ເກີດເຫດການແຜ່ນດິນໄຫວ 6,1 ອົງສາຣິກເຕີ ຢູ່ໃນຟີລິບປິນ

483 24 ມ.ສ. 2019 ຂ່າວຕ່າງປະເທດ
ເກີດເຫດການແຜ່ນດິນໄຫວ 6,1 ອົງສາຣິກເຕີ ຢູ່ໃນຟີລິບປິນ

    ເຈົ້າ​ໜ້າທີ່​ຟີ​ລິບ​ປິນ ລາຍ​ງານ​ໃນ​ວັນ​ທີ 23 ເມສາ​ນີ້​ວ່າ ຈາກ​ການ​ລາຍ​ງານ​ເບື້ອງ​ຕົ້ນ ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ແລ້ວ​ຢ່າງ​ໜ້ອຍ 9 ຄົນ ແລະ ບາດເຈັບ​ອີກ 20 ຄົນ ຈາກ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ໄດ້ 6,1 ອົງສາ​ຣິກ​ເຕີ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 22 ເມສາ​ນີ້ ທີ່​ເມືອງ ກູ​ຕັດ ເທິງ​ເກາະ​ລູ​ຊອນ.

    ເຈົ້າ​ໜ້າທີ່​ຕຳຫຼວດ​ໃນ​ທ້ອງຖິ່ນ ໃຫ້​ຮູ້​ວ່າ ໃນ​ຈຳນວນ​ຜູ້​ເສຍ​ຊີວິດ​ນັ້ນ ມີ 5 ຄົນ​ຖືກ​ເຮືອນ​ພັງ ຖະ​ຫຼົ່ມ​ທັບ ໃນ​ຂະນະ​ທີ່​ອີກ 4 ຄົນ ຖືກ​ຄົ້ນ​ພົບ​ເປັນ​ສົບ​ຢູ່​ໃນ​ຊາກ​ຫັກ​ພັງ ຂອງ​ອາຄານ​ຮ້ານ​ສັບພະ​ສິນຄ້າ​ແຫ່ງ​ໜຶ່ງ. ໃນ​ຂະນະ​ດຽວ​ກັນ ວຽກ​ງານ​ກູ້​ໄພ​ຍັງ​ຄົງ​ສືບຕໍ່​ດຳເນີນ ຍ້ອນ​ວ່າ​ກອງ​ກຳລັງ​ທີ່​ກ່ຽວຂ້ອງ ຍັງ​ບໍ່​ທັນ​ກຳ​ໄດ້​ຢ່າງ​ຊັດ​ເຈນ ວ່າ​ມີ​ຜູ້​ຕິດ​ຄ້າງ​ເທົ່າໃດ​ຢູ່​ໃຕ້​ຊາກ​ຫັກ​ພັງ ຂອງ​ຮ້ານ​ສັບພະ​ສິນຄ້າ​ນັ້ນ ແລະ​ວ່າ​ຕົວ​ເລກ​ຜູ້​ເສຍ​ຊີວິດ ອາດ​ຈະ​ຍັງ​ເພີ່ມ​ຂຶ້ນ​ອີກ.

   ຢ້ອນ​ຄືນ​ຫຼັງ ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້ 7,8 ອົງສາ​ຣິກ​ເຕີ ກໍ​ໄດ້​ເກີດ​ຂຶ້ນ​ເມື່ອ​ເດືອນ​ກໍລະກົດ ປີ 1990 ຊຶ່ງ​ໃນ​ຄັ້ງ​ນັ້ນ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ ປະມານ 2.000 ຄົນ ຢູ່​ໃນ​ເຂດ​ພາກ​ເໜືອ ແລະ ພາກ​ກາງ​ເກາະ​ລູ​ຊອນ.

ຂ່າວທີ່ກ່ຽວຂ້ອງ