ລົງໃຕ້

2.395 24 ມ.ສ. 2019 ນານາສາລະ

    ເດືອນ​ກ່ອນ ເຄີຍ​ຂຽນ​ເລື່ອງ​ຂຶ້ນ​ເໜືອ​ທີ່​ເວົ້າ​ເຖິງ​ລົດ­ເມ ແລະ ການ​ບໍ­ລິ­ການ ໂດຍ​ສະ­ເພາະ ຄວາມ​ສະ­ອາດ ເຊິ່ງ​ໄລ­ຍະ​ປີ​ໃໝ່​ນີ້ ເກີດ​ມີ​ບັນ­ຫາ​ເລື່ອງ​ການ​ບໍ­ລິ­ການ​ລົດ­ເມ​ທີ່​ໜີ​ບໍ່​ມົ້ມ ຄວາມ​ໂລບ​ຂອງ​ຜູ້​ປະ­ກອບ​ການ ເຊິ່ງ​ຜູ້​ຮັບ​ທຸກ​ຄື​ຜູ້­ໂດຍ­ສານ​ທີ່​ຈ່າຍ​ລາ­ຄາ​ເຕັມ ແຕ່​ໄດ້​ນັ່ງ-ນອນ​ບໍ່​ເຕັມ​ສົມ​ກັບ​ຄ່າ​ເງິນ ເພາະ​ລົດ­ເມ​ບາງ​ຄັນ​ທີ່​ນັ່ງ​ໄດ້ 50 ແຕ່​ຮັບ​ຄົນ​ຮອດ 80 ກະ​ມີ ເຊິ່ງ​ອາ­ໄສ​ແຈ້ງ​ການ​ບອກ​ບໍ່​ໃຫ້​ຂຶ້ນ​ຄ່າ​ລົດ​ຍາມ​ບຸນ­ປີ­ໃໝ່ ກໍ​ຂາຍ​ປີ້​ປົກ­ກະ­ຕິ ແຕ່​ຮັບ​ຄົນ​ຫຼາຍ​ເກີນ​ເອົາ​ແທນ ?.

    ບັນ­ຫາ​ຂ້າງ​ເທິງ​ເທົ່າ​ກັບ​ວ່າ ບອກ​ແນວ​ໜຶ່ງ​ພັດ​ໄປ​ເຮັດ​ອີກ​ແນວ​ໜຶ່ງ ປີ​ນີ້​ຄື​ບົດ­ຮຽນ ປີ­ໜ້າ​ຄວນ​ໃຫ້​ເບີ​ຜູ້­ໂດຍ­ສານ ຮ້ອງ​ຮຽນ​ແຈ້ງ​ກົງ​ແບບ​ສາຍ​ດ່ວນ​ຄົງ​ຈະ​ດີ ເພາະ​ຄົນ​ໃນ​ສັງ­ຄົມ​ຢູ່​ຮ່ວມ​ກັນ ຕ້ອງ​ຈັດ­ການ​ຄຸ້ມ​ຄອງ​ບໍ່​ໃຫ້​ມີ​ການ​ຂົ່ມ​ເຫັງ​ເອົາ​ປຽບ​ມະ­ນຸດ​ດ້ວຍ​ກັນ ! ລົງ​ໃຕ້​ເມືອ​ຮອດ​ຈຳ­ປາ​ສັກ​ໄລ­ຍະ​ປີ​ໃໝ່​ໜີ​ບໍ່​ມົ້ມ ໄດ້​ຍິນ​ບັນ­ຫາ​ບາງ​ດ່ານ​ສວຍ­ໂອ­ກາດ​ເກັບ​ເງິນ​ນຳ​ແຮງ​ງານ​ລາວ​ກັບ​ບ້ານ ບາງ​ແຂວງ​ເຈົ້າ­ແຂວງ​ແກ້​ໄວ​ຈົນ​ອອກ​ແຈ້ງ​ການ​ຫ້າມ ແຕ່​ປາ­ກົດ​ຍັງ​ມີ​ບາງ​ຄະ­ນະ​ບ້ານ​ທີ່​ສວຍ­ໂອ­ກາດ​ເກັບ​ເງິນ​ພວກ​ລູກ​ຫຼານ​ມາ​ແຕ່​ເຮັດ​ງານ​ຕ່າງ​ຖິ່ນ ບັນ­ຫາ​ແບບ​ນີ້ ຫຼື ເປັນ​ນຳ​ໜ່ວຍ​ປົກ­ຄອງ​ມັນ​ຢູ່​ໄກ​ຫູ​ໄກ​ຕາ​ສູນ​ກາງ​ບໍ່​ຈັກ ?.

