ຂ່າວຫຼ້າສຸດ

EU ເຫັນດີຕໍ່ກຳນົດ Brexit ໄປຮອດວັນທີ 31 ຕຸລາ

190 12 ມ.ສ. 2019 ຂ່າວຕ່າງປະເທດ
EU ເຫັນດີຕໍ່ກຳນົດ Brexit ໄປຮອດວັນທີ 31 ຕຸລາ

    ໃນ​ການ​ປະຊຸມ​ເມື່ອ​ຄ່ຳ​ຄືນ​ຂອງ​ວັນ​ທີ 10 ເມສາ​ນີ້ ບັນດາ​ຜູ້ນຳ​ຂອງ​ສະຫະພາບ​ເອີ​ຣົບ (EU) ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ເຍື້ອນ​ກຳນົດ​ການ​ອອກ​ໄປ​ຈາກ EU ຂອງ​ອັງກິດ ໄປ​ຮອດ​ວັນ​ທີ 31 ຕຸລາ​ໜ້າ​ນີ້.

    ນີ້​ເປັນ​ເທື່ອ​ທີ​ສອງ ທີ່ EU ຕໍ່​ກຳນົດ​ເວລາ​ການ​ອອກ​ໄປ​ຈາກ EU ຂອງ​ອັງກິດ ຫຼື​ທີ່​ເອີ້ນ​ວ່າ Brexit ທັງ​ນີ້​ກໍ​ເພື່ອ​ເປັນ​ການ​ຫຼີກເວັ້ນ​ວິ​ກິດ​ການ ທີ່​ອາດ​ຈະ​ເກີດ​ຂຶ້ນ​ໃນ​ກໍລະນີ​ທີ່​ມີ Brexit “ແຂງ”. ເຖິງ​ຢ່າງໃດ​ກໍ​ຕາມ ການ​ຕົກລົງ​ດັ່ງກ່າວ​ຂອງ EU ຍັງ​ຕ້ອງ​ໄດ້​ລໍຖ້າ​ການ​ຍອມຮັບ​ຈາກ​ອັງກິດ​ກ່ອນ.

    ແຈ້ງ​ການ​ຂອງ​ທ່ານ ໂດ​ນາ​​ລ ​ທັສ ປະທານ​ສະພາ​ເອີ​ຣົບ (EC)  ທີ່​ໄດ້​ລົງ​ພິມ​ໃນ​ສື່​ສັງຄົມ  Twitter ລະບຸ​ວ່າ: “EU27 ໄດ້​ເຫັນ​ດີ​ຕໍ່​ກຳນົດ​ຂໍ້ຄວາມ​ທີ 50. ມາ​ບັດ​ນີ້ ຂ້າພະເຈົ້າ ຈະ​ໄດ້​ພົບ​ປະ​ກັບ​ນາຍົກລັດຖະມົນຕີ​ອັງກິດ ເຕ​ເຣ​ຊາ ເມ ເພື່ອ​ປຶກສາ​ຫາລື​ກ່ຽວ​ກັບ​ການ​ຕົກລົງ ຂອງ​ລັດຖະບານ​ອັງກິດ.”

    ຖ້າ​ຫາ​ກວ່າ ນາຍົກລັດຖະມົນຕີ ເມ ເຫັນ​ພ້ອມ​ກັບ​ການ​ຕໍ່​ກຳນົດ​ດັ່ງກ່າວ​ແລ້ວ ອັງກິດ​ຈະ​ຍັງ ຄົງ​ຢູ່​ໃນ EU ໄປ​ຈົດ​ຮອດ​ຫຼັງ​ການ​ເລືອກ​ຕັ້ງ​ລັດ​ຖະ​ສະພາ​ເອີ​ຣົບ (EP) ທີ່​ຄາດ​ວ່າ​ຈະ​ຈັດ​ຂຶ້ນ​ໃນ​ວັນ​ທີ 22 ພຶດສະພາ​ໜ້າ​ນີ້. ດັ່ງນັ້ນ ອັງກິດ​ຈະ​ຕ້ອງ​ໄດ້​ເຂົ້າ​ຮ່ວມ ໃນ​ຂະ​ບວນ​ການ​ເລືອກ​ຕັ້ງ​ດັ່ງກ່າວ.

ຂ່າວທີ່ກ່ຽວຂ້ອງ