ຄິວລົດສາຍເໜືອ ພ້ອມທຸກດ້ານຮອງຮັບຜູ້ໂດຍສານໄລຍະບຸນປີໃໝ່ລາວ

329 11 ມ.ສ. 2019 ຂ່າວໜ້າ​ໜຶ່ງ
ຄິວລົດສາຍເໜືອ ພ້ອມທຸກດ້ານຮອງຮັບຜູ້ໂດຍສານໄລຍະບຸນປີໃໝ່ລາວ

    ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ເໜືອ​ພາຍ​ໃນ ແລະ ຕ່າງ­ປະ­ເທດ ກຽມ­ພ້ອມ​ທຸກ​ດ້ານ​ເພື່ອ​ຮອງ​ຮັບ​ຜູ້­ໂດຍ­ສານ ໃນ​ໄລ­ຍະ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ພສ 2662 ໂດຍ​ສະ­ເພາະ ໄດ້​ເພີ່ມ​ຈຳ­ນວນ​ລົດ​ໂດຍ­ສານ​ແຕ່​ລະ​ສາຍ​ທາງ​ຂຶ້ນ​ເທົ່າ​ຕົວ ກວດ­ກາ​ເຕັກ­ນິກ​ລົດ ແລະ ໂຊ​ເຟີ​ທີ່​ຊຳ­ນານ​ທາງ​ເພື່ອ​ຕອບ​ສະ­ໜອງ​ລົດ​ໃຫ້​ພຽງ­ພໍ​ແກ່​ຜູ້­ໂດຍ­ສານ ແລະ ບໍ່​ໃຫ້​ມີ​ຄົນ​ຜູ້­ໂດຍ­ສານ​ຕົກ​ຄ້າງ.

    ທ່ານ​ນາງ ຈິດ​ປະ­ສົງ ຫຼວງ​ເດດ​ມີ​ໄຊ ຜູ້­ອຳ­ນວຍ­ການ​ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ເໜືອ ພາຍ​ໃນ ແລະ ຕ່າງ­ປະ­ເທດ ໃຫ້​ສຳ­ພາດ​ວັນ​ທີ 9 ເມ­ສາ 2019 ວ່າ: ເພື່ອ​ເປັນ​ການ​ອຳ­ນວຍ​ຄວາມ​ສະ­ດວກ​ໃຫ້​ຜູ້­ໂດຍ­ສານ​ພາຍ​ໃນ ແລະ ຕ່າງ­ປະ­ເທດ ທີ່​ຈະ​ເດີນ­ທາງ​ກັບ​ບ້ານ ຫຼື ໄປ​ທ່ອງ​ທ່ຽວ​ຢູ່​ແຂວງ​ຕ່າງໆ​ຢ່າງ​ພຽງ­ພໍ ແລະ ທັນ​ກັບ​ຄວາມ​ຕ້ອງ­ການ​ໃນ​ໄລ­ຍະ​ປີ​ໃໝ່​ລາວ ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ເໜືອ ພາຍ​ໃນ ແລະ ຕ່າງ­ປະ­ເທດ ໄດ້​ຮ່ວມ​ກັບ​ບັນ­ດາ​ບໍ­ລິ­ສັດ​ທີ່​ມາ​ນຳ​ໃຊ້​ສະ­ຖາ­ນີ​ສາຍ​ເໜືອ ໄດ້​ກຽມ­ພ້ອມ​ຂົນ­ສົ່ງ​ຜູ້­ໂດຍ­ສານ ດ້ວຍ​ການ​ເພີ່ມ​ຈຳ­ນວນ​ຖ້ຽວ​ລົດ​ທຸກ​ສາຍ​ທາງ​ເທົ່າ​ຕົວ ໂດຍ​ບໍ່​ຂຶ້ນ​ລາ­ຄາ​ແຕ່­ໃດໆ ພ້ອມ​ທັງ​ໄດ້​ມີ​ການ​ກວດ​ເຊັກ​ລົດ​ໂດຍ­ສານ​ທຸກ​ຄັນ ແລະ ມີ​ໂຊ​ເຟີ​ລົດ​ທີ່​ຊຳ­ນານ​ທາງ​ເປັນ​ຢ່າງ​ດີ ສະ­ນັ້ນ ຜູ້­ໂດຍ­ສານ​ທີ່​ມີ​ຈຸດ­ປະ­ສົງ​ທີ່​ຈະ​ເດີນ­ທາງ​ໄປ​ແຂວງ​ຕ່າງໆ ຂໍ​ຮຽກ­ຮ້ອງ​ໃຫ້​ມາ​ຊື້​ປີ້ ແລະ ຂຶ້ນ​ລົດ​ຢູ່​ສະ­ຖາ­ນີ ເພື່ອ​ຮັບ­ປະ­ກັນ​ການ​ຂຶ້ນ​ລົດ​ຜິດ ໄດ້​ນັ່ງ​ຕັ່ງ​ເສີມ ແລະ ອື່ນໆ.

    ໂອ­ກາດ​ດຽວ​ກັນ​ນີ້ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ ຍັງ​ໄດ້​ຮ່ວມ​ກັບ​ສະ­ຖາ­ນີ​ຂົນ­ສົ່ງ​ໂດຍ­ສານ​ສາຍ​ເໜືອ​ພາຍ​ໃນ ແລະ ຕ່າງ­ປະ­ເທດ ຈັດ​ເຜີຍ­ແຜ່​ກົດ​ລະ­ບຽບ​ຈະ­ລາ­ຈອນ ແລະ ຫຼັກ­ການ​ຂັບ​ຂີ່​ປອດ​ໄພ​ໃນ​ໄລ­ຍະ​ປີ​ໃໝ່​ລາວ ໃຫ້​ບັນ­ດາ​ຜູ້​ປະ­ກອບ​ການ​ຂົນ­ສົ່ງ​ໂດຍ­ສານ ແລະ ໂຊ​ເຟີ​ລົດ ຢູ່​ສະ­ຖາ­ນີ​ຂົນ­ສົ່ງ​ດັ່ງ­ກ່າວ ເພື່ອ​ເຮັດ​ໃຫ້­ການ​ຈະ­ລາ­ຈອນ​ຕາມ​ທາງ​ຫຼວງ ໃນ​ຂອບ​ເຂດ​ທົ່ວ​ປະ­ເທດ ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ມີ​ຄວາມ​ປອດ​ໄພ ແລະ ຫຼຸດ­ຜ່ອນ​ການ​ເກີດ​ອຸ­ບັດ­ເຫດ​ທີ່​ອາດ​ຈະ​ເກີດ​ຂຶ້ນ.

ຂ່າວທີ່ກ່ຽວຂ້ອງ