    ອັນ​ໃດ​ກໍ​ຕາມ ຖ້າ​ຢູ່​ໄກ​ຫູ​ໄກ​ຕາ​ມັນ​ຫາກ​ມີ​ທ່າ​ອ່ຽງ​ອອກ​ນອກ​ທາງ ຫຼື ສວຍ­ໂອ­ກາດ ເຊິ່ງ​ບັນ­ຫາ​ແບບ​ນີ້ ມັນ​ເລັ່ງ​ທວງ​ໃຫ້​ສູນ​ກາງ​ລົງ​ກວດ­ກາ​ພວກ​ທ້ອງ­ຖິ່ນ​ເປັນ​ປົກ­ກະ­ຕິ ຫຼີກ­ເວັ້ນ​ລາຍ​ງານ​ບັນ­ຫາ​ແບບ​ດອກ​ໄມ້​ບານ ຍົກ​ຕົວ­ຢ່າງ: ຄະ­ນະ​ອຳ­ນວຍ​ການ​ໂຮງ­ຮຽນ​ແຫ່ງ​ໜຶ່ງ​ປຶກ­ສາ​ຂ້າ­ພະ­ເຈົ້າ​ວ່າ ໜັງ­ສື​ຍື່ນ​ຂໍ​ຍົກ​ຖາ­ນະ​ໂຮງ­ຮຽນ​ຈາກ​ມັດ­ທະ­ຍົມ​ຕົ້ນ ຂຶ້ນ​ເປັນ​ມັດ­ທະ­ຍົມ​ສົມ­ບູນ​ຈັກ​ໄປ​ຮອດ​ໃສ​ແລ້ວ ຖາມ​ເມືອງ​ກະ​ວ່າ​ຮອດ​ແຂວງ​ແລ້ວ ຜູ້​ຂຽນ​ຈຶ່ງ​ຢາກ​ເວົ້າ​ກົງ​ວ່າ ເມືອງ​ກັບ​ແຂວງ​ຄື​ວ່າ​ອົງ­ການ​ປົກ­ຄອງ​ລັດ ເອ­ກະ­ສານ​ອັນ​ໃດ​ທີ່​ຄວນ​ແກ້​ໄຂ​ໃຫ້​ວ່ອງ­ໄວ​ກະ​ຄວນ​ເຮັດ ບໍ່​ແມ່ນ​ແຊ່​ຄ້າງ​ໄວ້ ການ​ຂັບ​ຂີ່​ລົດ​ຍານ­ພາ­ຫະ­ນະ​ຕາມ​ໝູ່​ບ້ານ ທ້ອງ­ຖິ່ນ ທັງໆ​ທີ່​ຮູ້​ວ່າ​ເຂດ​ຊຸມ​ຊົນ​ກໍ​ເລັ່ງ​ໄວ​ສຸດ​ຂີດ ຜູ້​ຂຽນ​ສົງ­ໄສ​ເລີຍ​ຖາມ​ປະ­ຊາ­ຊົນ​ວ່າ ເປັນ​ຫຍັງ​ເຂົາ​ຈຶ່ງ​ຂີ່​ໄວ​ແທ້ ໄດ້​ຮັບ​ຄຳ​ຕອບ​ວ່າ ເພາະ​ເຂົາ​ຄິດ​ວ່າ​ມັນ​ເທ້ ?.

    ຂີ່​ລົດ​ໄວ ຂີ້­ຝຸ່ນ​ໄງ່ ເອ­ກະ­ສານ​ບໍ່​ແກ້ ສວຍ­ໂອ­ກາດ​ເກັບ​ເງິນ​ຫຼາຍ ປາ­ກົດ­ການ​ຫຍໍ້­ທໍ້​ທວງ​ໃຫ້​ສູນ​ກາງ​ລົງ​ໄປ​ຖາມ​ປະ­ຊາ­ຊົນ​ທ້ອງ­ຖິ່ນ​ລອງ​ເບິ່ງ ເພາະ​ຖ້າ​ໄປ​ຖາມ​ພະ­ນັກ­ງານ​ເຂົາ​ກະ​ຕອບ​ວ່າ ບໍ່​ມີ​ໂລດ​ແຫຼວ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