ວຽງຈັນ ເອັນດູໂຣ ຊ່ວຍເຄື່ອງກີລາ-ຄອມພິວເຕີ ໃຫ້ບ້ານດອນເງິນ

94 10 ມ.ສ. 2019 ວົງຈອນກີລາ
ວຽງຈັນ ເອັນດູໂຣ ຊ່ວຍເຄື່ອງກີລາ-ຄອມພິວເຕີ ໃຫ້ບ້ານດອນເງິນ

    ທີມ​ງານ​ຂະ​ບວນ​ລົດ­ຈັກ ວຽງ​ຈັນ ເອັນ­ດູ​ໂຣ (Vientiane Enduro) ຈຳ­ນວນ 27 ຄົນ ຮ່ວມ​ແຮງ​ຮ່ວມ​ໃຈ ແລະ ຮ່ວມ​ສາ­ມັກ­ຄີ​ກັນ ນຳ​ເອົາ​ບັນ­ດາ​ເຄື່ອງ​ກີ­ລາ ອຸ­ປະ­ກອນ​ກີ­ລາ ຄອມ​ພິວ​ເຕີ ເຄື່ອງ​ປິ່ນ​ເຕີ ແລະ ອື່ນໆ​ອີກ ທີ່​ສາ­ມາດ​ລະ­ດົມ​ທຶນ​ການ ໄດ້​ຈາກ​ບັນ­ດາ​ສະ­ມາ­ຊິກ ແລະ ບໍ­ລິ­ສັດ ກຸ່ມ​ຄຳ​ໄພ​ຊະ­ນະ ຈຳ­ກັດ​ຜູ້​ດຽວ ລວມ​ມູນ​ຄ່າ 10 ລ້ານ​ກວ່າ​ກີບ ນຳ­ໄປ​ຊ່ວຍ­ເຫຼືອ​ເຂດ​ຫ່າງ​ໄກ​ສອກ­ຫຼີກ ໂດຍ​ສະ­ເພາະ​ບ້ານ​ດອນ​ເງິນ ເມືອງ​ພູ​ຄູນ ແຂວງ​ຫຼວງ​ພະ​ບາງ.

    ທ່ານ ນິ­ຄົມ ພົມ­ມະ­ຈັນ ຮອງ​ຫົວ­ໜ້າ​ທີມ​ງານ​ຂະ​ບວນ​ລົດ­ຈັກ ວຽງ​ຈັນ ເອັນ­ດູ​ໂຣ ລາຍ​ງານ​ໃຫ້​ຮູ້­ເມື່ອ​ບໍ່​ດົນ​ມາ​ນີ້​ວ່າ: ຈຸດ​ເປົ້າ​ໝາຍ​ໃນ​ການ​ເຕົ້າ­ໂຮມ​ທີມ​ງານ​ຂະ​ບວນ​ລົດ­ຈັກ ວຽງ​ຈັນ ເອັນ­ດູ​ໂຣ ໃນ​ຄັ້ງ​ນີ້ ກໍ່​ຍ້ອນ​ວ່າ​ຢາກ​ສ້າງ​ຄວາມ​ສາ­ມັກ­ຄີ​ໃຫ້​ບັນ­ດາ​ສະ­ມາ­ຊິກ ກໍ່​ຄື ກຸ່ມ​ຄົນ​ມັກ​ຮັກ​ສອງ​ລໍ້ ອີກ​ດ້ານ​ໜຶ່ງ​ກໍ່​ຍັງ​ເປັນ​ປຸກ­ລະ­ດົມ​ທຶນ​ການ​ກຸ­ສົນ ເພື່ອ​ຈະ​ນຳ­ໄປ​ຊ່ວຍ­ເຫຼືອ​ບັນ­ດາ​ພາກ­ສ່ວນ​ທີ່­ຢູ່​ຫ່າງ​ໄກ​ສອກ­ຫຼີກ ທີ່​ຂາດ­ເຂີນ​ດ້ານ​ອຸ­ປະ­ກອນ​ກິ­ລາ ແລະ ອື່ນໆ​ອີກ ຕະ­ຫຼອດ​ໄລ­ຍະ​ທີ່​ຜ່ານ​ມາ ພວກ​ເຮົາ​ສາ­ມາດ​ຈັດ​ຕັ້ງ​ປະ­ຕິ­ບັດ​ຕາມ​ແນວ­ທາງ​ນະ­ໂຍ­ບາຍ​ຂອງ​ທີມ ຢ່າງ​ມີ​ຜົນ­ສຳ­ເລັດ​ດ້ວຍ​ຄວາມ​ພາກ­ພູມ​ໃຈ ເປັນ­ຕົ້ນ​ແມ່ນ​ເມື່ອ​ເດືອນ​ກຸມ­ພາ​ຜ່ານ​ມາ ທີມ​ງານ​ພວກ​ເຮົາ​ສາ­ມາດ​ຮ່ວມ​ແຮງ​ຮ່ວມ​ໃຈ​ກັນ​ອອກ​ເດີນ­ທາງ​ດ້ວຍ​ລົດ­ຈັກ ແຕ່​ວຽງ​ຈັນ-ບ້ານ​ນ້ຳ​ງີມ ປະ­ມານ 355 ກິ­ໂລ­ແມັດ ໄປ​ບໍ­ລິ­ຈາກ​ເງິນ​ສົມ­ທົບ​ຊ່ວຍ­ເຫຼືອ​ປຸກ​ສ້າງ ໂຮງ­ຮຽນ​ປະ­ຖົມ​ສຶກ​ສາ ບ້ານ​ນ້ຳ​ງີມ ເມືອງ​ພຽງ ແຂວງ​ໄຊ​ຍະ​ບູ​ລີ ໃນ​ມູນ​ຄ່າ 7.5 ລ້ານ​ກີບ ແລະ ເງິນ​ຈຳ­ນວນ​ດັ່ງ­ກ່າວ​ທີ່​ນຳ­ໄປ​ປະ­ກອບ­ສ່ວນ​ໃນ​ຄັ້ງ​ນີ້ ກໍ່​ແມ່ນ​ໄດ້​ຈາກ​ນ້ຳ­ໃຈ​ຂອງ​ສະ­ມາ­ຊິກ​ພາຍ​ໃນ​ທີມ​ງານ ແລະ ບໍ­ລິ­ສັດ ກຸ່ມ​ຄຳ​ໄພ​ຊະ­ນະ ຮ່ວມ​ກັນ​ໂດຍ​ຕາງ­ໜ້າ​ມອບ​ຂອງ​ທ່ານ ວັນ​ໄຊ​ຍາ ຫຼວງ​ໄຊ ຫົວ­ໜ້າ​ທີມ ວຽງ​ຈັນ ເອັນ­ດູ​ໂຣ.

