ຂ່າວຫຼ້າສຸດ

ສ້າງ​ຄວາມ​ເປັນ​ເອກະ​ພາບ ການ​ນຳ​ໃຊ້​ພາສາ​ລາວ ແລະ ການ​ຄຸ້ມ​ຄອງ ນຳ​ໃຊ້​ສື່​ສັງຄົມ​ອອນ​ລາຍ

1.238 30 ມ.ສ. 2019 ຂ່າວໜ້າ​ໜຶ່ງ
ສ້າງ​ຄວາມ​ເປັນ​ເອກະ​ພາບ ການ​ນຳ​ໃຊ້​ພາສາ​ລາວ ແລະ ການ​ຄຸ້ມ​ຄອງ ນຳ​ໃຊ້​ສື່​ສັງຄົມ​ອອນ​ລາຍ

   ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ຈັດ​ສຳ​ມະ​ນາ​ກ່ຽວ​ກັບ​ການ​ນຳ​ໃຊ້​ພາສາ​ລາວ ການ​ຄຸ້ມ​ຄອງ ແລະ ນຳ​ໃຊ້​ສື່​ສັງຄົມ​ອອນ​ລາຍ ຄັ້ງ​ທີ 2 ຂຶ້ນ​ວັນ​ທີ 29-30 ເມສາ 2019 ຢູ່​ຫໍ​ປະຊຸມ​ແຫ່ງ​ຊາດ ໂດຍ​ເປັນ​ປະທານ​ຂອງ​ທ່ານ ຈະເລີນ ເຢຍ​ປາວ​ເຮີ ລັດຖະມົນຕີ​ປະຈຳ​ສຳນັກງານ​ນາຍົກລັດຖະມົນຕີ ໂຄສົກ​ລັດຖະບານ ມີ​ທ່ານ ສະຫວັນ​ຄອນ ຣາ​​ຊ​ມຸນ​ຕຣີ ຮອງ​ລັດຖະມົນຕີ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ພ້ອມ​ດ້ວຍ​ຫ້ອງການ ສະ​ຖາ​ບັນ ກົມ ຜູ້​ຊົງ​ຄຸນ​ວຸດ​ທິ ແລະ ສື່​ມວນ​ຊົນ​ພາກສ່ວນ​ຕ່າງໆ​ເຂົ້າ​ຮ່ວມ

    ທ່ານ ຈະເລີນ ເຢຍ​ປາວ​ເຮີ ກ່າວ​ວ່າ: ສຳ​ມະ​ນາ​ຄັ້ງ​ນີ້ ມີ​ຄວາມ​ສຳຄັນ​ຫຼາຍ ເປັນ​ການ​ພົບ​ປະ​ລະຫວ່າງ​ໂຄສົກ​ລັດຖະບານ ກັບ​ບັນດາ​ທ່ານ​ທີ່​ເຮັດ​ວຽກ​ຕິດ​ພັນ​ກັບ​ການ​ນຳ​ໃຊ້​ພາສາ​ລາວ ການ​ຄຸ້ມ​ຄອງ ແລະ ນຳ​ໃຊ້​ຂໍ້​ມູນ​ຂ່າວສານ ເພື່ອ​ພັດທະນາ​ການ​ນຳ​ໃຊ້​ໃຫ້​ໄປ​ທິດ​ທີ່​ມີ​ຄວາມ​ເປັນ​ເອກະ​ພາບ ເປັນຕົ້ນ ການ​ຂຽນ​ຂ່າວ ການ​ນຳ​ໃຊ້​ສັບ ການ​ໃຊ້​ຖ້ອຍ​ຄຳ ຈັດ​ວາງ​ຄຳ​ສັບ​ໃນ​ຖ້ອຍ​ຄຳ ວະລີ ປະໂຫຍກ​ໃຫ້​ຖືກຕ້ອງ​ຕາມ​ຫຼັກ​ໄວ​ຍະ​ກອນ​ໃຫ້​ມີ​ຄວາມ​ຊັດ​ເຈນ ເພື່ອ​ເຮັດ​ໃຫ້ການ​ຄຸ້ມ​ຄອງ ແລະ ນຳ​ໃຊ້​ຂໍ້​ມູນ​ຂ່າວສານ​ທາງ​ສື່​ອອນ​ລາຍ​ໃນ​ທາງ​ທີ່​ຖືກຕ້ອງ ເໝາະ​ສົມ ທັງ​ເກີດ​ປະໂຫຍດ​ຕໍ່​ຕົນ​ເອງ ແລະ ສ່ວນ​ລວມ​ຢ່າງ​ແທ້​ຈິງ ຫຼີກ​ລ່ຽງ​ການ​ນຳ​ໃຊ້​ຂໍ້​ມູນ​ໃນ​ທາງ​ບໍ່​ຖືກຕ້ອງ ບິດ​ເບືອນ​ຄວາມ​ຈິງ ຫຼື ມີ​ລັກສະນະ​ທັບ​ຖົມ​ໂຈມ​ຕີ​ຕໍ່​ການ​ນຳພາ​ຂອງ​ພັກ ການ​ບໍລິຫານ​ປະເທດ​ຂອງ​ລັດ ດັ່ງ​ທີ່​ພວກ​ເຮົາ​ເຄີຍ​ພົບ​ບັນຫາ​ຈຳນວນ​ໜຶ່ງ​ໄລຍະ​ຜ່ານ​ມາ.

