ກິນນ້ຳຕານ-ເກືອ-ຊີ້ນ ຫຼາຍເກີນໄປ ເປັນຜົນຮ້າຍຕໍ່ສຸຂະພາບ

1.153 24 ມ.ສ. 2019 ຂ່າວຕ່າງປະເທດ
ກິນນ້ຳຕານ-ເກືອ-ຊີ້ນ ຫຼາຍເກີນໄປ ເປັນຜົນຮ້າຍຕໍ່ສຸຂະພາບ

    5 ກໍລະນີ​ໃດ​ຂອງ​ຜູ້​ເສຍ​ຊີວິດ​ຢູ່​ໃນ​ໂລກ ແມ່ນ​ມີ 1 ກໍລະນີ ເປັນ​ຍ້ອນ​ການ​ກິນ​ດື່ມ​ບໍ່​ເໝາະ​ສົມ ເມື່ອ​ບໍລິໂພກ​ນ້ຳຕານ ເກືອ ແລະ ຊີ້ນ ຫຼາຍ​ເກີນ​ໄປ ແລະ​ ນັ້ນ​ກໍ​ເປັນ​ສາ​ເຫດການ​ເສຍ​ຊີວິດ​ຂອງ 11 ລ້ານ​ຄົນ​ຢູ່​ໃນ​ທົ່ວ​ໂລກ ພາຍ​ໃນ​ປີ 2017 ຊຶ່ງ​ສ່ວນ​ໃຫຍ່​ແມ່ນ​ພົວພັນ​ເຖິງ​ພະຍາດຫົວໃຈ ແລະ ເສັ້ນເລືອດ. ໃນ​ຂະນະ​ດຽວ​ກັນ ສະຫະ​ປະຊາ​ຊາດ (​ສປຊ) ໃຫ້ການ​ຄ່າດ​ຄະເນ​ວ່າ ມີ​ເກືອບ 1 ຕື້ ຄົນ​ຢູ່​ໃນ​ທົ່ວ​ໂລກ ພວມ​ປະ​ເຊີນ​ກັບ​ການ​ຂາດ​ໂພ​ສະ​ນາ​ການ ໃນ​ຂະນະ​ທີ່​ມີ​ເກືອບ 2 ຕື້ ຄົນ ພັດ “ເຫຼືອ​ທາດ​ອາຫານ.”

   ເຖິງ​ຢ່າງໃດ​ກໍ​ຕາມ ການ​ຄົ້ນຄວ້າ​ໃໝ່​ຫຼ້າ​ສຸດ ກ່ຽວ​ກັບ​ທ່າ​ອ່ຽງ​ການ​ກິນ​ການ​ດື່ມ ໃນ​ທົ່ວ​ໂລກ ແຕ່​ປີ 1990-2017 ຊຶ່ງ​ມີ​ຜົນ​ລົງ​ພິມ​ໃນ​ວາລະສານ The Lancet ສະບັບ​ລົງ​ວັນ​ທີ 3 ເມສາ​ທີ່​ຜ່ານ​ມາ ຊີ້​ໃຫ້​ເຫັນ​ວ່າ ຢູ່​ໃນ 195 ປະເທດ​ທີ່​ໄດ້​ດຳເນີນ​ການ​ຄົ້ນຄວ້າ​ນັ້ນ ເຫັນ​ວ່າ​ເກືອບ​ທຸກໆ​ຄົນ​ພວມ​ຮັບ​ປະທານ​ອາຫານ​ທີ່​ບໍ່​ເປັນ​ຜົນ​ດີ​ຕໍ່​ສຸຂະພາບ​ຫຼາຍ​ເກີນ​ໄປ ໃນ​ຂະນະ​ທີ່​ພວກ​ອາຫານ​ທີ່​ມີ​ຕໍ່​ຜົນ​ດີ​ຕໍ່​ສຸຂະພາບ​ນັ້ນ ພັດ​ຮັບ​ປະທານ​ໜ້ອຍ​ເກີນ​ໄປ.

