ດາວມະຍຸລີ ຖືກບັນຈຸເຂົ້າເປັນນັກຊົກມວຍສາກົນອາຊີບ

197 11 ມ.ສ. 2019 ວົງຈອນກີລາ
ດາວມະຍຸລີ ຖືກບັນຈຸເຂົ້າເປັນນັກຊົກມວຍສາກົນອາຊີບ

    ນາງ ດາວ​ມະ­ຍຸ­ລີ ຈັນ​ທິ​ລາດ ຫຼື ນ້ອງ​ດີ້​ສາວ​ລາວ ເຈົ້າ​ຂອງ​ສາຍ­ແອວ​ແຊັມ​ມວຍ​ໂລກ ຄັ້ງ​ທີ 2 ກາຍ­ເປັນ​ແມ່­ຍິງ​ຄົນ​ທຳ​ອິດ​ຂອງ ສປປ ລາວ ໃນ​ຮຸ່ນ​ນ້ຳ­ໜັກ 50 ກິ​ໂລ ຖືກ​ບັນ­ຈຸ​ເຂົ້າ​ເປັນ​ນັກ­ຊົກ­ມວຍ​ສາ­ກົນ​ອາ­ຊີບ​ຂອງ​ສະ­ພາ​ມວຍ​ໂລກ​ແຫ່ງ​ອາ­ຊີ ຫຼື WBC Asia ຢ່າງ​ເປັນ​ທາງ​ການ ກ່ອນ​ຈະ​ກຽມ​ຄວາມ​ພ້ອມ​ເຂົ້າ​ຮ່ວມ​ແຂ່ງ­ຂັນ​ມວຍ​ສາ­ກົນ ຊີງ​ແຊັມ​ອາ­ຊີ ທີ່​ບາງ­ກອກ ປະ­ເທດ​ໄທ ຮັບ​ກຽດ​ເຈົ້າ­ພາບ ໃນ​ກາງ​ເດືອນ​ເມ­ສາ​ນີ້.

    ອີງ​ຕາມ​ລາຍ​ງານ​ຂອງ​ທ່ານ ຊາ​ຟາ ອານ​ລະ​ມາ​ຊູ​ດີ ຄູ​ເຝິກ​ຊາວ​ນອກ​ແວ ໃຫ້​ຊາບ​ວ່າ: ຍ້ອນ​ມີ​ການ​ນຳ­ພາ ນ້ອງ​ດີ້​ສາວ​ລາວ ເຄື່ອນ​ໄຫວ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ​ທັງ​ພາຍ​ໃນ ແລະ ຕ່າງ­ປະ­ເທດ ຕະ­ຫຼອດ ໂດຍ​ສະ­ເພາະ​ໃນ​ປີ 2018 ຜ່ານ​ມາ ສະ­ພາ​ມວຍ​ໂລກ​ແຫ່ງ​ອາ­ຊີ ເຫັນ​ເຖິງ​ຜົນ­ງານ ແລະ ພອນ​ສະ­ຫວັນ​ຂອງ​ນ້ອງ​ດີ້ ທີ່​ຂຶ້ນ​ຊົກ ຈຶ່ງ​ໄດ້​ທາບ​ທາມ​ໃຫ້​ເຂົ້າ​ຮ່ວມ​ແຂ່ງ­ຂັນ​ມວຍ​ສາ­ກົນ​ອາ­ຊີບ ໃນ​ຮຸ່ນ​ນ້ຳ­ໜັກ 51 ກິ​ໂລ ຈັດ​ຂຶ້ນ​ໃນ​ວັນ​ທີ 7 ເມ­ສາ 2019 ທີ່​ແຂວງ​ພັດ​ທະ​ຍາ ປະ­ເທດ​ໄທ ພົບ​ກັບ​ນັກ​ຊົກ​ສາວ​ຂວັນ​ໃຈ​ເຈົ້າ​ຖິ່ນ ແລະ ສາ­ມາດ​ເອົາ​ຊະ­ນະ​ຄະ­ແນນ​ນັກ​ຊົກ​ຂວັນ​ໃຈ​ເຈົ້າ​ຖິ່ນ ໄປ​ດ້ວຍ​ຄະ­ແນນ​ຢ່າງ​ເອກ​ກະ­ສັນ ແລະ ຂາວ​ສະ­ອາດ ພ້ອມ​ທັງ​ຖືກ​ສະ­ພາ​ມວຍ​ແຫ່ງ​ອາ­ຊີ ບັນ­ຈຸ​ເຂົ້າ​ເປັນ​ນັກ­ຊົກ­ມວຍ​ສາ­ກົນ​ອາ­ຊີບ ຢ່າງ​ເປັນ​ທາງ​ການ ແນວ­ໃດ​ກໍ​ດີ ນ້ອງ​ດີ້ ຈະ​ຕ້ອງ​ສືບ­ຕໍ່​ກັບ­ເຂົ້າ​ນອນ​ສູນ ທີ່​ສູນ​ເຝິກ​ກີ­ລາ​ແຫ່ງ​ຊາດ​ໄທ ແຂວງ​ນະ­ຄອນ​ຣາ​ຊະ​ສີ­ມາ ເພື່ອ​ກຽມ​ຄວາມ​ພ້ອມ​ເຂົ້າ​ຮ່ວມ​ແຂ່ງ­ຂັນ​ມວຍ​ສາ­ກົນ​ຊີງ​ແຊັມ​ອາ­ຊີ ທີ່​ນະ­ຄອນ­ຫຼວງ​ບາງ­ກອກ ປະ­ເທດ​ໄທ ຮັບ​ກຽດ​ເຈົ້າ­ພາບ ໃນ​ກາງ​ເດືອນ​ເມ­ສາ​ນີ້.

