ສະຫຼອງບຸນປີໃໝ່ລາວ ພສ 2562 ດ້ວຍບັນຍາກາດຄຶກຄື້ນມ່ວນຊື່ນ ແລະ ຮັກສາໄດ້ວັດທະນະທຳຮີດຄອງປະເພນີອັນດີງາມ

310 18 ມ.ສ. 2019 ຂ່າວໜ້າ​ໜຶ່ງ
ສະຫຼອງບຸນປີໃໝ່ລາວ ພສ 2562 ດ້ວຍບັນຍາກາດຄຶກຄື້ນມ່ວນຊື່ນ ແລະ ຮັກສາໄດ້ວັດທະນະທຳຮີດຄອງປະເພນີອັນດີງາມ

    ໃນ​ວັນ​ທີ 13 ເມ­ສາ 2019 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແລະ ພັນ​ລະ​ຍາ ເຂົ້າ​ຮ່ວມ​ພິ­ທີ​ເປີດ​ງານ​ມະ­ຫາ­ສົງ­ການ​ສືບ​ສານ​ປະ­ເພ­ນີ​ເດືອນ 6 ຕົກ​ປີ​ໃໝ່ ບຸນ​ບັ້ງ­ໄຟ ປະ­ສານ​ໃຈ ພັດ­ທະ­ນາ (ງານ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ພສ 2562) ຢູ່​ແຂວງ​ອຸ­ດົມ​ໄຊ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ຄຳ​ພັນ ເຜີຍ​ຍະ​ວົງ ເຈົ້າ­ແຂວງ​ອຸ­ດົມ​ໄຊ ພ້ອມ​ການ​ນຳ​ແຂວງ ເຊິ່ງ​ການ​ຈັດ​ງານ​ດັ່ງ­ກ່າວ ເພື່ອ​ເປັນ​ການ​ອະ­ນຸ​ຮັກ​ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ຂອງ​ທ້ອງ­ຖິ່ນ ໃຫ້​ຍືນ​ຍົງ​ຢູ່​ຄູ່​ຄົນ​ລາວ​ຕະ­ຫຼອດ​ໄປ ເພື່ອ​ນຳ​ເອົາ​ວັດ­ທະ­ນະ­ທຳ​ຮີດ­ຄອງ​ປະ­ເພ­ນີ​ຂອງ​ບັນ­ດາ­ເຜົ່າ ປະ­ກອບ­ສ່ວນ​ໃນ​ການ​ຊຸກ­ຍູ້​ສົ່ງ­ເສີມ​ການ­ທ່ອງ­ທ່ຽວ ແລະ ການ​ພົວ­ພັນ​ຮ່ວມ​ມື ເຊື່ອມ​ໂຍງ ແລກ­ປ່ຽນ​ວັດ­ທະ­ນະ­ທຳ​ຮີດ­ຄອງ​ປະ­ເພ­ນີ​ກັບ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ​ປະ­ເທດ​ເພື່ອນ​ມິດ​ໃກ້​ຄຽງ ທັງ​ເປັນ​ການ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ​ລາວ-ຈີນ 2019 ເພື່ອ​ສ້າງ​ລາຍ​ຮັບ​ໃຫ້​ປະ­ຊາ­ຊົນ​ບັນ­ດາ­ເຜົ່າ ແລະ ຜູ້​ປະ­ກອບ​ການ​ດ້ານ​ການ​ບໍ­ລິ­ການ​ພາຍ​ໃນ​ແຂວງ ອັນ​ສຳ­ຄັນ​ເພື່ອ​ເປັນ​ການ​ອວຍ­ພອນ​ປີ​ໃໝ່​ເຊິ່ງ​ກັນ ແລະ ກັນ ປຸກ­ລະ­ດົມ ເຕົ້າ­ໂຮມ​ຄວາມ​ສາ­ມັກ­ຄີ​ຂອງ​ປະ­ຊາ­ຊົນ​ບັນ­ດາ­ເຜົ່າ ປະ­ກອບ­ສ່ວນ​ໃນ​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ກໍ​ຄື ແຂວງ​ອຸ­ດົມ​ໄຊ ໃຫ້​ເປັນ​ຂະ​ບວນ​ການ​ກວ້າງ­ຂວາງ ຟົດ­ຟື້ນ ມ່ວນ­ຊື່ນ ນອກ​ນີ້ ຍັງ​ເປັນ​ການ​ດຶງ​ດູດ​ນັກ​ທ່ອງ​ທ່ຽວ ນັກ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ ເຂົ້າ​ມາ​ທ່ອງ​ທ່ຽວ ແລະ ລົງ­ທຶນ​ຢູ່​ແຂວງ​ອຸ­ດົມ​ໄຊ​ໃຫ້​ນັບ​ມື້​ຫຼາຍ​ຂຶ້ນ ນຳ​ເອົາ​ຊື່​ສຽງ​ອັນ​ດີ ແລະ ຜົນ­ງານ​ອັນ​ພົ້ນ​ເດັ່ນ​ຂອງ​ແຂວງ​ອຸ­ດົມ​ໄຊ ໃຫ້​ເປັນ​ທີ່​ຮູ້­ຈັກ​ກວ້າງ­ຂວາງ​ກວ່າ​ເກົ່າ.

    ຂ່າວ​ແຈ້ງ​ຕື່ມ​ວ່າ: ສະ­ຖານ­ທູດ​ລາວ​ປະ­ຈຳ​ໄທ ທີ່​ບາງ­ກອກ ໄດ້​ຈັດ​ງານ​ສະ­ເຫຼີມ­ສະ­ຫຼອງ​ປີ​ໃໝ່​ລາວ ພສ 2562 ຂຶ້ນ​ວັນ​ທີ 11 ເມ­ສາ 2019 ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ສົມ­ເດັດ​ພະ​ເທບ​ພະ​ຣັດ​ຣາ​ຊະ​ສຸ­ດາ ສະ­ຫຍາມ​ບໍ​ຣົມ​ຣາ​ຊະ​ກຸ​ມາ​ຣີ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພ້ອມ​ດ້ວຍ​ພັນ​ລະ​ຍາ ແລະ ຄະ­ນະ ທ່ານ ດອນ ປຣະ​ມັດ​ວິ­ໄນ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ໄທ ປະ­ທານ​ສະ­ມາ­ຄົມ​ລາວ-ໄທ ແລະ ໄທ-ລາວ ເພື່ອ​ມິດ­ຕະ­ພາບ ທ່ານ ແສງ ສຸ​ຂະ​ທິ​ວົງ ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ​ໄທ ແລະ ທ່ານ ກຽດ​ຕິ​ຄຸນ ຊາດ​ປຣະ​ເສີດ ເອກ​ອັກ​ຄະ​ຣາ​ຊະ​ທູດ​ໄທ ປະ­ຈຳ​ລາວ ພ້ອມ​ດ້ວຍ​ພັນ​ລະ​ຍາ ກົງ­ສຸນ​ໃຫຍ່​ລາວ​ທີ່​ຂອນ​ແກ່ນ ເຈົ້າ​ໜ້າ­ທີ່​ສຳ­ນັກ​ພະ​ຣາ​ຊະ​ວັງ ບັນ­ດາ​ແຂກ​ທີ່​ມີ​ກຽດ​ທັງ​ພາກ​ລັດ ແລະ ເອ­ກະ​ຊົນ ລວມ​ທັງ​ຊຸມ​ຊົນ​ລາວ-ໄທ​ເຂົ້າ​ຮ່ວມ ໂອ­ກາດ​ນີ້ ໄດ້​ຈັດ​ພິ­ທີ​ບາ­ສີ­ສູ່­ຂວັນ​ຕາມ​ຮີດ­ຄອງ​ປະ­ເພ­ນີ ໂດຍ​ຈັດ​ພິ­ທີ​ຕັກ­ບາດ ບາ­ສີ­ສູ່­ຂວັນ​ໃຫ້​ສົມ­ເດັດ​ພະ​ເທບ​ພະ​ຣັດ​ຣາ​ຊະ​ສຸ­ດາ ສະ­ຫຍາມ​ບໍ​ຣົມ​ຣາ​ຊະ​ກຸ​ມາ​ຣີ ແລະ ອວຍ​ໄຊ​ໃຫ້​ພອນ​ໂຊກ​ດີ​ປີ​ໃໝ່ ພ້ອມ​ທັງ​ອວຍ­ພອນ​ໃຫ້​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ທີ່​ດີ​ລະ­ຫວ່າງ​ສອງ​ປະ­ເທດ​ລາວ-ໄທ ໃຫ້​ຈະ­ເລີນ​ງອກ​ງາມ​ຍິ່ງ​ຂຶ້ນ​ເລື້ອຍໆ ແລະ ໃນ​ວັນ​ດຽວ​ກັນ ສະ­ຖານ​ກົງ­ສຸນ​ໃຫຍ່​ລາວ ປະ­ຈຳ​ຈັງ­ຫວັດ​ຂອນ​ແກ່ນ ກໍ​ໄດ້​ຈັດ​ງານ​ພິ­ທີ​ອວຍ­ພອນ​ປີ​ໃໝ່​ລາວ​ຂຶ້ນ​ເຊັ່ນ​ດຽວ​ກັນ ມີ​ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ທ່ານ ສົມ​ສັກ ຈັງ​ຕະ­ກຸນ ຜູ້​ວ່າ­ການ​ຈັງ­ຫວັດ​ຂອນ​ແກ່ນ ບັນ­ດາ​ພະ­ນັກ­ງານ​ສະ­ຖານ​ກົງ­ສຸນ​ໃຫຍ່ ແລະ ແຂກ​ທີ່​ມີ​ກຽດ​ທັງ​ລາວ ແລະ ໄທ​ເຂົ້າ​ຮ່ວມ.

    ສຳ­ລັບ​ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ພສ 2561 ແລະ ຕ້ອນ­ຮັບ​ປີ​ໃໝ່​ລາວ ພສ 2562 ກົງ​ກັບ​ວັນ​ທີ 14-16 ເມ­ສາ 2019 ເຊິ່ງ​ປະ­ຊາ­ຊົນ​ລາວ​ບັນ­ດາ­ເຜົ່າ​ທົ່ວ​ປະ­ເທດ ໄດ້​ພ້ອມ​ກັນ​ເບີກ­ບານ​ມ່ວນ­ຊື່ນ ເພື່ອ​ເປັນ​ການ​ສືບ​ທອດ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ທີ່​ສືບ​ທອດ​ກັນ​ມາ​ຫຼາຍ­ເຊັ່ນ­ຄົນ ແລະ ປີ​ນີ້​ເປັນ​ປີ​ພິ­ເສດ ເພື່ອ​ເປັນ​ການ​ສົ່ງ­ເສີມ​ປີ​ທ່ອງ​ທ່ຽວ​ລາວ-ຈີນ 2019 ສະ­ເພາະ​ຢູ່​ນະ­ຄອນ­ຫຼວງ​ວຽງ​ຈັນ ກໍ​ໄດ້​ຈັດ​ໃຫ້​ມີ​ຫຼາຍ​ກິດ­ຈະ­ກຳ​ຄື​ກັບ​ທຸກ​ປີ​ໃນ​ຜ່ານ​ມາ ສາ­ມາດ​ຮັກ­ສາ​ໄວ້​ໄດ້​ວັດ­ທະ­ນະ­ທຳ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ​ລາວ​ເຮົາ.

