ການຮ່ວມມືແບບຄູ່ຮ່ວມຍຸດທະສາດຮອບດ້ານ ພ້ອມກັນສ້າງຄູ່ຮ່ວມຊາຕາກຳ ລາວ-ຈີນ

1.225 29 ມ.ສ. 2019 ຂ່າວໜ້າ​ໜຶ່ງ
ການຮ່ວມມືແບບຄູ່ຮ່ວມຍຸດທະສາດຮອບດ້ານ ພ້ອມກັນສ້າງຄູ່ຮ່ວມຊາຕາກຳ ລາວ-ຈີນ

    ຕອບ​ສະ­ໜອງ​ຄາມ​ຄຳ​ເຊື້ອ​ເຊີນ​ຂອງ​ສະ­ຫາຍ ສີ​ຈິ້ນ​ຜິງ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ແຫ່ງ ສປ ຈີນ ສະ­ຫາຍ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ແຫ່ງ ສປປ ລາວ ພ້ອມ​ດ້ວຍ​ຄະ­ນະ​ຜູ້​ແທນ​ຂັ້ນ​ສູງ ພັກ-ລັດ​ລາວ ໄດ້​ຢ້ຽມ­ຢາມ​ລັດ​ຖະ​ກິດ ແລະ ເຂົ້າ​ຮ່ວມ​ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ການ​ຮ່ວມ​ມື​ສາ­ກົນ “ໜຶ່ງ​ແລວ ໜຶ່ງ​ເສັ້ນ­ທາງ” ຄັ້ງ​ທີ 2 ທີ່ ສປ ຈີນ ແຕ່​ວັນ​ທີ 25 ເມ­ສາ ຫາ​ວັນ​ທີ 01 ພຶດ­ສະ­ພາ 2019.

    ໃນ​ວັນ​ທີ 25 ເມ­ສາ 2019 ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ພົບ​ກັບ ສະ­ຫາຍ ລີ​ເຄີ້​ສຽງ ຄະ­ນະ​ປະ­ຈຳ​ກົມ​ການ­ເມືອງ ສູນ​ກາງ​ພັກ​ກອມ​ມູ​ນິດ​ຈີນ ນາ­ຍົກ­ລັດ­ຖະ­ມົນ­ຕີ ແຫ່ງ ສປ ຈີນ ທີ່​ນະ­ຄອນ­ຫຼວງ​ປັກ​ກິ່ງ ໃນ​ການ​ພົບ​ປະ​ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ສະ­ແດງ​ຄວາມ​ປິ​ຕິ​ຍິນ​ດີ​ທີ່​ໄດ້​ນຳ­ພາ​ຄະ­ນະ​ຜູ້​ແທນ​ຂັ້ນ​ສູງ ພັກ-ລັດ​ລາວ ຢ້ຽມ­ຢາມ​ລັດ​ຖະ​ກິດ ແລະ ເຂົ້າ​ຮ່ວມ​ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ການ​ຮ່ວມ​ມື​ສາ­ກົນ “ໜຶ່ງ​ແລວ ໜຶ່ງ​ເສັ້ນ­ທາງ” ຄັ້ງ​ທີ 2 ທີ່ ສປ ຈີນ ຕາມ​ການ​ເຊື້ອ​ເຊີນ​ຂອງ​ສະ­ຫາຍ​ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ສີ​ຈິ້ນ​ຜິງ ໄດ້​ຕີ​ລາ­ຄາ​ສູງ​ຕໍ່​ການ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ຝ່າຍ ບົນ​ພື້ນ­ຖານ​ການ​ເປັນ​ຄູ່​ຮ່ວມ​ຍຸດ​ທະ​ສາດ​ຮອບ­ດ້ານ ຕາມ​ທິດ 4 ດີ ທີ່​ນັບ​ມື້​ນັບ​ມີ​ການ​ຂະ­ຫຍາຍ­ຕົວ ເຂົ້າ​ສູ່​ລວງ​ເລິກ ແລະ ກ້າວ​ຂຶ້ນ​ສູ່​ລະ­ດັບ​ສູງ​ອັນ​ໃໝ່.

