ສີລັງກາ ປະກາດພາວະສຸກເສີນລະດັບຊາດ

493 24 ມ.ສ. 2019 ຂ່າວຕ່າງປະເທດ
ສີລັງກາ ປະກາດພາວະສຸກເສີນລະດັບຊາດ

    ຂ່າວສານ AFP ລາຍ​ງານ​ວ່າ ວັນ​ທີ 22 ເມສາ​ນີ້ ທາງ​ການ​ສີ​ລັງກາ ໄດ້​ປະກາດ​ພາວະ​ສຸກ​ເສີນ​ລະດັບ​ຊາດ ຊຶ່ງ​ມີ​ອອກ​ມາ​ບໍ່​ພໍ​ເທົ່າໃດ​ຊົ່ວໂມງ ຫຼັງ​ຈາກ​ທີ່​ລັດຖະບານ​ສີ​ລັງກາ ກ່າວ​ຫາ National Thowheeth Jama'ath (NTJ) ຊຶ່ງ​ເປັນ​ກຸ່ມ​ມຸ​ສລິມ​ໃນ​ທ້ອງຖິ່ນ ວ່າ​ເປັນ​ຜູ້​ທີ່​ໄດ້​ດຳເນີນ​ການ​ວາງ​ລະເບີດ​ສະລະ​ຊີບ​ຫຼາຍ​ລາຍ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 290 ຄົນ (ໃນ​ນັ້ນ​ມີ​ຊາວ​ຕ່າງປະເທດ​ລວມ​ຢູ່​ນຳ​ຫຼາຍ​ຄົນ) ແລະ ໄດ້​ຮັບ​ບາດເຈັບ​ອີກ​ປະມານ 500 ຄົນ.

ອົງການ​ທີ່​ກ່ຽວຂ້ອງ​ຂອງ​ສີ​ລັງກາ ໃຫ້​ຮູ້​ວ່າ ຜູ້​ຕ້ອງ​ສົງ​ໃສ​ກໍ່​ເຫດ 24 ຄົນ ໄດ້​ຖືກ​ຈັບ​ຕົວ ຫຼັງ​ເກີດ​ເຫດການ​ໂຈມ​ຕີ​ຫຼາຍ​ລາຍ ເມື່ອ​ວັນ​ທີ 21 ເມສາ​ນີ້ ໂດຍ​ເກີດ​ຂຶ້ນ​ຢູ່​ໃນ​ໂບດ 3 ແຫ່ງ ແລະ​ໂຮງແຮມ 3 ແຫ່ງ ຢູ່​ໃນ​ນະຄອນຫຼວງ ໂກ​ລົມ​ໂບ ແລະ ​ແຫ່ງ​ອື່ນໆ​ອີກ​ຈຳນວນ​ໜຶ່ງ.

    ຂ່າວ​ແຈ້ງວ່າ ພາວະ​ສຸກ​ເສີນ​ແຫ່ງ​ຊາດ​ດັ່ງກ່າວ ໄດ້​ມອບ​ສິດ​ພິເສດ​ໃຫ້​ແກ່​ຕຳຫຼວດ ແລະ ກອງທັບ​ສີ​ລັງກາ ເພື່ອ​ຕ້ານ​ກັບ​ການ​ໂຈມ​ຕີ​ດ້ວຍ​ອາວຸດ ໂດຍ​ມີ​ຜົນ​ບັງຄັບ​ໃຊ້ ນັບ​ແຕ່​ເວລາ 18 ໂມງ 30 ນາທີ (ເວລາ GMT) ຂອງ​ວັນ​ທີ 22 ເມສາ​ນີ້​ເປັນຕົ້ນ​ໄປ. ເຈົ້າ​ໜ້າທີ່​ກ່ຽວຂ້ອງ ສາມາດ​ຈັບ​ກຸມ​ຜູ້​ຕ້ອງ​ສົງ​ໃສ ໂດຍ​ທີ່​ບໍ່​ຈຳເປັນ​ຕ້ອງ​ມີ​ຄຳ​ສັ່ງ​ຈາກ​ສານ. ໃນ​ຂະນະ​ດຽວ​ກັນ ສີ​ລັງກາ ກໍ​ຢູ່​ໃນ​ພາວະ​ຫ້າມ​ສັນຈອນ​ໃນ​ຍາມ​ກາງຄືນ ເປັນ​ຄືນ​ທີ​ສອງ​ຕິດຕໍ່​ກັນ ນັບ​ແຕ່​ເກີດ​ເຫດການ​ໂຈມ​ຕີ ດັ່ງກ່າວ​ເປັນຕົ້ນ​ມາ.

ຂ່າວທີ່ກ່ຽວຂ້ອງ