ແຂ່ງຂັນຍິງປືນ ສະຫຼອງວັນສ້າງຕັ້ງກໍາລັງ ປກສ ຄົບຮອບ 58 ປີ

138 10 ມ.ສ. 2019 ວົງຈອນກີລາ
ແຂ່ງຂັນຍິງປືນ ສະຫຼອງວັນສ້າງຕັ້ງກໍາລັງ ປກສ ຄົບຮອບ 58 ປີ

    ກະ­ຊວງ​ປ້ອງ​ກັນ​ຄວາມ​ສະ­ຫງົບ (ປກສ) ສຳ­ເລັດ​ການ​ແຂ່ງ­ຂັນ​ກີ­ລາ​ຍິງ​ປຶນ ຊີງ​ຂັນ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ກຳ­ລັງ​ປ້ອງ​ກັນ​ຄວາມ​ສະ­ຫງົບ ຄົບ­ຮອບ 58 ປີ (5 ເມ­ສາ1961-5 ເມ­ສາ2019) ເມື່ອ​ວັນ​ທີ 6 ເມ­ສາ 2019 ຜ່ານ​ມາ ທີ່​ສະ­ໜາມ​ເຝິກ­ຊ້ອມ​ກີ­ລາ​ຍິງ​ປືນ 5 ເມ­ສາ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ພົນ​ເອກ ຈັນ​ສະ­ໝອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ແລະ ທ່ານ ພົນ​ໂທ ວິ­ໄລ ຫຼ້າ​ຄຳ​ຟອງ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ-ຮອງ​ລັດ­ຖະ­ມົນ­ຕີ​ຈາກ 18 ກະ­ຊວງ ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ແລະ ອົງ­ການ​ທຽບ​ເທົ່າ 20 ພາກ­ສ່ວນ ຫົວ­ໜ້າ​ກົມ-ຮອງ​ກົມ ແລະ ນັກ­ກີ­ລາ​ເຂົ້າ​ຮ່ວມ.

    ການ​ແຂ່ງ­ຂັນ​ກີ­ລາ​ຍິງ​ປືນ​ຄັ້ງ​ນີ້ ແມ່ນ​ແຂ່ງ­ຂັນ​ກັນ​ພຽງ​ມື້​ດຽວ ແຂ່ງ­ຂັນ​ກັນ​ຢູ່ 2 ລະ­ດັບ ປະ­ກອບ​ມີ ລະ­ດັບ​ວີ​ໄອ​ພີ 1 ແລະ ວີ​ໄອ​ພີ 2 ກຳ­ນົດ​ໄລ­ຍະ​ການ​ຍິງ 15 ແມັດ ຍິງ ຈຳ­ນວນ 10 ລູກ ຄະ­ແນນ​ເຕັມ 100 ຄະ­ແນນ ຜ່ານ​ການ​ແຂ່ງ­ຂັນ ຜົນ​ປາ­ກົດ​ວ່າ ລະ­ດັບ​ວີ​ໄອ​ພີ 1 ອັນ​ດັບ​ທີ 1 ທ່ານ ຖະ­ໜອມ ທຳ​ທອງ ເຈົ້າ­ເມືອງ​ໄຊ​ເຊດ​ຖາ ອັນ​ດັບ​ທີ 2 ທ່ານ​ນາງ ສາຍ­ສະ­ໝອນ ຈັນ­ທະ​ຈັກ ປະ­ທານ​ສະ­ຫະ­ພັນ​ຮຸ່ນ​ລາວ ແລະ ອັນ​ດັບ​ທີ 3 ທ່ານ ສອນ​ທະ­ນູ ທຳ​ມະ​ວົງ ປະ­ທານ​ສະ​ຖາ​ບັນ​ວິ­ທະ­ຍາ­ສາດ​ສັງ­ຄົມ​ແຫ່ງ​ຊາດ ສ່ວນ​ລະ­ດັບ​ວີ​ໄອ​ພີ 2 ອັນ​ດັບ​ທີ 1 ທ່ານ ພົນ​ໂທ ສົມ​ຫວັງ ທຳ​ມະ​ສິດ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ອັນ​ດັບ​ທີ 2 ທ່ານ ພົນ​ຈັດ­ຕະ­ວາ ດວງ­ປີ ດາ​ມະ­ນີ​ວົງ ຫົວ­ໜ້າ​ກົມ​ກວດ­ກາ-ກວດ​ການ ແລະ ອັນ​ດັບ​ທີ 3 ທ່ານ ພັນ​ເອກ ມາ­ລາ ວິ­ລະ​ຈິດ ຫົວ­ໜ້າ​ກົມ​ຄົ້ນ­ຄວ້າ​ວິ­ທະ­ຍາ­ສາດ-ປະ­ຫວັດ­ສາດ.

ຂ່າວທີ່ກ່ຽວຂ້ອງ