    ໃນ​ຄວາມ​ເປັນ​ຈິງ​ແລ້ວ ປະຊາຊົນ​ໃນ​ໂລກ ພວມ​ບໍລິໂພກ​ເຄື່ອງ​ດື່ມ​ທີ່​ມີ​ນ້ຳຕານ ແລະ ແກ​​ັສ ສູງ​ທົບ 10 ເທົ່າ​ເມື່ອ​ທຽບໃສ່​ລະດັບ​ແຈ້ງ​ເຕືອນ ແລະ​ປະລິມານ ນາ​ຕຣີ (natri) ຢູ່​ໃນ​ຮ່າງກາຍ​ຂອງ​ແຕ່ລະຄົນ​ກໍ​ພວມ​ສູງ​ກວ່າ​ເຖິງ 86% ຂອງ​ລະດັບ​ທີ່​ຖື​ວ່າ​ມີ​ຄວາມ​ປອດ​ໄພ. ການ​ຄົ້ນຄວ້າ​ດັ່ງກ່າວ ກໍ​ແຈ້ງ​ເຕືອນ​ເຖິງ​ຄວາມ​ເປັນ​ຈິງ​ທີ່​ມີ​ຫຼາຍ​ຄົນ ບໍລິໂພກ​ໜ້ອຍ​ເກີນ​ໄປ ສຳລັບ​ພວກ​ທາດ​ແປ້ງ​ທີ່​ຍັງ​ເປັນ​ເມັດ ໝາກ​ໄມ້ ພວກ​ພືດ​ທີ່​ເປັນ​ເມັດ ໃນ​ຂະນະ​ທີ່​ພືດ​ເຫຼົ່ານັ້ນ ຊ່ວຍ​ຮັກສາ​ໃຫ້​ມີ​ວິຖີ​ຊີວິດ​ທີ່​ແຂງແຮງ.

    ຈາກ​ສະພາບ​ຄວາມ​ເປັນ​ຈິງ​ຄື​ແນວ​ນັ້ນ ບົດ​ລາຍ​ງານ​ດັ່ງກ່າວ ໄດ້​ແຈ້ງ​ເຕືອນ​ໄປ​ຍັງ​ປະຊາຊົນ​ໃນ​ທົ່ວ​ໂລກ ວ່າ​ຄວນ​ນຳ​ໃຊ້​ລະບອບ​ການ​ກິນ​ດື່ມ​ທີ່​ມີ​ອຸດົມ​ການ​ດີ​ຕໍ່​ສຸຂະພາບ ຊຶ່ງ​ຕາມ​ນັ້ນແລ້ວ​ກໍ​ແມ່ນ​ຄວນ​ເພີ່ມ​ປະລິມານ​ພວກ​ພືດ​ທີ່​ຍັງ​ເປັນ​ເມັດ ໝາກ​ໄມ້ ຜັກ ພືດ​ປະເພດ​ເປັນ​ຫົວ ຂຶ້ນ​ທົບ​ເທົ່າ​ຕົວ ໃນ​ຂະນະ​ທີ່​ຄວນ​ຫຼຸດ​ປະລິມານ​ຊີ້ນ ແລະ ນ້ຳຕານ​ລົງ​ເຄິ່ງ​ໜຶ່ງ. ການ​ນຳ​ໃຊ້​ລະບອບ​ການ​ກິນ​ດື່ມ​ດັ່ງກ່າວ ບໍ່​ສະເພາະ​ແຕ່​ເປັນ​ການ​ຊ່ວຍ​ຫຼຸດຜ່ອນ​ອັດຕາ​ສ່ວນ​ຂອງ​ນ້ຳໜັກ​ຮ່າງກາຍ​ເກີນ​ມາດຕະຖານ​ເທົ່າ​ນັ້ນ ຫາກ​ຍັງ​ເປັນ​ການ​ຫຼີກ​ເວ​ັ້ນ “ໄພພິບັດ” ການ​ປ່ຽນແປງ​ສະພາບ​ດິນ​ຟ້າ​ອາກາດ​ໄດ້​ນຳ​ອີກ.

ຂ່າວທີ່ກ່ຽວຂ້ອງ