ຂ່າວຫຼ້າສຸດ

ໄຂ​ງານ​ວາງສະແດງ​ຮູບ​ພາບ​ການທ່ອງທ່ຽວ​ລາວ ສົ່ງເສີມ​ການ​ໂຄສະນາ​ການທ່ອງທ່ຽວ

1.147 30 ມ.ສ. 2019 ຂ່າວໜ້າ​ໜຶ່ງ
ໄຂ​ງານ​ວາງສະແດງ​ຮູບ​ພາບ​ການທ່ອງທ່ຽວ​ລາວ ສົ່ງເສີມ​ການ​ໂຄສະນາ​ການທ່ອງທ່ຽວ

    ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ (ຖວ​​ທ) ໄຂ​ງານ​ວາງສະແດງ​ຮູບ​ພາບ​ການທ່ອງທ່ຽວ​ລາວ ຂຶ້ນ​ວັນ​ທີ 28 ເມສາ 2019 ຢູ່​ແຂວງ​ຟູ​ຈ້ຽນ ​ສປ ຈີນ ໂດຍ​ມີ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ​ສປປ ລາວ ພ້ອມ​ດ້ວຍ​ຄະນະ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ອຸ່ນ​ທວງ ຂາວ​ພັນ ຮອງ​ລັດຖະມົນຕີ​ກະຊວງ ຖວ​​ທ ກ່າວ​ວ່າ: ໃນ​ໂອກາດ​ທີ່ ​ສປ ຈີນ ຈັດ​ກອງ​ປະຊຸມ ໜຶ່ງ​ແລວ ໜຶ່ງ​ເສັ້ນທາງ ຄັ້ງ​ທີ 2 ຢູ່​ນະຄອນຫຼວງ​ປັກ​ກິ່ງ ກະຊວງ ຖວ​​ທ ກໍ​ໄດ້​ຈັດ​ງານ​ວາງສະແດງ​ຮູບ​ພາບ​ການທ່ອງທ່ຽວ​ລາວ ຂຶ້ນ​ເພື່ອ​ເປັນ​ການ​ສົມທົບ​ສະໜັບສະໜູນ​ກອງ​ປະຊຸມ​ສຳຄັນ​ດັ່ງກ່າວ ເຊິ່ງ​ເປັນ​ກິດຈະກຳ​ໜຶ່ງ​ປະກອບສ່ວນ​ໃນ​ວຽກ​ງານ​ໂຄສະນາ​ສົ່ງເສີມ​ການທ່ອງທ່ຽວ ລາວ-ຈີນ ຈີນ-ລາວ ປີ 2019 ໃຫ້​ປະຊາຊົນ​ສອງ​ຊາດ ລາວ-ຈີນ ໄດ້​ຮັບ​ຮູ້​ເຊິ່ງ​ກັນ ແລະ ກັນ​ກວ້າງຂວາງ​ຍິ່ງ​ຂຶ້ນ ໂດຍ​ຜ່ານ​ຮູບ​ພາບ​ປະຫວັດສາດ ວັດທະນະທຳ ແລະ ທຳ​ມະ​ຊາດ ຄຽງ​ຄູ່​ກັບ​ງານ​ວາງສະແດງ​ຮູບ​ພາບ​ຄັ້ງ​ນີ້​ຍັງ​ມີ​ການສະແດງ​ສິລະ​ປະ​ວັດທະນະທຳ ເພື່ອ​ເປັນ​ການ​ແລກປ່ຽນ​ວັດທະນະທຳ ແລະ ສ່ອງ​ແສງ​ໃຫ້​ເຫັນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື ລາວ-ຈີນ ຈີນ-ລາວ ໂດຍ​ຜ່ານ​ການສະແດງ​ສິລະ​ປະ​ທີ່​ເປັນ​ເອກະລັກ​ອັນ​ດີງາມ​ຂອງ​ປະຊາຊົນ​ບັນດາເຜົ່າ.

    ຈາກ​ນັ້ນ ທ່ານ​ປະທານ​ປະເທດ ​ສປປ ລາວ ພ້ອມ​ດ້ວຍ​ແຂກ​ຝ່າຍ​ລາວ ແລະ ຝ່າຍ​ຈີນ ກໍ​ໄດ້​ຢ້ຽມ​ຊົມ​ການສະແດງ​ສິລະ​ປະ​ວັດທະນະທຳ​ລາວ ແລະ ການວາງສະແດງ​ຮູບ​ພາບ​ທ່ອງ​ທ່ຽວ ທີ່​ໂດດ​ເດັ່ນ​ຂອງ​ລາວ ຕື່ມ​ອີກ.

ຂ່າວທີ່ກ່ຽວຂ້ອງ