ຂ່າວຫຼ້າສຸດ

ໂລກາພິວັດ ຫຼື ທຶນນິຍົມ

1.873 19 ມ.ສ. 2019 ນານາສາລະ

    ໂລກ​ຍຸກ​ໂລ­ກາ​ພິ​ວັດ​ທີ່​ມີ​ກະ­ແສ​ທຶນ​ນິ­ຍົມ​ພັດ​ແຮງ ອາດ​ສົ່ງ​ຜົນ​ດີ​ໃຫ້​ແກ່​ນັກ­ທຸ­ລະ­ກິດ​ຜູ້​ມີ​ກຳ­ລັງ­ວັງ­ຊາ ທັງ​ອຳ­ນາດ​ເງິນ ແລະ ອຳ­ນາດ​ພັກ​ພວກ​ເພື່ອນ​ຝູງ ແຕ່​ໃນ​ມູມ​ລົບ​ຜົນ​ຮ້າຍ​ຂອງ​ທຶນ​ນິ­ຍົມ ຖ້າ​ຈະ​ນັບ​ມາ​ເປັນ​ຂໍ້ໆຄົງ​ຫຼາຍ​ກວ່າ​ໜ້າ​ເຈັ້ຍ​ຈະ​ຂຽນ​ໄດ້​ໝົດ ເຊິ່ງ​ປັດ­ຈຸ­ບັນ​ນີ້ ຫຼາຍ​ຄົນ​ຖືກ​ກະ­ແສ​ຄ່າ​ນິ­ຍົມ​ຂອງ​ທຶນ​ນິ­ຍົມ​ຄອບ​ງຳ​ເອົາ​ຊີ­ວິດ​ຈົນ​ບໍ່​ຮູ້­ສຶກ​ໂຕ ເພາະ​ຄ່າ​ນິ­ຍົມ​ດັ່ງ­ກ່າວ ມັນ​ຖືກ​ກັບ​ທຳ​ມະ​ຊາດ​ນິ­ໄສ​ຂອງ​ມະ­ນຸດ ທີ່​ມັກ​ຄວາມ​ສະ­ດວກ​ສະ­ບາຍ​ຈົນ​ບໍ່​ແຄ​ກັບ​ສິນ​ລະ​ທຳ ແລະ ຄວາມ​ຖືກ­ຕ້ອງ​ດີ­ງາມ.

    ດ້ານ​ດີ​ຂອງ​ການ​ພັດ­ທະ­ນາ​ແບບ​ທຶນ​ນິ­ຍົມ ຄື: ການ​ພັດ­ທະ­ນາ​ໄວ ການ​ຕິດ­ຕໍ່​ສື່­ສານ​ວ່ອງ­ໄວ​ທັນ­ໃຈ ບໍ່​ເສຍ​ເວ­ລາ...ສິ່ງ​ທີ່​ປົນ​ມາ​ກັບ​ໂລກ​ຂອງ​ທຶນ​ນິ­ຍົມ ຄື: ຄ່າ​ນິ­ຍົມ​ທີ່​ດຶງ​ໃຈ​ຄົນ​ໃຫ້​ຄິດ​ໃກ້ ມັກ­ງ່າຍ ແລະ ເບິ່ງ​ເຫັນ​ການ​ຕົ້ມ​ຕົວະ​ເປັນ​ເລື່ອງ​ຄວາມ​ສະ­ຫຼາດ ເພາະ​ຕ້ອງ​ເອົາ​ໂຕ​ລອດ​ໃນ​ກະ­ແສ​ແຂ່ງ­ຂັນ​ກັນ​ສູງ ເຊັ່ນ: ການ​ຕົວະ​ຕົ້ມ​ຢືມ​ເງິນ ຫຼື ພຶດ­ຕິ​ກຳ​ຫຼອກ​ຂາຍ​ສິນ­ຄ້າ​ທາງ​ອອນ​ລາຍ ເຊິ່ງ​ບໍ່​ມີ​ຄຸນ​ນະ​ພາບ​ຕາມ​ທີ່​ໂຄ­ສະ­ນາ​ໄວ້ ແຕ່​ຄົນ​ຂາຍ​ກໍ​ປ່ອຍ​ສີ­ປາກ​ຄາ­ລົມ ເຕາະ​ນ້ອຍ ຕ້ອຍ​ໃຫຍ່ ໂດຍ​ມີ​ລັກ­ສະ­ນະ​ຍົວະ​ໃຫ້​ຊື້​ຊະ­ນິດ​ໜຶ່ງ​ຍັງ​ບໍ່​ແລ້ວ ຕ້ອງ​ມີ​ໂຕ​ທີ​ສອງ ຫຼື ສາມ​ຕາມ​ມາ ໂດຍ​ອ້າງ​ເຫດ­ຜົນ​ວ່າ​ມັນ​ຈະ​ເຮັດ​ໃຫ້​ດີ​ຂຶ້ນ ຫຼື ເຊົາ​ໄວ​ຫາຍ​ຂາດ...!.

