ສະຫຼອງການນຳໃຊ້ລະບົບສາຍພານ ໃນວຽກງານກໍ່ສ້າງເຂື່ອນໄຟຟ້ານ້ຳເທີນ 1

258 11 ມ.ສ. 2019 ຂ່າວໜ້າ​ໜຶ່ງ
ສະຫຼອງການນຳໃຊ້ລະບົບສາຍພານ ໃນວຽກງານກໍ່ສ້າງເຂື່ອນໄຟຟ້ານ້ຳເທີນ 1

    ບໍ­ລິ­ສັດ ໄຟ­ຟ້າ​ນ້ຳ​ເທີນ 1 ຈຳ­ກັດ ຈັດ​ພິ­ທີ​ສະ­ເຫຼີມ­ສະ­ຫຼອງ ການ​ນຳ​ໃຊ້​ລະ­ບົບ​ສາຍ­ພານ​ໃນ​ວຽກ​ງານ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ​ເທີນ 1 ຂຶ້ນ​ວັນ​ທີ 10 ເມ­ສາ 2019 ຢູ່​ພາກ​ສະ­ໜາມ​ຂອງ​ໂຄງ­ການ ເມືອງ​ປາກ​ກະ­ດິງ ແຂວງ​ບໍ​ລິ​ຄຳ​ໄຊ ໂດຍ​ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ທ່ານ ກອງ​ແກ້ວ ໄຊ​ສົງ­ຄາມ ເຈົ້າ­ແຂວງ​ບໍ​ລິ​ຄຳ​ໄຊ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພອນ​ສັກ ວິ­ໄລ​ສັກ ປະ­ທານ​ສະ­ພາ​ບໍ­ລິ­ຫານ​ຂອງ​ບໍ­ລິ­ສັດ ໄຟ­ຟ້າ​ນ້ຳ​ເທີນ 1 ຈຳ­ກັດ ກ່າວ​ວ່າ: ລະ­ບົບ​ສາຍ­ພານ​ນີ້ ຈະ​ຊ່ວຍ​ເລັ່ງ​ຄວາມ​ໄວ​ໃນ​ການ​ເທ​ເບ​ຕົງ​ອັດ​ແຮງ (RCC) ໃສ່​ຕົວ​ເຂື່ອນ​ໃຫ້​ໄວ​ຂຶ້ນ ເຮັດ​ໃຫ້­ການ​ກໍ່­ສ້າງ​ຕົວ​ເຂື່ອນ​ສຳ­ເລັດ​ຕາມ​ເວ­ລາ​ທີ່​ກຳ­ນົດ​ໄວ້ ເຊິ່ງ​ແມ່ນ​ຄວາມ​ຕັ້ງ­ໃຈ ແລະ ຄວາມ​ຄາດ​ຫວັງ​ອັນ​ສູງ​ສົ່ງ​ຂອງ​ພວກ​ເຮົາ ທີ່​ຕ້ອງ­ການ​ຈະ​ສ້າງ ແລະ ທຳ­ລາຍ​ສະ­ຖິ­ຕິ​ຂອງ​ການ​ເທ RCC ໃນ​ອາ­ຊີ ເຊິ່ງ​ປັດ­ຈຸ­ບັນ​ຢູ່ ສປ ຈີນ (18.000 ແມັດ​ກ້ອນ ພາຍ​ໃນ 24 ຊົ່ວ­ໂມງ) ພ້ອມ​ນີ້​ເຂື່ອນ RCC ຂອງ​ໂຄງ­ການ​ໄຟ­ຟ້າ​ນ້ຳ​ເທີນ 1 ຈະ​ເປັນ​ເຂື່ອນ​ໄຟ­ຟ້າ​ເບ​ຕົງ​ອັດ​ແຮງ​ທີ່​ສູງ​ທີ່​ສຸດ ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້.

