ຍອດຜູ້ເສຍຊີວິດຈາກສະພາບນ້ຳຖ້ວມຮ້າຍແຮງໃນອີຣານຂຶ້ນເປັນ 77 ຄົນ

132 12 ມ.ສ. 2019 ຂ່າວຕ່າງປະເທດ
ຍອດຜູ້ເສຍຊີວິດຈາກສະພາບນ້ຳຖ້ວມຮ້າຍແຮງໃນອີຣານຂຶ້ນເປັນ 77 ຄົນ

    ເມື່ອ​ວັນ​ທີ 10 ເມສາ​ນີ້ ເຈົ້າ​ໜ້າທີ່​ອີ​ຣານ ໄດ້​ຊີ້​ນຳ​ໃຫ້​ພາກສ່ວນ​ກ່ຽວຂ້ອງ ຍົກຍ້າຍ​ປະຊາຊົນ ອອກ​ໄປ​ຈາກ​ຫຼາຍ​ເຂດ​ໃນ​ນະຄອນ ອາ​ວາ​​ສ ທີ່​ຂຶ້ນ​ກັບ​ແຂວງ ຄູ​ເຊ​ສະ​ຕານ (ທິດຕາເວັນຕົກ​ສ່ຽງ​ໃຕ້ ອີ​ຣານ) ໃນ​ຂະນະ​ທີ່​ຈຳນວນ​ຜູ້​ເສຍ​ຊີວິດ​ຍ້ອນ​ນ້ຳ​ຖ້ວມ​ຮ້າຍ​ແຮງ​ທີ່​ສຸດ ຢູ່​ໃນ​ອີ​ຣານ ໃນ​ເທື່ອ​ນີ້​ໄດ້​ເພີ່ມ ຂຶ້ນ​ເປັນ 77 ຄົນ.

    ຝົນຕົກ​ທີ່​ບໍ່​ປົກກະຕິ ໄດ້​ຕົກລົງ​ມາ​ຕັ້ງແຕ່​ວັນ​ທີ 19 ມີນາ​ທີ່​ຜ່ານ​ມາ ເຮັດ​ໃຫ້​ເກີດ ນ້ຳ​ຖ້ວມ​ຂັງ​ເປັນ​ບໍລິເວນ​ກວ້າງ ແລະ​ເປັນ​ຜົນ​ກະທົບ​ຕໍ່​ປະມານ 1.900 ນະຄອນ ແລະ​ ບ້ານ ໃນ​ທົ່ວ​ປະເທດ​ອີ​ຣານ ໃນ​ນັ້ນ​ຢູ່​ທາງ​ທິດຕາເວັນຕົກ ແລະ​ຕາເວັນຕົກ​ສ່ຽງ​ໃຕ້​ຂອງ​ອີ​ຣານ ໄດ້​ຮັບ​ຄວາມ​ເສຍ​ຫາຍ​ໜັກໜ່ວງ​ທີ່​ສຸດ ຈາກ​ສະພາບ​ນ້ຳ​ຖ້ວມ. ການ​ຄິດໄລ່​ເບື້ອງ​ຕົ້ນ​ເຫັນ​ວ່າ ຄວາມ​ເສຍ​ຫາຍ​ຈາກ​ນ້ຳ​ຖ້ວມ ທີ່​ມີ​ຕໍ່​ພາກ​ກະສິກຳ ມີ​ມູນ​ຄ່າ​ເຖິງ 47.000 ຕື້​ຣຽນ (ເທົ່າ​ກັບ 350 ລ້ານ​ໂດ​ລາ​ສະຫະລັດ).

   ເຈົ້າ​ໜ້າທີ່​ອີ​ຣານ ຖື​ວ່າ​ນ້ຳ​ຖ້ວມ​ໃນ​ເທື່ອ​ນີ້ ມີ​ຄວາມ​ຮ້າຍ​ແຮງ​ທີ່​ສຸດ ໃນ​ຮອບ 70 ປີຜ່ານມາ ຄື​ນັບ​ແຕ່​ຕົ້ນ​ຊຸມ​ປີ 1940 ເປັນຕົ້ນ​ມາ.

ຂ່າວທີ່ກ່ຽວຂ້ອງ