ຂ່າວຫຼ້າສຸດ

ເກີດອຸບັດເຫດ​ເຮືອ​ຫຼົ້ມຢູ່​ໃນມຽນ​ມາ ແລະ ສປ ກົງໂກ

240 22 ມ.ສ. 2019 ຂ່າວຕ່າງປະເທດ
ເກີດອຸບັດເຫດ​ເຮືອ​ຫຼົ້ມຢູ່​ໃນມຽນ​ມາ ແລະ ສປ ກົງໂກ

    ເຈົ້າ​ໜ້າທີ່​ດັບ​ເພີງ​ມຽນ​ມາ ແຈ້ງ​ໃຫ້​ຮູ້ເມື່ອ​ວັນ​ທີ 16 ເມສາ​ນີ້​ວ່າ ໄດ້​ເກີດ​ອຸບັດເຫດ​ເຮືອ​ຫຼົ້ມ​ໃນ​ວັນ​ທີ 15 ເມສາ​ນີ້ ຊຶ່ງ​ເກີດ​ຂຶ້ນ​ຢູ່​ໃນ​ແຂວງ​ສະ​ກາຍ (ທາງ​ພາກ​ຕາເວັນຕົກ​ສຽງ​ເໜືອ​ມຽນ​ມາ) ເຮັດ​ໃຫ້​ມີ​ຜູ້​ເສຍ​ຊີວິດ 11 ຄົນ ແລະ ຍັງ​ອີກ​ຫຼາຍ​ຄົນ​ຫາຍ​ສາບ​ສູນ.

   ເຈົ້າ​ໜ້າທີ່​ດັ່ງກ່າວ ຢືນຢັນ​ວ່າ ເຮືອ​ລຳ​ດັ່ງກ່າວ​ໄດ້​ອອກ​ເດີນທາງ​ໄປ​ແຂວງ​ສະ​ກາຍ ເພື່ອ​ຮ່ວມ​ກິດຈະກຳ​ສະຫຼອງ​ບຸນ​ຫົດ​ນ້ຳ. ໃນ​ເຮືອ​ນັ້ນ​ມີ​ຜູ້ໂດຍສານ 40 ກວ່າ​ຄົນ ແລະ​ຖື​ວ່າ​ເປັນ​ການ​ບັນທຸກ​ເກີນ​ນ້ຳໜັກ​ຫຼາຍ.

    ຂ່າວ​ແຈ້ງວ່າ ຫຼັງ​ອຸບັດເຫດ​ເກີດ​ຂຶ້ນ​ແລ້ວ ມີ 36 ຄົນ​ໄດ້​ຮັບ​ການ​ຊ່ວຍເຫຼືອ​ຂຶ້ນ​ມາ​ໄດ້ ໃນ​ນີ້ ສອງ​ຄົນ​ໄດ້​ຮັບ​ການ​ຊ່ວຍເຫຼືອ ແລະ ​ຖືກ​ສົ່ງ​ໄປ​ໂຮງໝໍ ແຕ່​ໄດ້​ເສຍ​ຊີວິດ​ໃນ​ເວລາ​ຕໍ່​ມາ. ມາ​ເຖິງ​ວັນ​ທີ 16 ເມສາ ເຈົ້າ​ໜ້າທີ່​ກູ້​ໄພ​ສາມາດ​ຄົ້ນ​ພົບ​ສົບ​ຜູ້​ເສຍ​ຊີວິດ 9 ສົບ ແລະ ກຳລັງ​ສືບຕໍ່​ຄົ້ນ​ຫາ​ຜູ້​ຫາຍ​ສາບ​ສູນ​ຢູ່.

   ສ່ວນ​ທີ່​ສາທາລະນະ​ລັດ ປະຊາທິປະໄຕ ກົງ​ໂກ (​ສປ ກົງ​ໂກ) ແຫຼ່ງ​ຂ່າວ​ຈາກ​ທ້ອງຖິ່ນ ໃຫ້​ຮູ້​ວ່າ ມີ​ເຮືອ​ລຳ​ໜຶ່ງ​ປະສົບ​ໄພ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 3 ຄົນ ແລະ ຍັງ​ມີ​ຜູ້​ຫາຍ​ສາບ​ສູນ ອີກ​ກວ່າ 110 ຄົນ ໃນ​ຂະນະ​ທີ່​ເຈົ້າ​ໜ້າທີ່​ກູ້​ໄພ ຊ່ວຍເຫຼືອ​ຜູ້​ປະສົບ​ໄພ​ຂຶ້ນ​ມາ​ໄດ້​ປະມານ 30 ຄົນ. ເຫດການ​ດັ່ງກ່າວ ເກີດ​ຂຶ້ນ​ເມື່ອ​ວັນ​ທີ 15 ເມສາ​ທີ່​ຜ່ານ​ມາ ຢູ່​ໃນ​ໜອງ ກີ​ວູ ທີ່​ເປັນ​ໜຶ່ງ​ໃນ​ບັນດາ​ໜອງ​ໃຫຍ່​ໃນ​ທະວີບ​ອາ​ຟະ​ຣິກ​ກາ ຕັ້ງ​ຢູ່​ເຂດ​ຊາຍ​ແດນ ລະຫວ່າງ ​ສປ ກົງ​ໂກ ກັບ ຣູ​ອັນ​ດາ.

ຂ່າວທີ່ກ່ຽວຂ້ອງ