ຮ່ວມກັນສ້າງບໍລິສັດຄວບຄຸມລະບົບຊຳລະທຸລະກຳການເງິນ

1.082 23 ມ.ສ. 2019 ຂ່າວໜ້າ​ໜຶ່ງ
ຮ່ວມກັນສ້າງບໍລິສັດຄວບຄຸມລະບົບຊຳລະທຸລະກຳການເງິນ

    ວັນ​ທີ 22 ເມ­ສາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ 7 ທະ­ນາ­ຄານ​ທຸ­ລະ​ກິດ​ສຳ­ຄັນ​ຂອງ ສປປ ລາວ ຄື: ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ ທະ­ນາ­ຄານ​ພັດ­ທະ­ນາ​ລາວ ທະ­ນາ­ຄານ​ສົ່ງ­ເສີມ​ກະ­ສິ­ກຳ ທະ­ນາ­ຄານ​ຮ່ວມ​ທຸ­ລະ​ກິດ​ລາວ-ຫວຽດ­ນາມ ທະ­ນາ­ຄານ​ຮ່ວມ​ພັດ­ທະ­ນາ ທະ­ນາ­ຄານ​ເອັສ​ທີ ຈຳ­ກັດ ແລະ ທະ­ນາ­ຄານ​ບີ​ໄອ​ຊີ​ລາວ ຈຳ­ກັດ ໄດ້​ພ້ອມ​ກັນ​ຈັດ​ຕັ້ງ​ພິ­ທີ​ລົງ​ນາມ​ໃນ​ບົດ​ບັນ­ທຶກ​ຄວາມ​ເຂົ້າ­ໃຈ​ຮ່ວມ​ກັນ ເພື່ອ​ສ້າງ­ຕັ້ງ​ບໍ­ລິ­ສັດ ລາວ​ເນ​ເຊີນ​ນໍ ເພ​ເມັ້ນ ເນັດ​ເວີກ ຈຳ­ກັດ ເຊິ່ງ​ເປັນ​ບໍ­ລິ­ສັດ​ທີ່​ຈະ​ມາ​ເຮັດ​ໜ້າ­ທີ່​ຄວບ​ຄຸມ​ລະ­ບົບ​ການ​ຊຳ­ລະ​ທຸ­ລະ​ກຳ​ຍ່ອຍ ທີ່​ໄດ້​ກຳ­ນົດ​ມາດ­ຖານ​ເງື່ອນ­ໄຂ​ຈະ­ແຈ້ງ​ໄວ້​ໃນ​ກົດ­ໝາຍ ລະ­ບົບ​ຊຳ­ລະ​ເລກ​ທີ 32/ສພຊ ລົງ​ວັນ​ທີ 7 ພະ­ຈິກ 2017 ໂດຍ​ການ​ລົງ​ນາມ​ຂອງ​ຜູ້­ອຳ­ນວຍ­ການ ແລະ ຜູ້­ຕາງ­ໜ້າ​ຈາກ 7 ທະ­ນາ­ຄານ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຈຸດ­ປະ­ສົງ​ຂອງ​ການ​ສ້າງ­ຕັ້ງ​ບໍ­ລິ­ສັດ​ດັ່ງ­ກ່າວ​ນີ້ ເພື່ອ​ມາ​ອຳ­ນວຍ​ຄວາມ​ສະ­ດວກ​ໃຫ້​ແກ່​ສັງ­ຄົມ​ລາວ ໃນ​ການ​ຊຳ­ລະ​ສະ​ສາງ​ເງິນ​ໃຫ້​ມີ​ຄວາມ​ທັນ​ສະ­ໄໝ ສະ­ດວກ ວ່ອງ­ໄວ ແລະ ເຊື່ອ​ຖື​ໄດ້ ເຊິ່ງ​ເປັນ​ອົງ​ປະ­ກອບ​ທີ່​ສຳ­ຄັນ ໃຫ້​ແກ່​ພື້ນ­ຖານ​ເສດ­ຖະ­ກິດ​ໃຫ້​ມີ​ການ​ຂະ­ຫຍາຍ­ຕົວ​ແບບ​ຍືນ​ຍົງ ທັງ​ເປັນ​ການ​ຫຼຸດ­ຜ່ອນ​ການ​ນຳ​ໃຊ້​ເງິນ­ສົດ​ໃນ​ສັງ­ຄົມ ແລະ ສົ່ງ­ເສີມ​ໃຫ້​ເງິນ​ກີບ​ເປັນ​ສະ­ກຸນ​ເງິນ​ດຽວ​ທີ່​ໃຊ້​ໃນ​ການ​ຊຳ­ລະ​ສະ​ສາງ​ໃນ ສປປ ລາວ ໂດຍ​ຜ່ານ​ກົນ​ໄກ​ເອ​ເລັກ​ໂຕຣ​ນິກ ແລະ ການ​ພັດ­ທະ­ນາ​ລະ­ບົບ​ຊຳ­ລະ ລະ­ຫວ່າງ​ທະ­ນາ­ຄານ​ພາຍ​ໃນ​ໃຫ້​ບັນ­ລຸ​ຄຳ​ຂວັນ​ທີ່​ວ່າ “ທຸກ​ທີ່​ທຸກ​ເວ­ລາ ແລະ ທຸກ​ເຄື່ອງ­ມື​ການ​ຊຳ­ລະ” ຕາມ​ລະ­ດັບ​ຄາດ­ໝາຍ​ທີ່​ວາງ​ໄວ້ ໃນ​ແຜນ​ຍຸດ​ທະ​ສາດ​ພັດ­ທະ­ນາ​ລະ­ບົບ​ສະ​ຖາ​ບັນ​ການ​ເງິນ-ເງິນ­ຕາ​ຂອງ ສປປ ລາວ ໄລ­ຍະ 10 ປີ (2016-2025) ແລະ ວິ­ໄສ​ທັດ​ຮອດ​ປີ 2030 ເນື່ອງ​ຈາກ​ວ່າ­ການ​ນຳ​ໃຊ້​ເງິນ­ສົດ​ແມ່ນ​ມີ​ຂໍ້​ຫຍຸ້ງ­ຍາກ ແລະ ມີ​ຕົ້ນ​ທຶນ​ສູງ​ເກີດ​ຂຶ້ນ ນັບ​ແຕ່​ຂະ​ບວນ​ການ​ກະ­ກຽມ​ພິມ​ຈຳ­ໜ່າຍ​ເງິນ​ໃໝ່ ການ​ເກັບ​ຮັກ­ສາ ການ​ເຄື່ອນ​ຍ້າຍ ການ​ກວດ​ນັບ ການ​ຄັດ​ແຍກ​ເງິນ​ເກົ່າ​ອອກ​ໄປ​ທຳ­ລາຍ ແລະ ການ​ໝູ­ນວຽນ​ປະ­ລິ­ມານ​ເງິນ​ທີ່​ຫຼາຍ​ຂຶ້ນ ເຮັດ​ໃຫ້​ຕົ້ນ​ທຶນ​ດັ່ງ­ກ່າວ​ຍິ່ງ​ເພີ່ມ​ສູງ​ຂຶ້ນ​ເຊັ່ນ​ກັນ ພ້ອມ​ນັ້ນ ການ​ນຳ​ໃຊ້​ເງິນ­ສົດ​ຍັງ​ເປັນ​ສາ­ເຫດ​ທີ່​ພາ­ໃຫ້​ເກີດ​ປາ­ກົດ­ການ​ຫຍໍ້­ທໍ້​ຂຶ້ນ​ໃນ​ສັງ­ຄົມ ເຊັ່ນ: ການ​ປຸ້ນ​ຈີ້​ຊີງ​ຊັບ ຂີ້­ລັກ​ງັດ​ແງະ ການ​ສໍ້​ໂກງ​ຫຼອກ​ຫຼວງ ການ​ປອມ​ແປງ​ທະ​ນາ​ບັດ ແລະ ອື່ນໆ.

ຂ່າວທີ່ກ່ຽວຂ້ອງ