    ໂດຍ​ການ​ນຳ​ໃຊ້​ໂຮງ­ງານ​ປະ­ສົມ​ເບ​ຕົງ​ມີ​ກຳ­ລັງ​ທີ່​ຜະ­ລິດ 1.000 ແມັດ​ກ້ອນ​ຕໍ່​ຊົ່ວ­ໂມງ ພ້ອມ​ດ້ວຍ​ລະ­ບົບ​ສາຍ­ພານ ທີ່​ສາ­ມາດ​ລຳ­ລຽງ​ການ​ຜະ­ລິດ​ໄດ້​ສູງ ຂ້າ­ພະ­ເຈົ້າ​ເຊື່ອ​ໝັ້ນ​ວ່າ ພວກ​ເຮົາ​ມີ​ຄວາມ​ສາ­ມາດ​ທີ່​ຈະ​ບັນ­ລຸ​ເປົ້າ​ໝາຍ​ນີ້ ໄດ້​ເນື່ອງ​ຈາກ​ມີ​ບໍ­ລິ­ສັດ​ທີ່​ມີ​ປະ­ສົບ​ປະ­ການ ແລະ ຊື່​ສຽງ​ໂດ່ງ​ດັງ​ໃນ​ການ​ກໍ່­ສ້າງ​ເຂື່ອນ RCC ເປັນ​ຜູ້​ຮັບ​ເໝົາ ເຊັ່ນ: ບໍ­ລິ­ສັດ ຊີ​ເອັມ​ຊີ​ດິ​ລາ​ເວັນ​ນາ (ປະ­ເທດ​ອີ​ຕາ​ລີ) ຮ່ວມ​ມື​ກັບ​ບໍ­ລິ­ສັດ ອີ​ຕາ​ລຽນ-ໄທ ຈຳ­ກັດ​ມະ­ຫາ­ຊົນ (ປະ­ເທດ​ໄທ) ແລະ ບໍ­ລິ­ສັດ ຊອງ​ດາ​ຄໍ​ເພີ​ເຣ​ເຊິນ (ປະ­ເທດ​ຫວຽດ­ນາມ) ເຊິ່ງ​ບັນ­ດາ​ບໍ­ລິ­ສັດ​ດັ່ງ­ກ່າວ ລ້ວນ​ແຕ່​ມີ​ບົດ­ບາດ​ສຳ­ຄັນ​ຢ່າງ​ຍິ່ງ ໃນ​ການ​ເຮັດ​ໃຫ້​ເປົ້າ​ໝາຍ​ຂອງ​ພວກ​ເຮົາ​ບັນ­ລຸ​ຜົນ​ຕາມ​ຄາດ­ໝາຍ ນອກ​ນີ້ ຍັງ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ວິ­ສະ­ວະ­ກອນ ທີ່​ມີ​ຄວາມ​ຮູ້​ຄວາມ​ສາ­ມາດ ໃນ​ການ​ກໍ່­ສ້າງ​ເຂື່ອນ​ໄຟ­ຟ້າ​ພະ­ລັງ­ງານ​ນ້ຳ​ຄື: ບໍ­ລິ­ສັດ ພອຍ​ລີ​ອີ​ເນີ​ຈີ (ປະ­ເທດ​ສະ​ວິດ) ເຊິ່ງ​ໄດ້​ເຮັດ​ວຽກ​ຄຽງ​ບ່າ​ຄຽງ​ໄຫຼ່​ກັບ​ບັນ­ດາ​ບໍ­ລິ­ສັດ​ຜູ້​ຮັບ​ເໝົາ ເພື່ອ​ພ້ອມ​ກັນ​ກໍ່­ສ້າງ​ໂຄງ­ການ​ໃຫ້​ສຳ­ເລັດ​ຕາມ​ເປົ້າ​ໝາຍ ແຕ່​ໂຄງ­ການ​ເຂື່ອນ​ໄຟ­ຟ້າ​ນ້ຳ​ເທີນ 1 ຈະ​ບໍ່​ສາ­ມາດ​ປະ­ສົບ​ຜົນ­ສຳ­ເລັດ​ໄດ້ ຖ້າ​ປາ­ສະ­ຈາກ​ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ຈາກ​ລັດ­ຖະ­ບານ​ລາວ ໂດຍ​ສະ­ເພາະ ກະ­ຊວງ​ພະ­ລັງ­ງານ ແລະ ບໍ່​ແຮ່ ອຳ­ນາດ​ການ​ປົກ­ຄອງ​ແຂວງ ແລະ ພາກ­ສ່ວນ​ອື່ນໆ​ທີ່​ກ່ຽວ­ຂ້ອງ.

    ເຂື່ອນ​ໄຟ­ຟ້າ​ນ້ຳ​ເທີນ 1 ຕັ້ງ​ຢູ່​ນ້ຳ​ກະ­ດິງ ມີ​ຄວາມ​ສູງ 177 ແມັດ ຍາວ 771 ແມັດ ສັນ​ເຂື່ອນ​ກວ້າງ 8 ແມັດ ບໍ​ລິ​ມາດ​ໂຕ​ເຂື່ອນ 3,8 ລ້ານ​ແມັດ​ກ້ອນ ບໍ​ລິ​ມາດ​ນ້ຳ​ໃນ​ອ່າງ 3 ຕື້​ແມັດ​ກ້ອນ ກຳ­ລັງ​ການ​ຜະ­ລິດ 650 ເມ​ກາ​ວັດ ມູນ​ຄ່າ​ການ​ກໍ່­ສ້າງ 1.335 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 11.533 ຕື້​ກີບ ປັດ­ຈຸ­ບັນ​ໂຄງ­ການ​ມີ​ຄວາມ​ຄືບ​ໜ້າ 50% ແລະ ຄາດ​ວ່າ​ຈະ​ສຳ­ເລັດ​ໃນ​ທ້າຍ​ປີ 2021 ໂດຍ​ພະ­ລັງ­ງານ​ຈະ​ຂາຍ​ໃຫ້­ການ​ໄຟ­ຟ້າ​ຝ່າຍ​ຜະ­ລິດ​ແຫ່ງ​ປະ­ເທດ​ໄທ 80% ແລະ ລັດ​ວິ​ສະ­ຫະ​ກິດ​ໄຟ­ຟ້າ​ລາວ 20%.

ຂ່າວທີ່ກ່ຽວຂ້ອງ