ມອບ-ຮັບສະຖານີວັດແທກລະດັບນ້ຳ ແລະ ຕິດຕາມສະພາບອາກາດ

278 22 ມ.ສ. 2019 ຂ່າວໜ້າ​ໜຶ່ງ
ມອບ-ຮັບສະຖານີວັດແທກລະດັບນ້ຳ ແລະ ຕິດຕາມສະພາບອາກາດ

    ພິ­ທີ​ມອບ-ຮັບ​ສະ­ຖາ­ນີ​ວັດ­ແທກ​ລະ­ດັບ​ນ້ຳ ແລະ ຕິດ­ຕາມ​ສະ­ພາບ​ອາ­ກາດ (ເຄື່ອງ​ໂທລະ​ມາດ) ຈັດ​ຂຶ້ນ​ວັນ​ທີ 19 ເມ­ສາ 2019 ຢູ່​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໂດຍ​ການ​ລົງ​ນາມ​ມອບ​ຂອງ​ທ່ານ ສຸ​ມາ­ນະ ຈຸ­ລາ­ມະ­ນີ ຫົວ­ໜ້າ​ກົມ​ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ ແລະ ລົງ​ນາມ​ຮັບ​ຂອງ​ທ່ານ ຂັນ​ມະ­ນີ ຂຸນ​ພົນ ຫົວ­ໜ້າ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ມີ​ທ່ານ ຈັນ​ແສງ ພິມ​ມະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ທ່ານ ໄຊ​ນະ­ຄອນ ອິນ​ທະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ມອບ-ຮັບ​ເຄື່ອງ​ດັ່ງ­ກ່າວ ແມ່ນ​ປະ­ຕິ­ບັດ​ຕາມ​ການ​ຮ່ວມ​ມື​ໂຄງ­ການ​ຄົ້ນ­ຄວ້າ-ທົດ​ລອງ​ນຳ​ໃຊ້​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໃນ​ການ​ຄຸ້ມ​ຄອງ​ຊັບ­ພະ­ຍາ­ກອນ​ນ້ຳ ເຊິ່ງ​ໄດ້​ຮັບ​ການ​ຊ່ວຍ­ເຫຼືອ​ຈາກ​ສະ​ຖາ​ບັນ​ຂໍ້​ມູນ​ຂ່າວ­ສານ​ຊັບ­ພະ­ຍາ­ກອນ​ນ້ຳ ແລະ ກະ­ສິ­ກຳ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຣາ​ຊະ​ອາ­ນາ­ຈັກ​ໄທ ກົມ​ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ ໃນ​ນາມ​ຄູ່​ຮ່ວມ​ມື​ຈຶ່ງ​ໄດ້​ຄົ້ນ­ຄວ້າ-ທົດ​ລອງ​ນຳ​ໃຊ້ ເຫັນ​ວ່າ​ເປັນ​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເໝາະ​ສົມ​ນຳ​ໃຊ້​ໃນ​ການ​ຕິດ­ຕາມ​ສະ­ພາບ​ອາ­ກາດ ລະ­ດັບ​ນ້ຳ ແລະ ປະ­ລິ­ມານ​ນ້ຳ​ຝົນ ເພື່ອ​ເປັນ​ການ​ຫຼຸດ­ຜ່ອນ​ໄພ​ທຳ​ມະ​ຊາດ ເປັນ­ຕົ້ນ ໄພ​ແຫ້ງ­ແລ້ງ ແລະ ໄພ​ນ້ຳ​ຖ້ວມ ຮັບ­ປະ­ກັນ​ໃຫ້​ມີ​ນ້ຳ​ໃຊ້​ໃນ​ການ​ຜະ­ລິດ​ກະ­ສິ­ກຳ​ໃນ​ລະ­ດູ­ແລ້ງ ແລະ ມີ​ນ້ຳ​ໃຊ້​ຕະ­ຫຼອດ​ລະ­ດູ​ການ ໂດຍ​ສະ­ເພາະ​ການ​ຜະ­ລິດ​ຂອງ​ຊາວ​ກະ­ສິ­ກອນ ເພື່ອ​ບັນ­ລຸ​ເປົ້າ​ໝາຍ​ການ​ພັດ­ທະ­ນາ ແລະ ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ.

ຂ່າວທີ່ກ່ຽວຂ້ອງ