ຕະຫຼາດໄຮຄຳຂາຍຍົກ ຢືນຢັນບຸນປີໃໝ່ລາວ ສິນຄ້າຈະບໍ່ຂຶ້ນລາຄາ ແລະ ຂາດຕະຫຼາດ

272 12 ມ.ສ. 2019 ຂ່າວໜ້າ​ໜຶ່ງ
ຕະຫຼາດໄຮຄຳຂາຍຍົກ ຢືນຢັນບຸນປີໃໝ່ລາວ ສິນຄ້າຈະບໍ່ຂຶ້ນລາຄາ ແລະ ຂາດຕະຫຼາດ

    ເພື່ອ​ຮັບ­ປະ­ກັນ​ໃຫ້​ແກ່​ການ​ສະ­ໜອງ​ພືດ​ຜັກ ຊີ້ນ ປາ​ອາ­ຫານ ແລະ ການ​ເອົາ​ລັດ​ເອົາ​ປຽບ​ລູກ​ຄ້າ ກໍ​ຄື ຜູ້​ບໍ­ລິ­ໂພກ​ໃນ​ໄລ­ຍະ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ລາວ ພສ 2562 ຈັດ​ຂຶ້ນ​ໃນ​ວັນ​ທີ 14-16 ເມ­ສາ 2019 ລວມ​ທັງ​ວັນ​ຊົດ​ເຊີຍ​ນັ້ນ ເຈົ້າ​ຂອງ​ຕະ­ຫຼາດ​ຫຼາຍ​ແຫ່ງ​ທົ່ວ​ນະ­ຄອນ­ຫຼວງ​ວຽງ​ຈັນ ກໍ​ໄດ້​ເອົາ­ໃຈ­ໃສ່​ລົງ​ຊຸກ­ຍູ້​ຊາວ​ຄ້າ­ຂາຍ​ທີ່​ຂາຍ­ເຄື່ອງ​ຢູ່​ຕະ­ຫຼາດ​ຂອງ​ຕົນ ໃຫ້​ປະ­ຕິ­ບັດ​ຕາມ​ແຈ້ງ​ການ​ຂອງ​ຂັ້ນ​ເທິງ ກໍ​ຄື ພາກ­ສ່ວນ​ກ່ຽວ­ຂ້ອງ​ຂັ້ນ​ສູນ​ກາງ ແລະ ທ້ອງ­ຖິ່ນ​ຢ່າງ​ເຂັ້ມ​ງວດ ເປັນ­ຕົ້ນ ບໍ່​ໃຫ້​ສວຍ​ໃຊ້​ໂອ­ກາດ​ຂຶ້ນ​ລາ­ຄາ​ສິນ­ຄ້າ​ຕາມ­ໃຈ ໃນ​ນັ້ນ​ກໍ​ມີ​ຕະ­ຫຼາດ​ໄຮ​ຄຳ​ຂາຍ­ຍົກ-ຂາຍ­ຍ່ອຍ ທີ່​ໄດ້​ເອົາ­ໃຈ­ໃສ່​ບັນ­ຫາ​ດັ່ງ­ກ່າວ​ນີ້​ເຊັ່ນ​ດຽວ​ກັນ.