    ນາງ ດາວ​ມະ­ຍຸ­ລີ ຈັນ​ທິ​ລາດ ໃຫ້​ສຳ­ພາດ​ວ່າ: ຕ້ອງ​ຂໍ​ຍອມ­ຮັບ​ວ່າ​ໄລ­ຍະ​ນີ້ ນ້ອງ​ຊ້ອມ​ໜັກ​ຂຶ້ນ​ຫຼາຍ ແລະ ກໍ​ມີ​ອຸ­ປະ­ສັກ​ຫຼາຍ​ຢ່າງ​ທີ່​ຕ້ອງ​ໄດ້​ຜ່ານ​ຜ່າ ແຕ່​ກໍ​ພູມ­ໃຈ​ທີ່​ສຸດ​ທີ່​ນ້ອງ​ເປັນ​ສ່ວນ​ໜຶ່ງ​ໄດ້​ສ້າງ​ກຽດ ແລະ ຊື່​ສຽງ​ໃຫ້​ແກ່​ປະ­ເທດ​ຊາດ ເປົ້າ​ໝາຍ​ຕໍ່​ໄປ ຈະ​ຂໍ​ສູ້​ຊົນ​ຢ່າງ​ສຸດ​ຄວາມ​ສາ­ມາດ ເພື່ອ​ຫວັງ​ຢາກ​ສ້າງ​ຜົນ­ງານ​ໃຫ້​ປະ­ເທດ​ຊາດ​ອີກ​ຄັ້ງ ໃນ​ການ​ເຂົ້າ​ຮ່ວມ​ແຂ່ງ­ຂັນ​ມວຍ​ສາ­ກົນ ຊີງ​ແຊັມ​ອາ­ຊີ ເຊິ່ງ​ຈະ​ຈັດ​ຂຶ້ນ​ໃນ​ມໍ່ໆ​ນີ້ ອີກ​ຢ່າງ​ລາຍ­ການ​ນີ້ ກໍ​ເປັນ​ການ​ຕໍ່​ຍອດ​ສ້າງ​ເງື່ອນ­ໄຂ ແລະ ປະ­ສົບ​ການ​ທີ່​ດີ ເພື່ອ​ນຳ­ໄປ​ພັດ­ທະ­ນາ​ຕົນ​ເອງ​ສາ­ມາດ​ຮັບ­ປະ­ກັນ​ໃນ​ການ​ລ່າ​ຫຼຽນ​ຄຳ ໃນ​ງານ​ກີ­ລາ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ ເປັນ​ເຈົ້າ­ພາບ ໃນ​ທ້າຍ​ປີ​ນີ້.

ຂ່າວທີ່ກ່ຽວຂ້ອງ