ຂ່າວຫຼ້າສຸດ

UNICEF ຜັນ​ຂະຫຍາຍ​ບັ້ນ​ສັກ​ຢາ​ກັນ​ພະຍາດ​ໃນ​ທົ່ວ​ໂລກ

561 24 ມ.ສ. 2019 ຂ່າວຕ່າງປະເທດ
UNICEF  ຜັນ​ຂະຫຍາຍ​ບັ້ນ​ສັກ​ຢາ​ກັນ​ພະຍາດ​ໃນ​ທົ່ວ​ໂລກ

    ກອງ​ທຶນ​ສຳລັບ​ເດັກນ້ອຍ ຂອງ​ສະຫະ​ປະຊາ​ຊາດ (UNICEF) ແຈ້ງ​ໃຫ້​ຮູ້ເມື່ອ​ວັນ​ທີ 18 ເມສາ​ທີ່​ຜ່ານ​ມາ ວ່າ​ຈະ​ຜັນ​ຂະຫຍາຍ​ບັ້ນ​ເຄື່ອນ​ໄຫວ​ໃນ​ທົ່ວ​ໂລກ ເພື່ອ​ນຳ​ເອົາ​ຖະແຫຼງການ​ໄປ​ຍັງ​ຜູ້​ປົກຄອງ ແລະ​ຜູ້​ໃຊ້​ສື່​ສັງຄົມ ໄດ້​ຮູ້​ກ່ຽວ​ກັບ​ປະສິດທິພາບ ແລະ ຄວາມ​ປອດ​ໄພ​ຂອງ​ການ​ສັກ​ວັກ​ແຊງ​ປ້ອງ​ກັນ​ພະຍາດ.

   UNICEF ໃຫ້​ຮູ້​ວ່າ ບັ້ນ​ເຄື່ອນ​ໄຫວ​ດັ່ງກ່າວ​ເອີ້ນ​ວ່າ ສັບປະດາ​ສັກ​ຢາ​ກັນ​ພະຍາດ​ທົ່ວ​ໂລກ ໂດຍ​ຄາດ​ວ່າ ຈະ​ມີ​ຂຶ້ນ​ແຕ່​ວັນ​ທີ 24-30 ເມສາ​ນີ້ ເພື່ອ​ສົ່ງ​ຖະແຫຼງການ​ອອກ​ໄປ​ວ່າ ຊຸມ​ຊົນ ອັນ​ປະກອບ​ດ້ວຍ​ຜູ້​ປົກຄອງ ສາມາດ​ປ້ອງ​ກັນ​ທຸກໆ​ຄົນ​ດ້ວຍ​ການ​ສັກ​ວັກ​ແຊງ.

   ທ່າມກາງ​ທ່າ​ອ່ຽງ​ການ “ບໍ່​ສົນໃຈ” ຕໍ່​ການ​ສັກ​ວັກ​ແຊງ​ໃນ​ໝູ່​ເດັກນ້ອຍ ພວມ​ແຜ່​ກວ້າງ​ອອກ​ນັ້ນ ໃນ​ປີ​ນີ້ UNICEF ພ້ອມ​ດ້ວຍ​ກອງ Bill & Melinda Gates ອົງການ​ອະນາໄມ​ໂລກ (WHO) ແລະ​ສະຫະພາບ​ທົ່ວ​ໂລກ​ກ່ຽວ​ກັບ​ວັກ​ແຊງ ແລະ ສັກ​ຢາ​ກັນ​ພະຍາດ (Gavi) ມີ​ແຜນການ​ຜັນ​ຂະຫຍາຍ​ບັ້ນ #VaccinesWork ຜ່ານ​ທາງ​ສື່​ສັງຄົມ.

   UNICEF ໃຫ້​ຮູ້​ວ່າ ໃນ​ແຕ່​ລະ​ປີ​ມີ​ຜູ້​ເອົາ​ຊີວິດ​ລອດ​ໄດ້​ເຖິງ 3 ລ້ານ​ຄົນ​ຍ້ອນ​ວັກ​ແຊງ. UNICEF ໃຫ້ການ​ຄິດໄລ່​ວ່າ 1 ໂດ​ລາ​ສະຫະລັດ​ໃດ ທີ່​ຈັດ​ສັນ​ໃຫ້​ແກ່​ການ​ສັກ​ວັກ​ແຊງ​ຕັ້ງແຕ່​ເວລາ​ຍັງ​ນ້ອຍ ຈະ​ຊ່ວຍ​ໃຫ້​ປະຊາຊົນ​ປະຢັດ​ໄດ້ 44 ໂດ​ລາ​ສະຫະລັດ ໃນ​ອະນາຄົດ.

ຂ່າວທີ່ກ່ຽວຂ້ອງ