ​ຫະ​ກຳ​ຊັບ​ສິນ​ທາງ​ປັນ­ຍາ ຄັ້ງ​ທີ 5 ຈະ​ຈັດ​ຂຶ້ນ​ວັນ​ທີ 24-28 ເມ­ສາ 2019 ທີ່​ຕະ­ຫຼາດ​ສູນ​ການ​ຄ້າ​ນະ­ຄອນ​ປາກ​ເຊ ແຂວງ​ຈຳ­ປາ​ສັກ ພາຍ​ໃຕ້​ຄຳ​ຂວັນ “ເສີມ​ສ້າງ​ຊັບ​ສິນ​ທາງ​ປັນ­ຍາ ເພື່ອ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ວັດ­ທະ­ນະ­ທຳ​ແບບ​ຍືນ​ຍົງ” ພ້ອມ​ທັງ​ຈະ​ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ຊັບ​ສິນ​ທາງ​ປັນ­ຍາ​ໂລກ ຄົບ­ຮອບ 19 ປີ​ຂຶ້ນ​ໃນ​ວັນ​ທີ 26 ເມ­ສາ 2019 ພາຍ​ໃຕ້​ຄຳ​ຂວັນ “ຊັບ​ສິນ​ທາງ​ປັນ­ຍາ ແລະ ກີ­ລາ: “ກ້າວ​ຂຶ້ນ​ສູ່​ຫຼຽນ​ຄຳ” ໃນ​ງານ​ດັ່ງ­ກ່າວ ຈະ​ໄດ້​ເຊື້ອ​ເຊີນ​ບັນ­ດາ​ຜູ້​ປະ­ກອບ​ການ​ທັງ​ພາກ​ລັດ ແລະ ເອ­ກະ​ຊົນ ສະ­ຖານ­ທູດ ອົງ​ການ­ຈັດ­ຕັ້ງ​ສາ­ກົນ ປະ­ເທດ​ສະ­ມາ­ຊິກ​ອາ​ຊຽນ ແລະ ປະ­ເທດ​ອື່ນໆ​ເຂົ້າ​ຮ່ວມ (ມີ 162 ບູດ ຈາກ ລາວ ໄທ ຫວຽດ­ນາມ ອິນ​ໂດ​ເນ​ເຊຍ) ພາຍ​ໃນ​ງານ​ຈະ​ມີ​ວາງ­ສະ­ແດງ​ຜົນ­ງານ​ຊັບ​ສິນ​ທາງ​ປັນ­ຍາ​ຂອງ​ລາວ ແລະ ສາ­ກົນ ພ້ອມ​ດຽວ​ກັນ​ນັ້ນ ຍັງ​ຈັດ​ຫຼາຍ​ກິດ­ຈະ­ກຳ ເປັນ­ຕົ້ນ ການ​ໂຄ­ສະ­ນາ​ເຜີຍ­ແຜ່​ຄວາມ​ຮູ້​ຊັບ​ສິນ​ທາງ​ປັນ­ຍາ ເພື່ອ​ສ້າງ​ຄວາມ​ເຂົ້າ­ໃຈ ແລະ ເຫັນ​ໄດ້​ຄວາມ​ສຳ­ຄັນ​ຂອງ​ວຽກ​ງານ​ຊັບ​ສິນ​ທາງ​ປັນ­ຍາ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ວັດ­ທະ­ນະ­ທຳ​ແບບ​ຍືນ​ຍົງ​ຂອງ​ປະ­ເທດ​ລາວ ເຮັດ​ໃຫ້​ສາ­ທາ­ລະ­ນະ​ຊົນ​ໄດ້​ຮັບ​ຮູ້​ຂໍ້​ມູນ​ຂ່າວ­ສານ​ກ່ຽວ​ກັບ​ການ​ຄຸ້ມ​ຄອງ ແລະ ການ​ປົກ​ປ້ອງ​ຊັບ​ສິນ​ທາງ​ປັນ­ຍາ​ຂອງ​ບັນ­ດາ​ນັກ​ຄົ້ນ­ຄວ້າ ນັກ­ວິ­ທະ­ຍາ­ສາດ ນັກ​ປະ­ດິດ​ສ້າງ ນັກ​ປະ­ດິດ​ຄິດ​ແຕ່ງ ແລະ ຜູ້​ທີ່​ເປັນ​ເຈົ້າ​ຂອງ​ຊັບ​ສິນ​ທາງ​ປັນ­ຍາ​ອື່ນໆ.

    ນອກ­ຈາກ​ເຈົ້າ​ຂອງ​ຜົນ­ງານ ຜູ້​ປະ­ກອບ​ການ​ນຳ​ເອົາ​ຜະ­ລິດ​ຕະ​ພັນ​ຜົນ­ງານ​ທາງ​ດ້ານ​ຊັບ​ສິນ​ທາງ​ປັນ­ຍາ ແລະ ພູມ​ປັນ­ຍາ​ພື້ນ​ບ້ານ ອັນ​ເປັນ​ມູນ­ເຊື້ອ​ຂອງ​ຕົນ​ເຂົ້າ​ຮ່ວມ​ວາງ­ສະ­ແດງ​ໃນ​ງານ​ຄັ້ງ​ນີ້​ແລ້ວ ຜູ້​ເຂົ້າ​ຮ່ວມ​ທັງ​ພາຍ​ໃນ ແລະ ຕ່າງ­ປະ­ເທດ ຈະ​ໄດ້​ມີ​ໂອ­ກາດ​ພົບ​ປະ​ແລກ­ປ່ຽນ​ບົດ­ຮຽນ​ປະ­ສົບ​ປະ­ການ​ເຊິ່ງ​ກັນ ແລະ ກັນ ແລະ ສາ­ມາດ​ຈັບ​ຄູ່​ຮ່ວມ​ທຸ­ລະ​ກິດ​ນຳ​ກັນ​ຕື່ມ​ອີກ.

    ພິ­ທີ​ຖະ­ແຫຼງ​ຂ່າວ​ງານ​ມະ​ຫະ​ກຳ​ຊັບ​ສິນ​ທາງ​ປັນ­ຍາ ປີ 2019 ແລະ ສະ­ເຫຼີມ­ສະ­ຫຼອງ​ວັນ​ຊັບ​ສິນ​ທາງ​ປັນ­ຍາ​ໂລກ 26 ເມ­ສາ ຈັດ​ຂຶ້ນ​ໃນ​ວັນ​ທີ 5 ເມ­ສາ 2019 ທີ່​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຖະ­ແຫຼງ​ຂ່າວ​ໂດຍ​ທ່ານ ຫຸມ­ພັນ ອິນ​ທະ​ລາດ ຮອງ​ລັດ­ຖະ­ມົນ­ຕີ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ແລະ ທ່ານ ບົວ​ສອນ ວົງ​ສອງ​ຄອນ ຮອງ​ເຈົ້າ­ແຂວງ​ຈຳ­ປາ​ສັກ ມີ​ຜູ້­ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