ໃຕ້ຮົ່ມທຸງຂອງພັກ ຊາວໜຸ່ມໄດ້ຮັບການພັດທະນາຢ່າງບໍ່ຢຸດຢັ້ງ

172 18 ມ.ສ. 2019 ຂ່າວໜ້າ​ໜຶ່ງ
ໃຕ້ຮົ່ມທຸງຂອງພັກ ຊາວໜຸ່ມໄດ້ຮັບການພັດທະນາຢ່າງບໍ່ຢຸດຢັ້ງ

    ໃນ​ໂອ­ກາດ​ວັນ​ສ້າງ­ຕັ້ງ ຄະ­ນະ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ຄົບ­ຮອບ 64 ປີ (14/4/1955-14/4/2019) ທ່ານ​ນາງ ສຸ­ມາ­ລີ ທຳ​ມະ​ວົງ ເລ­ຂາ​ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ນະ­ຄອນ­ຫຼວງ​ວຽງ​ຈັນ (ນວ) ໄດ້​ໃຫ້​ສຳ­ພາດ​ວັນ​ທີ 5 ເມ­ສາ 2019 ວ່າ: ພາຍ​ໃຕ້​ການ​ນຳ­ພາ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ຊາວ​ໜຸ່ມ​ລາວ ແມ່ນ​ກຳ­ລັງ​ແຂນ​ຂວາ​ຂອງ​ພັກ ເປັນ​ກະ­ດູກ​ສັນ­ຫຼັງ​ຂອງ​ປະ­ເທດ​ຊາດ ໂດຍ​ໄດ້​ຜ່ານ​ການ​ເຊື່ອມ​ຊຶມ ແລະ ພາ­ລະ​ບົດ­ບາດ​ຂອງ​ຕົນ​ເອງ​ຕະ­ຫຼອດ​ໄລ­ຍະ​ທີ່​ຜ່ານ​ມາ ຊາວ​ໜຸ່ມ​ລາວ ໄດ້​ພ້ອມ​ກັນ​ອຸ­ທິດ​ເຫື່ອ­ແຮງ​ຂອງ​ຕົນ ເພື່ອ​ພາ­ລະ­ກິດ​ແຫ່ງ​ການ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ.

