ຫຼີ້ນປີໃໝ່ໃຫ້ລະວັງ 2 ນ້ຳ

1.849 10 ມ.ສ. 2019 ນານາສາລະ

    ປີ​ໃໝ່​ລາວ ພ.ສ 2562 ຈ.ສ 1831 ຄ.ສ 2019 ປີ​ກຸນ (ປີ​ໝູ) ຕາມ​ປະ­ເພ­ນີ​ເອີ້ນ​ນອກ­ຈາກ​ວ່າ: ບຸນ­ປີ­ໃໝ່​ລາວ​ແລ້ວ ກໍ​ມີ: ກຸດ​ສົງ­ການ ບຸນ​ຫົດ​ນ້ຳ ບຸນ​ເດືອນ​ຫ້າ...ບຸນ­ປີ­ໃໝ່​ທີ່​ຄ້າຍ­ຄື​ບຸນ​ຂອງ​ຊາດ​ອື່ນໆ​ນັ້ນ ກໍ​ແມ່ນ​ການ​ອວຍ­ພອນ​ເຊິ່ງ​ກັນ ແລະ ກັນ ຂໍ​ໃຫ້​ສຸ­ຂະ­ພາບ​ເຂັ້ມ­ແຂງ ມີ​ໂຊກ​ມີ​ລາບ ແຕກ​ຕ່າງ​ໄປ​ຈາກ​ຊາດ​ອື່ນ ແມ່ນ​ການ​ອວຍ​ໄຊ​ໃຫ້​ພອນ​ກັນ​ດ້ວຍ​ການ​ຫົດ​ນ້ຳ ແລະ ຍັງ​ມີ​ຊາດ​ອື່ນ​ທີ່­ຢູ່​ເອ​ເຊຍ​ນຳ​ກັນ ກໍ​ມີ​ປະ­ເພ­ນີ​ເຮັດ​ບຸນ­ປີ­ໃໝ່ ແລະ ອວຍ­ພອນ​ກັນ​ດ້ວຍ​ການ​ຫົດ​ນ້ຳ​ເຊັ່ນ​ກັນ.

    ດັ່ງ­ນັ້ນ ທີ່​ເຫັນ​ເປັນ​ປະ­ຈຳ​ໃນ​ຊຸມ​ປີ­ຜ່ານ­ມາ ສິ່ງ​ບໍ່​ຢາກ​ເຂົ້າ​ຕາ​ບ້ານ​ຕາ​ເມືອງ ກໍ​ຫາກ​ແມ່ນ​ການ​ບໍ່​ຟັງ​ແຈ້ງ​ການ​ກ່ຽວ​ກັບ​ການ​ຫຼີ້ນ​ວັນ​ບຸນ​ດັ່ງ­ກ່າວ​ຂອງ​ການ­ຈັດ­ຕັ້ງ ຫຼື ອົງ­ການ​ປົກ­ຄອງ​ທ້ອງ­ຖິ່ນ ຈຶ່ງ​ຂາດ​ຄວາມ​ເປັນ​ລະ­ບຽບ ພາ­ໃຫ້​ພາບ​ພົດ​ຂອງ​ບຸນ​ເສື່ອມ​ເສຍ​ຍ້ອນ. ໃນ​ທີ່​ນີ້ ຜູ້​ຂຽນ​ຢາກ​ແລກ­ປ່ຽນ​ວ່າ: ໃນ​ການ​ຫຼີ້ນ​ບຸນ­ປີ­ໃໝ່​ລາວ​ເຮົາ​ນີ້ ໃຫ້​ເອົາ­ໃຈ­ໃສ່​ລະ­ວັງ 2 ນ້ຳ​ຄື:

1. ນ້ຳ​ອວຍ­ພອນ: ແມ່ນ​ຄວນ​ຕ້ອງ​ເປັນ​ນ້ຳ​ສະ­ອາດ ທີ່​ມາ​ຈາກ​ນ້ຳ​ໃສ​ໃຈ​ຈິງ​ທີ່​ມີ​ຕໍ່​ກັນ

    ປະ­ສົມ​ກັບ​ການ​ອວຍ­ພອນ​ທີ່​ສຸ­ພາບ ຖ້າ​ເປັນ​ຜູ້​ໃຫຍ່​ມີ­ໜ້າ​ທີ່​ການ​ງານ​ທີ່​ໜ້າ​ນັບ­ຖື ຫຼື ຜູ້​ອາ­ວຸ­ໂສ ຕະ­ຫຼອດ​ເຖິງ​ພະ­ສົງ​ອົງ­ຄະ​ເຈົ້າ ກໍ​ໜ້າ​ຈະ​ເປັນ​ນ້ຳ­ອົບ​ນ້ຳ​ຫອມ​ກິ່ນ​ເບົາໆ (ຫອມ​ຫຼາຍ​ໂພດ​ກໍ​ລຳ​ຄານ ບາງ​ຄົນ​ກໍ​ແພ້​ຍ້ອນ) ການ​ຫົດ­ສົງ​ກໍ​ເຮັດ​ພໍ­ປະ­ມານ​ໜ້ອຍ ບໍ່​ແມ່ນ​ຈະ​ຖອກ​ເປັນ​ໂອ​ໃສ່ ໃຊ້​ຈອກ​ນ້ອຍໆ​ຫົດ​ກໍ​ງາມ​ຕາ.

    ສິ່ງ​ທີ່​ຄວນ​ປ່ຽນ­ແປງ ແມ່ນ​ການ​ຖອກ​ຫົດ​ແບບ​ຟ້າວ​ຟັ່ງ​ຫົດ​ສາດ​ເປັນ​ຊາມ​ເປັນ​ໂອ​ໃຫຍ່ ຖືກ​ໜ້າ​ຈົນ​ໜ້າ​ປິ່ນ ໂດຍ​ສະ­ເພາະ​ໃຊ້​ແຄມ​ທາງ​ຖະ­ໜົນ​ຕໍ່​ທໍ່​ນ້ຳ​ປະ­ປາ​ອອກ​ຫົດ ຖ້າ​ທາງ​ການ​ເພິ່ນ​ບໍ່​ປິດ​ທາງ​ຖະ­ໜົນ​ໃຫ້​ຫຼີ້ນ ກໍ​ບໍ່​ຄວນ​ລັດ​ຫົດ​ຊະ­ຊາຍ ເພາະ​ເສັ້ນ­ທາງ​ຈາ­ລະ​ຈອນ ແມ່ນ​ຈະ​ຕ້ອງ​ປ່ອຍ​ໃຫ້­ການ​ສັນ­ຈອນ​ເປັນ​ປົກ­ກະ­ຕິ ເຊັ່ນ​ດຽວ​ກັບ​ການ​ເອົາ​ຟຸຍ​ນ້ຳ​ຂື້ນ​ລົດ​ຫາ​ເລາະ​ຫົດ​ຄົນ​ເດີນ­ທາງ ບາງ​ກໍ​ໃຊ້​ຖົງ​ຢາງ​ຮ່າຍ​ນ້ຳ​ໃສ່​ແລ້ວ​ແກວ່ງ​ໃສ່​ຄົນ​ຍ່າງ ຄົນ​ຂີ່​ລົດ ມັນ​ອັນ­ຕະ­ລາຍ​ທີ່​ສຸດ​ສຳ­ລັບ​ຄົນ​ຂີ່​ລົດ­ຈັກ​ລົດ­ຖີບ ບໍ່​ແມ່ນ​ເຫັນ​ເຂົາ​ລຳ­ບາກ​ແລ້ວ​ຕົນ​ຫົວ­ຂວັນ​ຢ່າງ​ມີ​ຄວາມ­ສຸກ. ສຳ­ຄັນ​ຄື​ອຸ­ບັດ­ເຫດ​ຕາມ​ມາ​ຢ່າງ​ບໍ່​ຮູ້­ສຶກ​ຕົວ. ຫຼີກ​ທີ່​ສຸດ​ອີກ​ແມ່ນ​ການ​ນຳ​ໃຊ້​ນ້ຳ​ເປື້ອນ ນ້ຳ​ສີ ແກ່ນ​ຜັກ​ອີ່​ຕູ່​ຫົດ​ຜູ້​ອື່ນ ຫຼື ໃສ່​ສິ່ງ​ຄັນ​ຄາຍ​ອື່ນໆ​ລົງ​ໄປ​ໃນ​ນ້ຳ ຖ້າ​ມີ​ຖື​ວ່າ ນັ້ນ​ເປັນ­ຄວາມ​ຜິດ.

