ທູດລາວ ຍື່ນສານຕາຕັ້ງຕໍ່ປະທານາທິບໍດີຮົງກາຣີ

661 19 ມ.ສ. 2019 ຂ່າວໜ້າ​ໜຶ່ງ

    ວັນ​ທີ 8 ເມ­ສາ 2019 ທີ່​ທຳ​ນຽບ​ປະ­ທາ­ນາ­ທິ­ບໍ­ດີ ນະ­ຄອນ­ຫຼວງ​ບູ​ດາ​ເປ​ັສ ທ່ານ ສີ​ທົງ ຈິດ​ໂຍ­ທິນ ໄດ້​ຍື່ນ​ສານ​ຕາ​ຕັ້ງ​ຕໍ່​ທ່ານ ຈາ​ໂນດ​ສ ອາ​ເດ ປະ­ທາ­ນາ­ທິ­ບໍ­ດີ ແຫ່ງ ສາ­ທາ­ລະ­ນະ​ລັດ ຮົງ​ກາ​ຣີ ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ລາວ ປະ­ຈຳ ສ ຮົງ​ກາ​ຣີ.

    ໂອ­ກາດ​ນີ້ ທ່ານ ຈາ​ໂນ​ດາ ອາ​ເດ ໄດ້​ສະ­ແດງ​ຄວາມ​ຍິນ​ດີ​ຊົມ­ເຊີຍ​ທ່ານ ສີ​ທົງ ຈິດ​ໂຍ­ທິນ ໃນ​ການ​ມາ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ລາວ​ຄົນ​ໃໝ່ ປະ­ຈຳ​ຮົງ​ກາ​ຣີ ແລະ ໄດ້​ອວຍ­ພອນ​ໃຫ້​ທ່ານ​ທູດ ຈົ່ງ​ປະ­ຕິ­ບັດ​ໜ້າ­ທີ່​ການ​ທູດ​ຂອງ​ຕົນ​ດ້ວຍ​ຜົນ­ສຳ­ເລັດ ເພື່ອ​ສົ່ງ­ເສີມ​ການ​ພົວ­ພັນ​ຮ່ວມ​ມື​ຂອງ​ສອງ​ປະ­ເທດ ໃຫ້​ຂະ­ຫຍາຍ­ຕົວ​ໄປ​ເລື້ອຍໆ ພ້ອມ​ດຽວ​ກັນ​ນີ້ ທ່ານ​ປະ­ທາ­ນາ­ທິ­ບໍ­ດີ​ຍັງ​ໄດ້​ໃຫ້​ຄວາມ​ສຳ­ຄັນ​ຕໍ່​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ລະ­ຫວ່າງ​ສອງ​ປະ­ເທດ ເຊິ່ງ​ທ່ານ​ໄດ້​ກ່າວ​ເຖິງ​ການ​ປຶກ­ສາ​ຫາ­ລື​ບັນ­ຫາ​ສຳ­ຄັນ​ຕ່າງໆ ໃນ​ໂອ­ກາດ​ມາ​ຢ້ຽມ­ຢາມ​ຮົງ​ກາ​ຣີ​ຢ່າງ​ເປັນ​ທາງ​ການ ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ທອງ​ລຸນ ສີ​ສຸ​ລິດ ໃນ​ເດືອນ​ມີ­ນາ​ຜ່ານ​ມາ​ນີ້ ໂດຍ​ໄດ້​ເນັ້ນ​ໜັກ​ເຖິງ​ບາງ​ທ່າ­ແຮງ​ທີ່​ສອງ​ປະ­ເທດ​ຮົງ​ກາ​ຣີ ແລະ ລາວ ມີ​ຄວາມ​ສາ­ມາດ​ຮ່ວມ​ມື​ກັນ​ໄດ້ ບົນ​ພື້ນ­ຖານ​ການ​ຕົກ­ລົງ​ຂອງ​ສອງ​ລັດ­ຖະ­ບານ ເພື່ອ​ຜົນ​ປະ­ໂຫຍດ​ຂອງ​ສອງ​ຝ່າຍ.

