ປະທານທະນາຄານ​ໂລກ​ຄົນ​ໃໝ່ເຂົ້າຮັບ​ຕຳ​ແໜ່​ງຢ່າງ​ເປັນ​ທາງ​ການ

322 12 ມ.ສ. 2019 ຂ່າວຕ່າງປະເທດ
ປະທານທະນາຄານ​ໂລກ​ຄົນ​ໃໝ່ເຂົ້າຮັບ​ຕຳ​ແໜ່​ງຢ່າງ​ເປັນ​ທາງ​ການ

    ທ່ານ ເດ​ວິດ ມານ​ພາ​​ສ (David Malpass) ປະທານທະນາຄານ​ໂລກ​ຄົນທີ 13 ໄດ້​ເຂົ້າ​ຮັບ​ຕຳແໜ່ງ​ຢ່າງ​ເປັນ​ທາງ​ການ​ໃນ​ວັນ​ທີ 9 ເມສາ​ນີ້ ໂດຍ​ທ່ານ​ໄດ້​ວ່າ ການ​ລຶບລ້າງ​ຄວາມທຸກ​ຍາກ ແລະ ຊຸກຍູ້​ຄວາມ​ຈະເລີນ​ຮຸ່ງເຮືອງ​ຮ່ວມ​ກັນ ແມ່ນ​ເປົ້າ​ໝາຍ​ອັນ​ຮີບ​ດ່ວນ ແລະ​ເປັນ​ຈຸດ​ສຸມ​ຂອງ​ທະນາຄານ​ໂລກ.

   ທ່ານ ຈິມ ຢົງ​ກິມ ປະທານ​ທະນາຄານ​ໂລກ​ຄົນ​ກ່ອນ ໄດ້​ປາ​ກາດ​ລາ​ອອກ​ຈາກ​ຕຳແໜ່ງ ກ່ອນ​ໝົດ​ອາຍຸ​ການ​ຂອງ​ຕົນ​ຢ່າງ​ກະທັນຫັນ ເມື່ອ​ວັນ​ທີ 7 ມັງກອນ​ປີ​ນີ້. ຫຼັງ​ຈາກ​ນັ້ນ ທະນາຄານ​ໂລກ​ກໍ​ໄດ້​ປະກາດ​ຂັ້ນ​ຕອນ ແລະ​ລະບຽບ​ການ​ຄັດ​ເລືອກ​ປະທານ​ຄົນ​ໃໝ່. ວັນ​ທີ 6 ກຸມພາ​ປີ​ນີ້ ປະທານາທິບໍດີ ສ ອາ​ເມ​ຣິ​ກາ  ໂດ​ນາ​​ລ ທຣຳ ໄດ້​ສະເໜີ​ທ່ານ ມານ​ພາ​​ສ ຮອງ​ລັດຖະມົນຕີ​ກະຊວງ​ການ​ເງິນ ສ ອາ​ເມ​ຣິ​ກາ ທີ່​ຮັບຜິດຊອບ​ວຽກ​ງານ​ສາກົນ ເປັນ​ຜູ້​ສະໝັກ​ຮັບ​ເລືອກ​ຕັ້ງ​ເປັນ​ປະທານ​ທະນາຄານ​ໂລກ​ຄົນໃໝ່.

   ເມື່ອ​ວັນ​ທີ 14 ມີນາ​ຜ່ານ​ມາ ທະນາຄານ​ໂລກ​ໄດ້​ປະກາດ​ວ່າ​ທ່ານ ມານ​ພາ​​ສ ເປັນ​ຜູ້​ສະໝັກ​ຮັບ​ເລືອກ​ຕັ້ງ​ພຽງ​ຄົນ​ດຽວ ແລະ ເມື່ອ​ວັນ​ທີ 5 ເມສາ​ນີ້ ສະພາ​ບໍລິຫານ​ຂອງ​ທະນາຄານ​ໂລກ ກໍ​ໄດ້​ເປັນ​ເອກະ​ພາບ​ກັນ​ຮັບຮອງ​ທ່ານ​ມານ​ພາ​​ສ ເປັນ​ປະທານ​ທະນາຄານ​ໂລກ​ຄົນ​ໃໝ່ ໂດຍ​ຈະ​ດຳລົງ​ຕຳແໜ່ງ​ເປັນ​ເວລາ 5 ປີ.

ຂ່າວທີ່ກ່ຽວຂ້ອງ