    ທ່ານ​ນາງ ສຸດ­ທິ​ດາ ປຣີ​ຊາ​ຍານ ອຳ­ນວຍ​ການ​ຕະ­ຫຼາດ​ໄຮ​ຄຳ​ຂາຍ­ຍົກ-ຂາຍ­ຍ່ອຍ ໄດ້​ໃຫ້​ສຳ­ພາດ​ວັນ​ທີ 10 ເມ­ສາ 2019 ວ່າ: ຕະ­ຫຼາດ​ໄຮ​ຄຳ​ຂາຍ­ຍົກ-ຂາຍ­ຍ່ອຍ ມີ​ສະ­ຖານ­ທີ່​ຕັ້ງ​ຢູ່​ບ້ານ​ໄຮ​ຄຳ ເມືອງ​ໄຊ​ເຊດ​ຖາ ເປັນ​ຕະ­ຫຼາດ​ຂາຍ­ຍົກ​ແຫ່ງ​ທີ​ສອງ​ຂອງ​ນະ­ຄອນ­ຫຼວງ​ວຽງ​ຈັນ ເປີດ​ເວ­ລາ 3:00 ໂມງ​ເຊົ້າ ແລະ ປິດ​ເວ­ລາ 20:00 ໂມງ​ແລງ ໃນ​ໄລ­ຍະ​ປົກ­ກະ­ຕິ ກໍ​ຄື ໄລ­ຍະ​ບຸນ­ປີ­ໃໝ່​ລາວ ຄະ­ນະ​ອຳ­ນວຍ​ການ​ກໍ​ໄດ້​ແຕ່ງ­ຕັ້ງ​ໃຫ້​ຄະ­ນະ​ຈັດ​ສັນ​ຕະ­ຫຼາດ ລົງ​ແນະ­ນຳ​ໃຫ້​ຊາວ​ຄ້າ­ຂາຍ​ແຕ່​ລະ​ຮ້ານ​ທີ່​ຂາຍ­ເຄື່ອງ​ຢູ່​ຕະ­ຫຼາດ​ໄຮ​ຄຳ ໃຫ້​ກະ­ກຽມ​ສິນ­ຄ້າ​ໄວ້​ພຽງ­ພໍ​ເພື່ອ​ຂາຍ​ໃນ​ໄລ­ຍະ​ບຸນ­ປີ­ໃໝ່​ລາວ ພ້ອມ​ນັ້ນ ກໍ​ບໍ່​ໃຫ້​ສວຍ­ໂອ­ກາດ​ຂຶ້ນ​ລາ­ຄາ​ໃຫ້​ປະ­ຕິ­ບັດ​ຕາມ​ແຈ້ງ​ການ​ຂອງ​ຂັ້ນ​ເທິງ​ທີ່​ໄດ້​ແຈ້ງ​ລົງ​ມາ ແລະ ຜ່ານ​ການ​ລົງ​ໄປ​ແນະ­ນຳ​ຊາວ​ຄ້າ­ຂາຍ​ໃນ 2-3 ວັນ​ຜ່ານ​ມາ ກໍ​ເຫັນ​ວ່າ​ເຂົາ­ເຈົ້າ​ໃຫ້­ການ​ຮ່ວມ​ມື​ເປັນ​ຢ່າງ​ດີ ພ້ອມ​ທີ່​ຈະ​ນຳ​ເອົາ​ສິນ­ຄ້າ​ມາ​ຂາຍ​ຢູ່​ຕະ­ຫຼາດ​ແຫ່ງ​ນີ້ ເປັນ​ປົກ­ກະ­ຕິ​ຖ້າ​ພັກ​ກໍ​ຈະ​ຜັດ­ປ່ຽນ​ກັນ​ພັກ​ບໍ່​ໃຫ້​ເຮັດ​ແບບ​ປີ​ໃໝ່​ແລ້ວ ພາ­ກັນ​ພັກ​ໝົດ​ທຸກ​ຄົນ ຈະ​ເຮັດ​ໃຫ້​ສິນ­ຄ້າ​ຂາດ­ຕະ­ຫຼາດ​ທີ່​ຈະ​ເປັນ​ຜົນ​ກະ­ທົບ​ຕໍ່​ຜູ້​ບໍ­ລິ­ໂພກ ເພື່ອ​ສະ­ດວກ​ໃຫ້​ແກ່​ລູກ​ຄ້າ​ໃນ​ຜ່ານ​ມາ ກໍ​ຄື ໃນ​ປັດ­ຈຸ­ບັນ​ຊາວ​ຄ້າ­ຂາຍ​ໄດ້​ຕິດ​ປ້າຍ​ລາ­ຄາ​ປະ­ເພດ​ຊີ້ນ​ປາ ແລະ ພືດ​ຜັກ​ຈຳ­ນວນ​ໜຶ່ງ ພ້ອມ​ທັງ​ຕິດ​ຕັ້ງ​ຊິງ​ກາງ 8 ໜ່ວຍ​ໄວ້​ທົ່ວ​ຕະ­ຫຼາດ ສ່ວນ​ພືດ​ຜັກ​ທີ່​ຊາວ​ຄ້າ­ຂາຍ​ມາ​ຂາຍ​ຢູ່​ຕະ­ຫຼາດ​ແຫ່ງ​ນີ້ ຕົ້ນ­ຕໍ​ແມ່ນ​ນຳ​ເຂົ້າ​ມາ​ຈາກ​ເມືອງ​ສາ­ລະ​ຄຳ ແຂວງ​ວຽງ​ຈັນ ເມືອງ​ປາກ​ຊ່ອງ ແຂວງ​ຈຳ­ປາ​ສັກ ແລະ ເຂດ​ບ້ານ​ຫ້ອມ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ທີ່​ເປັນ​ປະ­ເພດ​ພືດ​ຜັກ​ຊົນ­ນະ­ບົດ​ມີ​ທັງ​ພືດ​ຜັກ​ປູກ ແລະ ພືດ​ຜັກ​ທຳ​ມະ​ຊາດ​ປອດ​ສານ­ພິດ ທີ່​ປະ­ຊາ­ຊົນ​ເກັບ​ມາ​ຂາຍ​ໃຫ້​ແມ່​ຄ້າ​ຄົນ​ກາງ.