    ທ່ານ ສະຫວັນ​ຄອນ ຣາ​​ຊ​ມຸນ​ຕຣີ ກ່າວ​ວ່າ: ສຳ​ມະ​ນາ​ຄັ້ງ​ນີ້ ເປັນ​ເວທີ​ສຳຄັນ​ທີ່​ສຸດ ເພາະ​ວຽກ​ງານ​ສື່ສານ​ຂໍ້​ມູນ​ຂ່າວສານ ເປັນ​ວຽກ​ງານ​ສຳຄັນ ຈຳເປັນ​ໃຫ້​ຮູ້​ເຖິງ​ຫຼັກການ ການ​ນຳ​ໃຊ້​ພາສາ​ໃນ​ປັດຈຸບັນ ແລະ ອະນາຄົດ ມີ​ຄວາມ​ສຳຄັນ​ຫຼາຍ ເພາະ​ເປັນ​ການ​ແນະນຳ ແນະ​ແນວ ວຽກ​ງານ​ແນວ​ຄິດ ເຊິ່ງ​ເປັນ​ວຽກ​ງານ​ກົກ​ຈຳເປັນ​ທີ່​ຕ້ອງ​ເຮັດ​ກ່ອນ ເພື່ອ​ສ້າງ​ຄວາມ​ເຂົ້າໃຈ ແລະ ຄວາມ​ເປັນ​ເອກະ​ພາບ ໂດຍ​ອີງໃສ່​ຫຼັກການ ແລະ ຈິງ​ໃຈ​ຕິ​ຊົມ​ຈາກ​ມະຫາຊົນ ເວທີ​ນີ້​ຈະ​ເປັນ​ການ​ປະກອບສ່ວນ​ສຳຄັນ​ໃນ​ການ​ປຶກສາ​ຫາລື ແລກປ່ຽນ​ບົດຮຽນ ບົນ​ຫຼັກການ​ຕົວ​ຈິງ ບົດຮຽນ​ປະສົບ​ການ ຈາກ​ຜູ້​ຊ່ຽວຊານ ແລະ ຜູ້ນຳ​ໃຊ້​ພາສາ​ຕົວ​ຈິງ ພ້ອມ​ກັນ​ຄົ້ນຄວ້າ​ພິຈາລະນາ​ເຫດຜົນ ເພື່ອ​ສ້າງ​ຄວາມ​ເປັນ​ເອກະ​ພາບ​ກັນ​ໃນ​ບັນດາ​ຫຼັກການ​ຕ່າງໆ​ຂອງ​ພາສາ ເພື່ອ​ນຳ​ໃຊ້​ພາສາ​ໃຫ້​ຖືກຕ້ອງ ແລະ ສອດຄ່ອງ.

    ສຳ​ມະ​ນາ​ຄັ້ງ​ນີ້ ມີ​ບັນດາ​ອາຈານ ຜູ້​ຊ່ຽວຊານ ຈາກ​ສະຖານ​ບັນ​ຄົ້ນຄວ້າ​ວັດທະນະທຳ ສະ​ຖາ​ບັນ​ຄົ້ນຄວ້າ​ວິທະຍາ ສາດ-ສັງຄົມ​ແຫ່ງ​ຊາດ ຄະນະ​ອັກສອນສາດ ມະຫາວິທະຍາໄລ​ແຫ່ງ​ຊາດ ເພື່ອ​ພ້ອມ​ກັນ​ຄົ້ນຄວ້າ​ປຶກສາ​ຫາລື ເພື່ອ​ສ້າງ​ຄວາມ​ເປັນ​ເອກະ​ພາບ​ໃນ​ການຈັດຕັ້ງ​ປະຕິບັດ​ໃນ​ໜ້າທີ່​ວິຊາ​ສະເພາະ ໂດຍ​ສະເພາະ ກ່ຽວ​ກັບ​ການ​ນຳ​ໃຊ້​ພາສາ​ໃນ​ສື່​ປະເພດ​ຕ່າງໆ​ຢ່າງ​ຖືກຕ້ອງ. 

ຂ່າວທີ່ກ່ຽວຂ້ອງ