ຜະລິດກະສິກໍາສະອາດເປັນອາຊີບເສີມ ເພີ່ມລາຍຮັບໃຫ້ຄອບຄົວ

272 22 ມ.ສ. 2019 ຂ່າວໜ້າ​ໜຶ່ງ
ຜະລິດກະສິກໍາສະອາດເປັນອາຊີບເສີມ ເພີ່ມລາຍຮັບໃຫ້ຄອບຄົວ

    ປັດ­ຈຸ­ບັນ ພັກ-ລັດ­ຖະ­ບານ ໄດ້​ມີ​ນະ­ໂຍ­ບາຍ​ສົ່ງ­ເສີມ​ການ​ຜະ­ລິດ​ການ​ກະ­ສິ­ກຳ​ເປັນ​ສິນ­ຄ້າ ເພື່ອ​ຊຸກ­ຍູ້​ສົ່ງ­ເສີມ​ເສດ­ຖະ­ກິດ​ພາຍ​ໃນ​ຄອບ­ຄົວ​ໃຫ້​ມີ​ຄວາມ​ເຂັ້ມ­ແຂງ ເພື່ອ​ເຮັດ​ໃຫ້​ນະ­ໂຍ­ບາຍ​ດັ່ງ­ກ່າວ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ເປັນ​ຮູບ​ປະ​ທຳ​ນັ້ນ ທ່ານ ພູ​ໂຂງ ບັນ​ນາ​ວົງ ເປັນ​ຜູ້​ໜຶ່ງ​ທີ່​ໄດ້​ເຮັດ​ການ​ກະ­ສິ­ກຳ​ແບບ​ສະ­ອາດ​ເປັນ​ອາ­ຊີບ​ເສີມ ສ້າງ​ລາຍ​ຮັບ​ໃຫ້​ແກ່​ຄອບ­ຄົວ.

    ທ່ານ ພູ​ໂຂງ ບັນ­ນະ​ວົງ ເຈົ້າ​ຂອງ​ຟາມ​ແກນ​ມາ ໃຫ້​ສຳ­ພາດ​ວ່າ: ນອກ­ຈາກ​ເຮັດ​ວຽກ​ນຳ​ພັກ-ລັດ ໂດຍ​ອີງ­ໃສ່​ນະ­ໂຍ­ບາຍ​ຂອງ​ພັກ-ລັດ ໃນ​ການ​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ສ້າງ​ລາຍ​ຮັບ​ດ້ວຍ​ຕົນ​ເອງ ເພິ່ງ​ຕົນ​ເອງ ແລະ ກຸ້ມ​ຕົນ​ເອງ ດ້ວຍ​ເງື່ອນ­ໄຂ​ທີ່​ສະ­ດວກ ຈຶ່ງ​ໄດ້​ປຶກ­ສາ​ກັບ​ຄອບ­ຄົວ ເພື່ອ​ສ້າງ​ວຽກ ສ້າງ​ລາຍ​ຮັບ​ເພີ່ມ​ໃຫ້​ກັບ​ຄອບ­ຄົວ ແລະ ອີງ­ໃສ່​ເນື້ອ­ທີ່​ດິນ​ຂອງ​ຕົນ​ມີ​ຢູ່​ບ້ານ​ໂຊກ​ນ້ອຍ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ດັ່ງ­ນັ້ນ ຈຶ່ງ​ໄດ້​ຕົກ­ລົງ​ເຮັດ​ການ​ກະ­ສິ­ກຳ​ແບບ​ສະ­ອາດ ເລີ່ມ​ປີ 2016 ເປັນ­ຕົ້ນ​ມາ ໃນ​ນີ້ ທົດ​ລອງ​ປູກ​ໝາກ­ແຕງ​ສາຍ​ພັນ​ຂອງ​ຕ່າງ­ປະ­ເທດ ປະ­ກອບ​ມີ ເມ​ລັອນ​ພັນ​ໃຕ້​ຫວັນ ແລະ ເມ​ລັອນ​ພັນ​ຍີ່­ປຸ່ນ ນອກ​ນີ້ ຍັງ​ປູກ​ໝາກ­ອຶ ແລະ ໝາກ​ເລັ່ນ​ປະ­ສົມ​ປະ­ສານ​ກັນ​ໄປ ໃນ​ເນື້ອ­ທີ່​ປະ­ມານ 1 ເຮັກ­ຕາ ໃນ​ນັ້ນ ມີ​ໂຮງ​ປູກ​ໝາກ­ແຕງ​ຂະ­ໜາດ​ກວ້າງ 6 ແມັດ ແລະ ຍາວ 24 ແມັດ ຈຳ­ນວນ 5 ໂຮງ ແຕ່​ລະ​ໂຮງ​ປະ­ກອບ​ດ້ວຍ​ພື້ນ­ຖານ​ໂຄງ​ຮ່າງ​ທີ່​ແໜ້ນ­ໜາ.

    ສຳ­ລັບ​ວິ­ທີ​ການ​ປູກ​ໄດ້​ຊອກ​ຮຽນ​ຮູ້​ນຳ​ອິນ​ເຕີ​ເນັດ ແລະ ໝູ່­ຄູ່​ທີ່​ເຄີຍ​ເຮັດ​ມາ​ກ່ອນ ເຊິ່ງ​ຜ່ານ​ການ​ປູກ​ທົດ​ລອງ​ເບື້ອງ​ຕົ້ນ ໜ່ວຍ​ໝາກ­ແຕງ​ບໍ່​ງາມ ຈາກ​ນັ້ນ ໄດ້​ຖອດ​ຖອນ​ບົດ­ຮຽນ​ຈາກ​ການ​ປູກ​ຊຸດ​ກ່ອນ ແລະ ຖາມ​ຜູ້​ທີ່​ມີ​ປະ­ສົບ​ການ ແຕ່​ປັດ­ຈຸ­ບັນ​ເຫັນ​ວ່າ​ໜ່ວຍ​ໝາກ­ແຕງ​ງາມ ແລະ ເປັນ​ທີ່​ຍອມ­ຮັບ​ຂອງ​ຜູ້​ບໍ­ລິ­ໂພກ ເຊິ່ງ​ຕະ­ຫຼາດ​ຈຳ­ໜ່າຍ​ສ່ວນ​ໃຫຍ່​ແມ່ນ​ລູກ​ຄ້າ​ທາງ​ອອນ​ລາຍ ໝູ່​ເພື່ອນ​ຂອງ​ຄົນ​ໃນ​ຄອບ­ຄົວ ແລະ ຍາດ­ຕິ​ພີ່­ນ້ອງ ໃນ​ລາ­ຄາ​ກິ​ໂລ 30-40 ພັນ​ກີບ.

ຂ່າວທີ່ກ່ຽວຂ້ອງ