    ທ່ານ​ທູດ​ໄດ້​ສະ­ແດງ​ຄວາມ​ຂອບ­ໃຈ​ຢ່າງ​ຈິງ​ໃຈ​ຕໍ່​ຄຳ​ຊົມ­ເຊີຍ ແລະ ການ​ຕ້ອນ­ຮັບ​ໃນ​ການ​ກັບ​ຄືນ​ມາ​ປະ­ເທດ​ຮົງ​ກາ​ຣີ​ອີກ​ເທື່ອ​ໃໝ່ ໃນ​ຖາ­ນະ​ເປັນ​ທູດ ແລະ ຈະ​ປະ­ຕິ­ບັດ​ໜ້າ­ທີ່​ຢ່າງ​ເຕັມ​ປ່ຽມ​ເພື່ອ​ບັນ­ລຸ​ເປົ້າ​ໝາຍ ພ້ອມ​ດຽວ​ກັນ ກໍ​ໄດ້​ນຳ​ເອົາ​ຄວາມ​ຢື້​ຢາມ​ຖາມ​ຂ່າວ​ອັນ​ອົບ​ອຸ່ນ ພ້ອມ​ດ້ວຍ​ພອນ​ໄຊ​ອັນ​ປະ­ເສີດ ແລະ ຄວາມ​ຮັກ­ແພງ​ຖານ​ເພື່ອນ​ມິດ​ຈາກ​ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ​ສົ່ງ​ເຖິງ​ທ່ານ ຈາ​ໂນດ​ສ ອາ​ເດ ແລະ ມີ​ຄວາມ​ຍິນ​ດີ​ລໍ­ຄອຍ​ຕ້ອນ­ຮັບ​ການ​ຢ້ຽມ­ຢາມ​ລາວ ຢ່າງ​ເປັນ​ທາງ​ການ ຂອງ​ທ່ານ​ປະ­ທາ­ນາ­ທິ­ບໍ­ດີ ໃນ​ໂອ­ກາດ​ອັນ​ເໝາະ​ສົມ ເຊິ່ງ​ທ່ານ​ປະ­ທາ­ນາ­ທິ­ບໍ­ດີ​ໄດ້​ສະ­ແດງ​ຄວາມ​ຂອບ­ໃຈ ແລະ ໄດ້​ສົ່ງ​ຄວາມ​ຢື້​ຢາມ​ຖາມ​ຂ່າວ ແລະ ອວຍ­ພອນ​ໄຊ​ອັນ​ປະ­ເສີດ​ເຊັ່ນ​ດຽວ​ກັນ ເຖິງ​ຄູ່​ຮ່ວມ​ຕຳ­ແໜ່ງ​ຝ່າຍ​ລາວ ພ້ອມ​ທັງ​ສະ­ແດງ​ຄວາມ​ຫວັງ​ວ່າ​ຈະ​ມີ​ໂອ­ກາດ​ໄປ​ຢ້ຽມ­ຢາມ​ລາວ ໃນ​ທ້າຍ​ປີ 2019.

    ຕອນ​ທ້າຍ ທ່ານ​ທູດ​ຍັງ​ໄດ້​ຕີ​ລາ­ຄາ​ສູງ​ຕໍ່​ການ​ພົວ­ພັນ​ສອງ​ຝ່າຍ​ລາວ-ຮົງ​ກາ​ຣີ ຕະ­ຫຼອດ​ໄລ­ຍະ​ຜ່ານ​ມາ​ນັບ​ຕັ້ງ­ແຕ່​ສອງ​ປະ­ເທດ ໄດ້​ສ້າງ​ສາຍ​ພົວ­ພັນ​ການ​ທູດ​ຮ່ວມ​ກັນ ໃນ​ວັນ​ທີ 12 ກັນ­ຍາ 1962 ແລະ ໄດ້​ສະ­ແດງ​ຄວາມ​ຍິນ​ດີ​ທີ່​ສອງ​ປະ­ເທດ ໄດ້​ຍົກ​ລະ­ດັບ​ການ​ພົວ­ພັນ​ຖານ​ເພື່ອນ​ມິດ ອັນ​ເປັນ​ມູນ­ເຊື້ອ​ຂຶ້ນ​ສູ່​ການ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ເມື່ອ​ບໍ່​ດົນ​ມາ​ນີ້ ພ້ອມ​ນັ້ນ ກໍ​ໄດ້​ຕາງ­ໜ້າ​ໃຫ້​ລັດ­ຖະ­ບານ ແລະ ປະ­ຊາ­ຊົນ​ລາວ​ສະ­ແດງ​ຄວາມ​ຂອບ­ໃຈ ແລະ ຮູ້​ບຸນ­ຄຸນ​ຕໍ່​ລັດ­ຖະ­ບານ ແລະ ປະ­ຊາ­ຊົນ​ຮົງ​ກາ​ຣີ ທີ່​ໄດ້​ໃຫ້­ການ​ຮ່ວມ​ມື​ຊ່ວຍ­ເຫຼືອ​ໃນ​ຫຼາຍ​ດ້ານ​ຜ່ານ​ມາ ອັນ​ໄດ້​ເປັນ​ການ​ປະ­ກອບ­ສ່ວນ​ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລາວ ໃຫ້​ຂະ­ຫຍາຍ­ຕົວ​ເປັນ​ກ້າວໆ​ມາ.

ຂ່າວທີ່ກ່ຽວຂ້ອງ