2. ນ້ຳ​ເຫຼົ້າ: ການ​ດື່ມ​ເຫຼົ້າ ດື່ມ​ສຸ­ລາ​ບໍ່​ຮູ້​ກາ­ລະ​ເທ­ສະ ຫຼື ຕັ້ງ​ວົງ​ເຫຼົ້າ​ຢູ່​ແຄມ​ທາງ​ໜ້າ

    ບ້ານ ທັງ​ກິນ ທັງ​ສະ­ຫຼອງ ແລະ ທັງ​ລັດ​ຫົດ​ນ້ຳ​ຄົນ​ຂີ່​ລົດ​ກາຍ​ທາງ ເຫັນ​ວ່າ​ບໍ່​ເປັນ​ການ​ເໝາະ​ສົມ ເປັນ​ການ​ຂາຍ­ໜ້າ​ຂອງ​ການ​ເປັນ​ພົນ­ລະ­ເມືອງ​ທີ່​ບໍ່​ມີ​ລະ­ບຽບ ບາງ​ກໍ­ລະ­ນີ​ເມົາ​ໄດ້​ທີ່​ກໍ​ອອກ​ລັດ​ລົດ​ເພື່ອ​ຫົດ​ນ້ຳ ເຊິ່ງ​ສິ່ງ​ດັ່ງ­ກ່າວ​ເປັນ​ການ​ຝືນ​ຕໍ່​ຄຳ​ແນະ­ນຳ​ຂອງ​ອົງ­ການ​ປົກ­ຄອງ​ທ້ອງ­ຖິ່ນ ເຊິ່ງ​ອາດ​ຈະ​ກາຍ­ເປັນ​ຕົ້ນ­ຕໍ​ຂອງ​ການ ພາ­ໃຫ້​ເກີດ​ອຸ­ບັດ­ເຫດ​ໄດ້.

    ດັ່ງ­ນັ້ນ ໃນ​ສອງ​ນ້ຳ​ນີ້​ຈະ​ກິນ​ຈະ​ໃຊ້​ຂໍ​ໃຫ້​ມີ​ສະ­ຕິ ຕ້ອງ​ມີ​ຈິດ​ສຳ­ນຶກ​ວ່າ​ແນວ​ຕົນ​ມັກ​ຜູ້​ອື່ນ​ບໍ່​ມັກ​ກໍ​ມີ ແລະ ຕ້ອງ​ເຂົ້າ­ໃຈ​ວ່າ​ທັງ​ສອງ​ນ້ຳ​ນີ້​ຕິດ​ພັນ​ກັບ​ບັນ­ຫາ​ເສດ­ຖະ­ກິດ​ທັງ​ນັ້ນ ຖ້າ​ຫຼຸດ­ຜ່ອນ​ຈະ​ເປັນ​ປະ­ໂຫຍດ​ບໍ່​ໜ້ອຍ​ເລີຍ. ປີ​ໃໝ່​ຂໍ​ໃຫ້​ທຸກ​ຄົນ​ໂຊກ​ດີ ມີ​ເງິນ​ໃຊ້ ໄຮ້​ໂລ­ຄາ​ກັນ​ທົ່ວ​ໜ້າ​ເທີ້ນ.

ໂດຍ: ຊຽງ​ເອງ

ຂ່າວທີ່ກ່ຽວຂ້ອງ