    ຜູ້​ຂຽນ​ຍົກ​ເຫດ­ຜົນ​ຕົວ­ຢ່າງ​ມາ​ສະ­ເໜີ​ນີ້ ບໍ່​ແມ່ນ​ຢາກ​ຕໍ່­ຕ້ານ ແຕ່​ໃຫ້​ສັງ­ຄົມ​ໄດ້​ສະ­ຕິ​ຄິດ​ຫາ​ຜົນ​ບວກ​ລົບ​ນຳ​ກັນ​ວ່າ​ຄ່າ​ນິ­ຍົມ​ນາໆ​ປະ­ການ ທີ່​ມັນ​ພັດ​ຖະ​ຫຼົ່ມ​ມາ​ກັບ​ສິດ­ທິ​ເສລີ­ພາບ ແລະ ຄວາມ​ສະ­ເໝີ­ພາບ​ຈົນ​ເກີນ​ຄວາມ​ພໍ­ດີ​ນັ້ນ ກໍ​ອາດ​ສາ­ມາດ​ຊຸກ­ຍູ້​ໃຫ້​ບາງ​ຄົນ​ບໍ່​ຮູ້​ຮາກ​ເຫງົ້າ​ໃນ​ຮີດ­ຄອງ ແລະ ປະ­ເພ­ນີ ວັດ­ທະ­ນະ­ທຳ​ຂອງ​ຕົນ ຫຼົງ​ໄປ​ຍ້ອງ​ຊົມ­ເຊີຍ​ເຂົາ​ແຕ່​ຝ່າຍ​ດຽວ ໂດຍ​ບໍ່​ຫຼຽວ​ແລ​ແງ່​ຄິດ ຫຼື ພູມ​ປັນ­ຍາ​ຫຼັກ​ຄິດ​ຂອງ​ຄ່າ​ນິ­ຍົມ​ດັ້ງ­ເດີມ​ຂອງ​ຕົນ ເພາະ​ຢ່າ​ລືມ​ວ່າ​ຜູ້​ທີ່​ຮູ້​ທັນ​ໂລກ ແລະ ສະ­ຫຼາດ​ພໍ ເຂົາ​ຈະ​ປັບ­ປຸງ​ຂອງ​ເກົ່າ​ທີ່​ມີ​ຢູ່​ແລ້ວ​ໃຫ້​ເຂົ້າ​ກັບ​ໂລກ ໂດຍ​ບໍ່​ແມ່ນ​ຮັບ​ເອົາ​ຈາກ​ໂລກ​ອື່ນ​ທັງ​ໝົດ ຈົນ​ບໍ່​ຄົ້ນ­ຄວ້າ​ເບິ່ງ​ໃຫ້​ເຫັນ​ຂອງ​ດີ​ໃນ​ຊາດ​ທີ່​ມີ​ຢູ່.

    ຖ້າ​ຈະ​ຍົກ​ຄະ­ດີ​ຢູ່​ສານ​ທີ່​ມີ​ທ່າ​ອ່ຽງ​ຫຼາຍ​ຂຶ້ນ ຕິດ​ອັນ​ດັບ​ຕົ້ນ​ກໍ​ແມ່ນ​ເລື້ອງ​ຊັບ​ສິນ ທີ່​ດິນ ການ​ຢ່າ​ຮ້າງ​ລະ­ຫວ່າງ​ຜົວ-ເມຍ...ເຊິ່ງ​ບັນ­ຫາ​ຂ້າງ​ເທິງ​ນັ້ນ ມັນ​ກ່ຽວ​ເຖິງ​ການ​ຍາດ​ແຍ່ງ-ການ​ຊື້​ຈ້າງ​ໂກງ​ກິນ ແລະ ບໍ່​ພຽງ​ແຕ່​ຍາດ​ຊັບ​ສິນ​ເທົ່າ​ນັ້ນ ແຕ່​ຍັງ​ຕົກ​ລັກ­ສະ­ນະ​ຍາດ​ດິນ​ກັນ​ຢູ່ ຍາດ​ຄູ່​ກັນ​ນອນ ເຖິງ​ຂັ້ນ​ແຕກ​ແຍກ​ບານ​ປາຍ ເພາະ​ບໍ່​ເຄີຍ​ຄິດ​ຈະ​ແຄ​ສິນ​ລະ​ທຳ?.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