    ແນວ­ໃດ​ກໍ່​ດີ ໃນ­ຕໍ່­ໜ້າ​ທີມ​ງານ​ພວກ​ເຮົາ ຍັງ​ຈະ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ແນວ­ທາງ​ນະ­ໂຍ­ບາຍ​ຂອງ​ທີມ ເພື່ອ​ຊ່ວຍ­ເຫຼືອ​ສັງ­ຄົມ​ຜູ້​ທຸກ​ຍາກ​ທີ່​ຫ່າງ​ໄກ​ສອກ­ຫຼີກ​ໃຫ້​ໄດ້​ຢ່າງ​ທົ່ວ​ເຖິງ ແລະ ຕໍ່​ເນື່ອງ ທຸກໆ​ຄັ້ງ​ທີ່​ອອກ​ເດີນ­ທາງ ກໍ່​ຈະ​ໄດ້​ຕິດ­ຕາມ​ບັນ­ດາ​ໂຮງ­ຮຽນ ບ້ານ ແລະ ອື່ນໆ​ທີ່​ທູກ​ຍາກ​ແທ້ໆ ຊ່ວຍ­ເຫຼືອ​ເຂົາ­ເຈົ້າ​ໄດ້​ມີ​ໂອ­ກາດ​ນຳ​ໃຊ້​ເຄື່ອງ​ເລົ່າ​ນີ້ ໃຫ້​ຄື​ກັບ​ສັງ­ຄົມ​ໃນ​ເມືອງ ໂດຍ​ສະ­ເພາະ​ໃນ​ເດືອນ​ສິງ­ຫາ​ນີ້ ຈະ​ສືບ­ຕໍ່​ນຳ​ເອົາ​ເຄື່ອງ​ກີ­ລາ ອຸ­ປະ­ກອນ​ກີ­ລາ ເຄື່ອງ​ຄອມ​ພີມ​ເຕີ້ ເຄື່ອງ​ປິ່ນ​ເຕີ ແລະ ອື່ນໆ​ອີກ ໄປ​ມອບ​ໃຫ້​ໂຮງ­ຮຽນ​ປະ­ຖົມ​ສຶກ​ສາ ບ້ານ​ນ້ຳ​ງີມ ເມືອງ​ພຽງ ແຂວງ​ໄຊ​ຍະ​ບູ​ລີ ຕື່ມ​ອີກ.

ຂ່າວທີ່ກ່ຽວຂ້ອງ