    ຊາວ​ໜຸ່ມ​ລາວ ມີ​ມູນ­ເຊື້ອ​ແຕ່​ສະ­ໄໝ​ຕໍ່­ສູ້​ກູ້​ຊາດ ມູນ­ເຊື້ອ​ດັ່ງ­ກ່າວ ກໍ​ຄື ມູນ­ເຊື້ອ​ພິ­ລະ​ອາດ​ຫານ​ຕ້ານ​ພວກ​ຈັກ­ກະ­ພັດ​ລ່າ​ເມືອງ​ຂຶ້ນ​ແບບ​ເກົ່າ ແລະ ໃໝ່ ຕະ­ຫຼອດ​ໄລ­ຍະ​ດັ່ງ­ກ່າວ ຊາວ​ໜຸ່ມ​ໄດ້​ເປັນ​ກຳ­ລັງ​ແຮງ​ອັນ​ແຂງ​ແກ່ນ ໃຕ້​ການ​ນຳ­ພາ​ຂອງ​ພັກ​ທຸກ​ຂະ​ບວນ​ການ​ປົດ​ປ່ອຍ​ຊາດ ລ້ວນ​ແລ້ວ­ແຕ່​ປະ­ກອບ­ສ່ວນ​ຂອງ​ກຳ­ລັງ​ແຮງ​ຊາວ​ໜຸ່ມ​ທັງ​ຍິງ ແລະ ຊາຍ ຄື​ຊາວ​ໜຸ່ມ​ເພດ​ຊາຍ ເຂົ້າ​ຮ່ວມ​ຂະ​ບວນ​ການ​ຕໍ່­ສູ້ ຊາວ​ໜຸ່ມ​ເພດ​ຍິງ ກໍ​ເປັນ​ກອງ​ເອື້ອຍ​ລ້ຽງ​ສະ­ບຽງ​ອາ­ຫານ​ຕ່າງໆ ສະ­ນັ້ນ ພາຍ​ໃຕ້​ການ​ນຳ­ພາ​ຂອງ​ພັກ​ກອມ​ມູ​ນິດ​ອິນ­ດູ­ຈີນ​ເມື່ອ​ກ່ອນ ແລະ ພັກ​ປະ­ຊາ­ຊົນ​ປະ­ຕິ­ວັດ​ລາວ ທີ່​ມີ​ກຽດ​ສະ­ຫງ່າ​ໃນ​ປັດ­ຈຸ­ບັນ ວັນ​ທີ 14 ເມ­ສາ 1955 ສະ­ມາ­ຄົມ​ຊາວ​ໜຸ່ມ​ຕະ­ລຸມ­ບອນ ໃນ​ກຳ­ລັງ​ປະ­ກອບ​ອາ­ວຸດ ໄດ້​ຮັບ​ການ​ສ້າງ​ຂຶ້ນ​ຢ່າງ​ເປັນ​ທາງ​ການ ແລະ ກໍ​ໄດ້​ເປັນ​ກຳ­ລັງ​ອັນ​ສຳ­ຄັນ ທີ່​ຮັບ​ເອົາ​ພາ­ລະ­ກິດ​ໃນ​ການ​ແບກ​ຫາບ​ຢ່າງ​ໜັກ­ໜ່ວງ ໃນ​ການ​ຕໍ່­ສູ້​ກູ້​ຊາດ​ແຕ່​ເຕັມ​ໄປ​ດ້ວຍ​ກຽດ​ສະ­ຫງ່າ​ງາມ ໃນ​ການ​ປຸກ­ລະ­ດົມ​ຂົນ­ຂວາຍ​ໃນ​ການ​ເຕົ້າ­ໂຮມ​ຊາວ​ໜຸ່ມ​ລາວ​ບັນ­ດາ­ເຜົ່າ ເພື່ອ​ເຂົ້າ​ຮ່ວມ​ຂະ​ບວນ​ການ​ຕໍ່­ສູ້​ກູ້​ຊາດ ຕ້ານ​ພວກ​ຈັກ­ກະ​ພັກ​ຜູ້​ຮຸກ​ຮານ ເພື່ອ​ຍາດ​ເອົາ​ເອ­ກະ­ລາດ ແລະ ຜືນ​ແຜ່ນ­ດິນ​ອັນ​ຄົບ​ຖ້ວມ ມາ​ໃຫ້​ປະ­ເທດ​ຊາດ​ໃນ​ໄລ­ຍະ​ຜ່ານ​ມາ ໂດຍ​ໄດ້​ຮັບ​ການ​ອົບ­ຮົມ​ບົ່ມ​ສອນ ແລະ ຖະ​ນຸ​ບຳ­ລຸງ​ຈາກ​ພັກ​ຕະ­ຫຼອດ 64 ປີ​ທີ່​ຜ່ານ​ມາ ຊາວ​ໜຸ່ມ​ໄດ້​ດຳ­ເນີນ​ການ­ເຄື່ອນ­ໄຫວ​ຢ່າງ​ອິດ­ສະ­ຫຼະ ຢ່າງ​ລະ​ອິດ​ລະ​ອ້ຽວ ລະ​ຫົດ​ອົດ­ທົນ​ຜ່ານ​ແປວ­ໄຟ​ແຫ່ງ​ການ​ຕໍ່­ສູ້ ປັບ­ປຸງ​ອົງ​ການ­ຈັດ­ຕັ້ງ​ຊາວ​ໜຸ່ມ​ໃຫ້​ເຕີບ​ໃຫຍ່​ເຂັ້ມ­ແຂງ​ໄປ​ແຕ່​ລະ​ຍຸກ​ແຕ່​ລະ­ສະ​ໄໝ ໄດ້​ມີ​ການ​ພັດ­ທະ­ນາ ແລະ ເປັນ​ກຳ­ລັງ​ແຮງ​ໃນ​ການ­ເຄື່ອນ­ໄຫວ​ເຮັດ​ໜ້າ­ທີ່​ກຳ­ລັງ​ປະ­ຈັນ­ບານ ເພື່ອ​ສືບ​ທອດ​ພາ­ລະ­ກິດ​ຂອງ​ພັກ​ມອບ​ໝາຍ​ໃຫ້ ສະ­ແດງ​ອອກ​ໃນ​ປັດ­ຈຸ­ບັນ​ຄະ­ນະ​ຊາວ​ໜຸ່ມ​ແຕ່​ລະ​ຂັ້ນ​ໃນ​ທົ່ວ ນວ ໄດ້​ເອົາ­ໃຈ­ໃສ່​ໃນ​ການ​ບຸກ​ເຂົ້າ​ໃສ່​ໃນ​ຂໍ້​ແຂ່ງ­ຂັນ 4 ບຸກ ໃຫ້​ໄດ້​ເປັນ​ຮູບ​ປະ​ທຳ ປະ​ເມີນ​ຂໍ້​ແຂ່ງ­ຂັນ 4 ບຸກ​ໄປ​ຕາມ 4 ເນື້ອ​ໃນ​ຄື​ບຸກ​ແນວ​ຄິດ​ໄປ​ຕາມ​ແນວ­ທາງ​ຂອງ​ພັກ-ລັດ ປີ 2018 ຄະ­ນະ​ບໍ­ລິ­ຫານ​ງານ​ຊາວ​ໜຸ່ມ ນວ ໄດ້​ເອົາ­ໃຈ­ໃສ່​ຂະ­ຫຍາຍ​ມະ­ຫາ­ຊົນ ອະ­ນຸ­ຊົນ ກໍ​ຄື ໄວ​ໜຸ່ມ​ເຂົ້າ​ສູ່​ການ­ຈັດ­ຕັ້ງ​ໄດ້ 19 ພັນ​ກວ່າ​ຄົນ ໃນ​ນີ້ ເປັນ​ສະ­ມາ­ຊິກ​ຊາວ​ໜຸ່ມ​ໃໝ່ 7 ພັນ​ກວ່າ​ຄົນ ສະ­ມາ­ຊິກ​ອະ­ນຸ­ຊົນ-ເຍົາ­ວະ​ຊົນ​ໃໝ່ 12 ພັນ​ກວ່າ​ຄົນ.

ຂ່າວທີ່ກ່ຽວຂ້ອງ