    ຝ່າຍ​ລາວ ໄດ້​ຕີ​ລາ­ຄາ​ສູງ​ຕໍ່​ການ​ເປັນ​ເຈົ້າ­ພາບ ຈັດ​ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ການ​ຮ່ວມ​ມື​ສາ­ກົນ “ໜຶ່ງ​ແລວ ໜຶ່ງ​ເສັ້ນ­ທາງ” ຄັ້ງ​ທີ 2 ແລະ ໄດ້​ຢືນ­ຢັນ​ຄືນ​ເຖິງ​ຄວາມ​ສຳ­ຄັນ ໃນ​ການ​ຫັນ​ເອົາ​ຍຸດ​ທະ​ສາດ “ຫັນ​ປະ­ເທດ​ບໍ່​ມີ​ຊາຍ​ແດນ​ຕິດ​ກັບ​ທະ­ເລ ເປັນ​ປະ­ເທດ​ເຊື່ອມ​ໂຍງ​ເຊື່ອມ​ຈອດ” ຂອງ​ລາວ ເຊື່ອມ​ຈອດ​ເຂົ້າ​ກັບ​ຂໍ້​ລິ​ເລີ່ມ “ໜຶ່ງ​ແລວ ໜຶ່ງ​ເສັ້ນ­ທາງ” ຂອງ ສປ ຈີນ, ໄດ້​ຕີ​ລາ­ຄາ​ສູງ​ຕໍ່​ໂຄງ­ການ​ການ​ສ້າງ​ເສັ້ນ­ທາງ​ລົດ­ໄຟ ລາວ-ຈີນ ທີ່​ເປັນ​ໂຄງ­ການ​ທຳ​ອິດ​ໃນ​ຂອບ​ຂໍ້​ລິ​ເລີ່ມ “ໜຶ່ງ​ແລວ ໜຶ່ງ​ເສັ້ນ­ທາງ” ລະ­ຫວ່າງ​ສອງ​ປະ­ເທດ. ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ສະ­ແດງ​ຄວາມ​ຫວັງ​ວ່າ ຝ່າຍ​ຈີນ​ຈະ​ສືບ­ຕໍ່​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ສົ່ງ​ອອກ ຜະ­ລິດ​ຕະ​ພັນ​ກະ­ສິ­ກຳ​ຂອງ​ລາວ ເຂົ້າ​ຈີນ ເພື່ອ​ຍົກ​ສູງ​ບໍ​ລິ​ມາດ​ການ ແລກ­ປ່ຽນ​ສິນ­ຄ້າ​ລະ­ຫວ່າງ​ສອງ​ປະ­ເທດ.

    ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ສະ­ແດງ​ຄວາມ​ຂອບ­ໃຈ ແລະ ຮູ້​ບຸນ­ຄຸນ​ຢ່າງ​ສູງ​ຕໍ່​ພັກ ລັດ­ຖະ­ບານ ແລະ ປະ­ຊາ­ຊົນ​ຈີນ ທີ່​ໄດ້​ໃຫ້­ການ​ສະ­ໜັບ­ສະ­ໜູນ ແລະ ຊ່ວຍ­ເຫຼືອ​ແກ່​ພັກ ລັດ­ຖະ­ບານ ແລະ ປະ­ຊາ­ຊົນ​ລາວ ໃນ​ການ​ສ້າງ­ສາ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລາວ ມາ​ໂດຍ​ຕະ­ຫຼອດ ແລະ ໄດ້​ຕີ​ລາ­ຄາ​ສູງ​ຕໍ່​ບັນ­ດາ ຜົນ­ສຳ­ເລັດ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ສປ ຈີນ ກໍ​ຄື ຜົນ­ສຳ­ເລັດ​ອັນ​ໃຫຍ່​ຫຼວງ​ຮອບ­ດ້ານ​ໃນ​ພາ­ລະ­ກິດ​ການ​ເປີດ​ປະ­ຕູ​ສູ່​ພາຍ​ນອກ​ຂອງ ສປ ຈີນ ຕະ­ຫຼອດ​ເວ­ລາ 40 ກວ່າ​ປີ​ທີ່​ຜ່ານ​ມາ ພ້ອມ​ທັງ​ເຊື່ອ​ໝັ້ນ​ວ່າ ພາຍ​ໃຕ້​ການ​ນຳ­ພາ​ອັນ​ສະ­ຫຼາດ​ສ່ອງ​ໃສ​ຂອງ​ສູນ​ກາງ ພັກ​ກອມ​ມູ​ນິດ​ຈີນ ທີ່​ມີ​ສະ­ຫາຍ ສີ​ຈິ້ນ​ຜິງ ເປັນ​ແກນ​ກາງ​ນັ້ນ ປະ­ຊາ­ຊົນ​ຈີນ​ອ້າຍ​ນ້ອງ​ຈະ​ປະ­ສົບ​ຜົນ­ສຳ­ເລັດ​ອັນ​ໃໝ່ ໃຫຍ່​ຫຼວງ​ກວ່າ​ເກົ່າ ໃນ​ການ​ສ້າງ­ສາ​ສັງ­ຄົມ​ນິ­ຍົມ​ທີ່​ມີ​ສີ­ສັນ​ພິ­ເສດ​ຂອງ​ຈີນ ແລະ ສືບ­ຕໍ່​ບັນ­ລຸ​ເປົ້າ​ໝາຍ​ສູ້​ຊົນ “100 ປີ​ສອງ​ເຫດ­ການ” ທີ່​ກອງ​ປະ­ຊຸມ​ໃຫຍ່ ຄັ້ງ​ທີ 19 ຂອງ​ພັກ​ກອມ​ມູ​ນິດ​ຈີນ​ວາງ​ອອກ.

ຂ່າວທີ່ກ່ຽວຂ້ອງ