    ສຳ­ລັບ​ກິດ­ຈະ­ກຳ​ທີ່​ເປັນ​ທາງ​ການ​ໃນ​ວັນ​ທີ 14 ເມ­ສາ 2019 ທີ່​ເດີ່ນ​ກົມ​ມະ​ລຽນ​ພະ​ທາດ­ຫຼວງ​ວຽງ​ຈັນ ເວ­ລາ 13-16:00 ໂມງ ໄດ້​ມີ​ພິ­ທີ​ອັງ​ເຊີນ​ເອົາ​ພະ​ພຸດ​ທະ​ຮູບ​ຄຳ​ລົງ​ມາ​ໃຫ້­ການ​ນຳ ແລະ ມວນ​ຊົນ​ນະ­ຄອນ­ຫຼວງ​ວຽງ​ຈັນ ໄດ້​ຫົດ​ນ້ຳ​ສະ­ອາດ​ນ້ຳ­ອົບ​ນ້ຳ​ຫອມ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຫຼັງ​ຈາກ​ນັ້ນ ໄດ້​ເປີດ​ໂອ­ກາດ​ໃຫ້​ມວນ​ຊົນ​ຜູ້​ທີ່​ມີ​ຈິດ­ໃຈ​ໃສ​ສັດ­ທາ​ເຂົ້າ​ຮ່ວມ​ຫົດ­ສົງ ແລະ ຢູ່​ທີ່​ວັດ​ໂພນ​ໄຊ ເມືອງ​ໄຊ​ເຊດ​ຖາ ເຈົ້າ​ສັດ­ທາ​ສ້າງ​ພະ​ພຸດ​ທະ​ຮູບ​ອົງ​ຈຳ­ລອງ ທ່ານ ຄຳ​ພັນ ມາ­ລາ​ບັນ­ດິດ ແລະ ທ່ານ​ນາງ ບົວ​ວຽງ ເພັດ​ທະ​ລານ​ຄຳ ພ້ອມ​ດ້ວຍ​ຄອບ­ຄົວ​ລູນ​ຫຼານ​ອຳ­ນາດ​ການ​ປົກ­ຄອງ​ບ້ານ ເຖົ້າ​ແກ່​ແນວ​ໂຮມ ແລະ ພະ­ສົງ​ວັດ​ໂພນ​ໄຊ ກໍ​ໄດ້​ນຳ​ເອົາ​ພະ​ສຸກ ພະ​ເສີມ ພະ​ໃສ ແລະ ພະ​ໄຊ​ປາ­ລະ­ມີ ລົງ​ມາ​ໃຫ້​ມວນ​ຊົນ​ໄດ້​ຫົດ​ໄດ້​ສົງ ນອກ​ນີ້​ຢູ່​ວັດ​ແຫ່ງ​ອື່ນໆ ກໍ​ໄດ້​ນຳ​ເອົາ​ພະ​ພຸດ​ທະ​ຮູບ​ມິ່ງ​ເມືອງ​ອົງ​ອື່ນໆ ຢູ່​ຕາມ​ວັດ​ວາ​ອາ​ຮາມ​ຕ່າງໆ​ໃຫ້​ປະ­ຊາ­ຊົນ​ລາວ ແຂກ​ພາຍ​ໃນ ແລະ ຕ່າງ­ປະ­ເທດ​ໄດ້​ຮ່ວມ​ຫົດ­ສົງ ເພື່ອ​ໃຫ້​ເກີດ​ຄວາມ​ຊຸ່ມ​ເຢັນ ທັງ​ເປັນ​ການ​ປົກ​ປັກ​ຮັກ­ສາ​ຮີດ­ຄອງ​ປະ­ເພ­ນີ​ວັດ­ທະ­ນະ­ທຳ ທີ່​ໄດ້​ປະ­ຕິ­ບັດ​ສືບ​ທອດ​ກັນ​ມາ​ແຕ່​ດຶກ​ດຳ​ບັນ ແນ­ໃສ່​ອະ­ນຸ​ຮັກ​ຮີດ­ຄອງ​ປະ­ເພ­ນີ​ອັນ​ດີ­ງາມ​ດັ່ງ­ກ່າວ ໃຫ້​ມີ​ຄວາມ​ຍືນ​ຍົງ​ຢູ່​ຄຽງ​ຄູ່​ກັບ​ຊາດ​ລາວ​ຕະ­ຫຼອດ​ໄປ.

ຂ່າວທີ່ກ່ຽວຂ້ອງ