ຂ່າວຫຼ້າສຸດ

ປ່າອາມາຊອນ ສູນເສຍເນື້ອທີ່ປ່າດົງດິບໄປ 30 ລ້ານເຮັກຕາ ພາຍໃນເວລາ 17 ປີ

1.211 24 ມ.ສ. 2019 ຂ່າວຕ່າງປະເທດ
ປ່າອາມາຊອນ ສູນເສຍເນື້ອທີ່ປ່າດົງດິບໄປ 30 ລ້ານເຮັກຕາ ພາຍໃນເວລາ 17 ປີ

    ບົດ​ລາຍ​ງານ​ວິທະຍາສາດ​ສະບັບ​ໜຶ່ງ ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ບໍ່​ດົນ​ມາ​ນີ້ ໃຫ້​ຮູ້​ວ່າ ປ່າ​ເຂດ​ຮ້ອນ ອາ​ມາ​ຊອນ (Amazon) ທີ່​ມີ​ຂະໜາດ​ໃຫຍ່​ທີ່​ສຸດ​ໃນ​ໂລກ​ນັ້ນ ໄດ້​ສູນ​ເສຍ​ປ່າດົງ​ດິບ​ໄປ 30 ລ້ານ​ເຮັກຕາ ພາຍ​ໃນ 17 ປີ​ທຳ​ອິດ​ຂອງ​ສະຫັດ​ສະ​ວັດ​ນີ້.

     ທີ່​ກ່າວ​ມາ​ນັ້ນ ເປັນ​ການ​ສະຫຼຸບ​ຂອງ Ecociencia ສາຂາ​ປະຈຳ​ເອ​ກົວ​ດໍ ຂອງ​ອົງການ​ເຄືອ​ຂ່າຍ​ຂໍ້​ມູນ​ຂ່າວສານ​ສັງຄົມ-ສິ່ງແວດລ້ອມ​ອາ​ມາ​ຊອນ  (Raisg) ໂດຍ​ຜ່ານ​ການ​ໃຊ້ MapBiomas ໃນ​ໄລຍະ​ປີ 2000-2017. Ecociencia ໃຫ້ການ​ຄາດ​ຄະເນ​ວ່າ ສະເພາະ​ແຕ່​ເນື້ອທີ່​ປ່າດົງ​ດິບ​ຂອງ​ອາ​ມາ​ຊອນ ທີ່​ສູນ​ເສຍ​ໄປ​ໃນ​ໄລຍະ​ເວລາ​ດັ່ງກ່າວ ມີ​ເທົ່າໆ​ກັບ​ເນື້ອທີ່​ຂອງ​ປະເທດ​ເອ​ກົວ​ດໍ.

   ເຄື່ອງມື MapBiomas ໄດ້​ຕິດຕາມ ແລະ ກຳນົດ​ທີ່​ຕັ້ງ​ຂອງ​ຄວາມ​ປ່ຽນແປງ ກ່ຽວ​ກັບ​ການ​ນຳ​ໃຊ້​ພື້ນ​ດິນ​ຢູ່​ໃນ​ທົ່ວ​ເຂດ​ອາ​ມາ​ຊອນ ພ້ອມ​ກັນ​ນັ້ນ​ກໍ​ຕິດຕາມ​ຄວາມ​ກົດ​ດັນ ແລະ​ການ​ຄຸກ​ຄາມ​ຕໍ່​ພືດ​ຂອງ​ເຂດ​ປ່າ ທີ່​ໄດ້​ຮັບ​ຂະໜານ​ນາມ​ວ່າ​ເປັນ “ປອດ​ຂອງ​ໂລກ” ນັ້ນ.

     ບັນດາ​ຂໍ້​ມູນ​ທີ່​ໄດ້​ຮັບ​ການ​ວິໄຈ​ນັ້ນ ແມ່ນ​ຂຶ້ນ​ກັບ​ດິນແດນ​ຂອງ​ທຸກໆ​ປະເທດ ທີ່​ຕັ້ງ​ຢູ່​ໃນ​ຫຼົ້ງ​ອາ​ມາ​ຊອນ ອັນ​ປະກອບ​ດ້ວຍ ບຣາ​ຊີ​​ລ ເປ​ຣູ ໂກ​ລົມ​ບີ ເວ​ເນ​ຊູ​ເອ​ລາ ໂບ​ລີ​ວີ ເອ​ກົວ​ດໍ ກຸຍ​ຢາ​ນາ ແລະ ຊູ​ຣີ​ນາມ; ແລະ 6 ລະບົບ​ນິເວດ​ທີ່​ແຕກ​ຕ່າງ​ກັນ ອັນ​ປະກອບ​ດ້ວຍ Amazon Cerrado Pantanal Andes Chaco-Chiquitano ແລະTucumano ຂອງ​ໂບ​ລີ​ວີ.

ຂ່າວທີ່ກ່ຽວຂ້ອງ