ສຶກສາຄວາມເປັນໄປໄດ້ ໂຄງການເຂື່ອນໄຟຟ້ານ້ຳຕົກ ນ້ຳປະຍູ (ຕອນລຸ່ມ)

1.127 23 ມ.ສ. 2019 ຂ່າວໜ້າ​ໜຶ່ງ
ສຶກສາຄວາມເປັນໄປໄດ້ ໂຄງການເຂື່ອນໄຟຟ້ານ້ຳຕົກ ນ້ຳປະຍູ (ຕອນລຸ່ມ)

    ລັດ­ຖະ­ບານ​ແຫ່ງ ສປປ ລາວ ອະ­ນຸ­ຍາດ​ໃຫ້​ບໍ­ລິ­ສັດ ວຽງ​ຈັນ​ອໍ​ໂຕ​ເມ​ຊັນ​ແອນ​ໂຊ​ລູ​ຊັນ​ເອັນ​ຈີ​ເນຍ​ຣິ້ງ ຈຳ­ກັດ​ຜູ້​ດຽວ ສຶກ​ສາ​ຄວາມ​ເປັນ​ໄປ​ໄດ້ ໂຄງ­ການ​ເຂື່ອນ​ໄຟ­ຟ້າ​ນ້ຳ­ຕົກ ນ້ຳ​ປະ​ຍູ (ຕອນ​ລຸ່ມ) ຢູ່​ເມືອງ​ດາກ​ຈຶງ ແຂວງ​ເຊ​ກອງ ໂດຍ​ພິ­ທີ​ລົງ​ນາມ​ບົດ​ບັນ​ທຶ​ກູ​ຄວາມ​ເຂົ້າ­ໃຈ​ໂຄງ­ການ​ດັ່ງ­ກ່າວ ຈັດ​ຂຶ້ນ​ວັນ​ທີ 19 ເມ­ສາ 2019 ຢູ່​ກະ­ຊວງ​ແຜນ­ການ ແລະ ການ​ລົງ­ທຶນ (ຜທ) ລະ­ຫວ່າງ​ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ ຜທ ແລະ ທ່ານ ແສງ​ລາ­ຕີ ສະ­ຫວັນ​ຄຳ ຜູ້­ອຳ­ນວຍ­ການ​ບໍ­ລິ­ສັດ ວຽງ​ຈັນ​ອໍ​ໂຕ​ເມ​ຊັນ​ແອນ​ໂຊ​ລູ​ຊັນ​ເອັນ​ຈີ​ເນຍ​ຣິ້ງ ຈຳ­ກັດ​ຜູ້​ດຽວ ໂດຍ​ມີ​ບັນ­ດາ​ທ່ານ​ຮອງ​ລັດ­ຖະ­ມົນ­ຕີ ຮອງ​ເຈົ້າ­ແຂວງ​ເຊ​ກອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ແສງ​ລາ­ຕີ ສະ­ຫວັນ​ຄຳ ກ່າວ​ວ່າ: ຄວາມ​ຈິງ​ແລ້ວ​ການ​ສຶກ​ສາ​ສຳ​ຫຼວດ​ຄວາມ​ເປັນ​ໄປ​ໄດ້ ໃນ​ການ​ພັດ­ທະ­ນາ​ເຂື່ອນ​ໄຟ­ຟ້າ​ນ້ຳ­ຕົກ ນ້ຳ​ປະ​ຍູ ໄດ້​ຈັດ​ຕັ້ງ​ປະ­ຕິ­ບັດ​ແຕ່​ປີ 2014 ເປັນ­ຕົ້ນ​ມາ ໂດຍ​ມີ​ກຳ­ລັງ​ການ​ຕິດ​ຕັ້ງ 14,8 ເມ​ກາ​ວັດ ທີ່​ໄດ້​ຮັບ​ອະ­ນຸ­ຍາດ​ຈາກ​ອຳ­ນາດ​ການ​ປົກ­ຄອງ​ແຂວງ​ເຊ​ກອງ ແຕ່​ການ​ສຶກ​ສາ​ພົບ​ວ່າ​ມີ​ຄວາມ​ເໝາະ​ສົມ​ສຳ­ລັບ​ເຂື່ອນ​ທີ່​ມີ​ກຳ­ລັງ​ການ​ຕິດ​ຕັ້ງ​ຫຼາຍ​ກວ່າ ຍ້ອນ​ເຂດ​ດັ່ງ­ກ່າວ​ມີ​ຄວາມ​ອຸ­ດົມ­ສົມ­ບູນ​ໄປ​ດ້ວຍ​ແຫຼ່ງ​ນ້ຳ​ທຳ​ມະ​ຊາດ ມີ​ນ້ຳ​ຕະ­ຫຼອດ​ປີ ຕັ້ງ​ຢູ່​ເຂດ​ຫ່າງ​ໄກ​ສອກ­ຫຼີກ ມີ​ຜົນ​ກະ­ທົບ​ໜ້ອຍ​ທີ່​ສຸດ ແລະ ເໝາະ​ສົມ​ສຳ­ລັບ​ການ​ກໍ່­ສ້າງ​ເຂື່ອນ​ໄຟ­ຟ້າ​ທີ່​ມີ​ກຳ­ລັງ​ການ​ຕິດ​ຕັ້ງ 33 ເມ​ກາ​ວັດ ຈາກ​ນັ້ນ ລັດ­ຖະ­ບານ​ຈຶ່ງ​ໄດ້​ມອບ​ໃຫ້​ກະ­ຊວງ​ພະ­ລັງ­ງານ ແລະ ບໍ່​ແຮ່ ເປັນ​ຜູ້​ຄົ້ນ­ຄວ້າ​ດ້ານ​ມາດ­ຕະ­ຖານ​ເຕັກ­ນິກ​ກ່ຽວ​ກັບ​ການ​ສຶກ​ສາ​ຄວາມ​ເປັນ​ໄປ​ໄດ້ ແລະ ການ​ອອກ​ແບບ​ເບື້ອງ​ຕົ້ນ ພ້ອມ​ທັງ​ມີ​ຄຳ​ເຫັນ​ວ່າ​ມີ​ຄວາມ​ເປັນ​ໄປ​ໄດ້​ໃນ​ການ​ກໍ່­ສ້າງ​ເຂື່ອນ​ໃສ່​ບ່ອນ​ດັ່ງ­ກ່າວ ໃນ​ຂະ­ໜາດ​ກຳ­ລັງ​ການ​ຕິດ​ຕັ້ງ 33 ເມ​ກາ​ວັດ ບໍ­ລິ­ສັດ​ຂ້າ­ພະ­ເຈົ້າ​ຈຶ່ງ​ໄດ້​ປະ­ກອບ​ເອ­ກະ­ສານ ເພື່ອ​ຂໍ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ກັບ​ລັດ­ຖະ­ບານ​ຄືນ­ໃໝ່ ເຊິ່ງ​ໄດ້​ລົງ​ນາມ​ໃນ​ມື້­ນີ້

    ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ນ້ຳ­ຕົກ ນ້ຳ​ປະ​ຍູ (ຕອນ​ລຸ່ມ) ຖ້າ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ສຳ­ເລັດ ຈະ​ນຳ​ຜົນ​ປະ­ໂຫຍດ​ຢ່າງ​ຫຼວງ­ຫຼາຍ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ບັນ­ດາ​ແຂວງ​ພາກ​ໃຕ້ ໂດຍ​ສະ­ເພາະ​ເມືອງ​ດາກ​ຈຶງ ແຂວງ​ເຊ​ກອງ ນອກ​ນີ້ ໂຄງ­ການ​ຍັງ​ຈະ​ເຮັດ​ໃຫ້​ປະ­ຊາ­ຊົນ​ທ້ອງ­ຖິ່ນ ມີ​ວຽກ​ເຮັດ​ງານ​ທຳ​ຖາ­ວອນ ມີ​ລາຍ​ຮັບ ແລະ ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ເຂົາ­ເຈົ້າ​ດີ​ຂຶ້ນ​ເປັນ​ກ້າວໆ.

ຂ່າວທີ່ກ່ຽວຂ້ອງ