    ໃນ​ໂອ­ກາດ​ນີ້ ທ່ານ​ນາງ ສຸດ­ທິ​ດາ ປຣີ​ຊາ​ຍານ ຍັງ​ເຊີນ­ຊວນ​ຊາວ​ຄ້າ​ຂາຍ­ຍ່ອຍ ແລະ ລູກ​ຄ້າ​ຜູ້​ບໍ­ລິ­ໂພກ​ທົ່ວ​ໄປ ຈົ່ງ​ພ້ອມ​ກັນ​ມາ​ຊື້​ສິນ­ຄ້າ​ຢູ່​ຕະ­ຫຼາດ​ແຫ່ງ​ນີ້ ທີ່​ເປັນ​ຕະ­ຫຼາດ​ຂາຍ­ຍົກ​ລາ­ຄາ​ຈະ​ຖືກ​ກວ່າ​ຂາຍ​ທົ່ວ​ໄປ ແລະ ສິນ­ຄ້າ ກໍ​ມີ​ຫຼາຍ​ຢ່າງ​ໃຫ້​ເລືອກ​ບໍ່​ວ່າ​ຈະ​ເປັນ​ປະ­ເພດ​ພືດ​ຜັກ ຊີ້ນ ປາ ອາ­ຫານ​ທະ­ເລ ໝາກ​ໄມ້ ເຄື່ອງ​ແຫ້ງ ແລະ ອື່ນໆ ໃນ​ໄລ­ຍະ​ປົກ­ກະ­ຕິ ກໍ​ຄື​ໄລ­ຍະ​ມີ​ເທ​ສະ­ການ​ຕ່າງໆ​ມີ​ສິນ­ຄ້າ​ຮອງ​ຮັບ​ເປັນ​ຈຳ­ນວນ​ຫຼາຍ ນອກ​ນີ້ ຕະ­ຫຼາດ​ແຫ່ງ​ນີ້ ຍັງ​ມີ​ສະ­ຖານ­ທີ່​ກວ້າງ­ຂວາງ​ຈອດ​ລົດ​ສະ­ດວກ​ສະ­ບາຍ ແລະ ມີ​ຄວາມ​ສະ­ອາດ.

ຂ່າວທີ່ກ່ຽວຂ້ອງ