ຂ່າວຫຼ້າສຸດ

ເປີດ​ນຳ​ໃຊ້​ສູນ​ກວດ​ສຸຂະພາບ​ແຮງ​ງານ​ພາຍ​ໃນ ແລະ ຕ່າງປະເທດ

1.251 30 ມ.ສ. 2019 ຂ່າວໜ້າ​ໜຶ່ງ
ເປີດ​ນຳ​ໃຊ້​ສູນ​ກວດ​ສຸຂະພາບ​ແຮງ​ງານ​ພາຍ​ໃນ ແລະ ຕ່າງປະເທດ

    ເພື່ອ​ກວດ​ສຸຂະພາບ​ແຮງ​ງານ​ປະຈຳ​ປີ ກວດ​ສຸຂະພາບ​ແຮງ​ງານ​ເພື່ອ​ໄປ​ເຮັດ​ວຽກ​ຢູ່​ຕ່າງປະເທດ ແລະ ກວດ​ສຸຂະພາບ​ແຮງ​ງານ​ທີ່​ເຂົ້າ​ມາ​ເຮັດ​ວຽກ​ຢູ່​ລາວ ແລະ ເພື່ອ​ປ້ອງ​ກັນ​ເຊື້ອ​ພະຍາດ ພະຍາດ​ອື່ນໆ​ທີ່​ອາດ​ນຳ​ເຂົ້າ​ມາ​ໂດຍ​ຜ່ານ​ສຸຂະພາບ​ແຮງ​ງານ ຈຶ່ງ​ໄດ້​ເປີດ​ສູນ​ກວດ​ສຸຂະພາບ​ແຮງ​ງານ​ພາຍ​ໃນ ແລະ ຕ່າງປະເທດ ຂຶ້ນ​ວັນ​ທີ 26 ເມສາ 2019 ທີ່​ໂຮງໝໍ​ມິດຕະພາບ ມີ​ທ່ານ ຄຳ​ແພງ ໄຊ​ສົມ​ແພງ ລັດຖະມົນຕີ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ທ່ານ ບຸນ​ໜັກ ໄຊຊະນະ​ສົງຄາມ ຫົວໜ້າ​ກົມ​ປິ່ນປົວ​ຟື້ນ​ຟູ​ໜ້າທີ່​ການ ກະຊວງ​ສາທາລະນະ​ສຸກ ທ່ານ ສະໜອງ ທອງ​ຊະນະ ອຳນວຍ​ການ​ໂຮງໝໍ​ມິດຕະພາບ ທ່ານ ພົງ​ໄຊ​ສັກ ອິນ​ຖາ​ລາດ ຫົວໜ້າ​ກົມ​ຄຸ້ມ​ຄອງ​ແຮງ​ງານ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

    ສຳລັບ​ສູນ​ດັ່ງກ່າວ ໄດ້​ສ້າງ​ຂຶ້ນ​ພາຍ​ໃຕ້​ການ​ເຫັນ​ດີ​ຈາກ​ກະຊວງ​ສາທາລະນະ​ສຸກ ໂດຍ​ການ​ຮ່ວມ​ມື​ໃນ​ການຈັດຕັ້ງ​ປະຕິບັດ​ຂອງ​ກົມ​ຄຸ້ມ​ຄອງ​ແຮງ​ງານ ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ແລະ ໂຮງໝໍ​ມິດ​ຕະ ພາບ ເຊິ່ງ​ສູນ​ຕັ້ງ​ຢູ່​ໂຮງໝໍ​ມິດຕະພາບ​ໄດ້​ຮັບ​ການ​ສ້າງຕັ້ງ​ຂຶ້ນ​ພາຍ​ໃຕ້​ເງື່ອນໄຂ ແລະ ສະພາບ​ແຫ່ງ​ຄວາມ​ຮຽກຮ້ອງ​ຕ້ອງການ​ຂອງ​ວຽກ​ງານ​ປົກ​ປ້ອງ​ສິດ ແລະ ຜົນ​ປະໂຫຍດ​ຂອງ​ຜູ້​ອອກແຮງ​ງານ ທາງ​ດ້ານ​ວຽກ​ງານ​ຄວາມ​ປອດ​ໄພ ແລະ ສຸຂະພາບ​ແຮງ​ງານ ຕາມ​ທີ່​ໄດ້​ກຳນົດ​ໄວ້​ໃນ​ກົດໝາຍ​ວ່າ​ດ້ວຍ​ແຮງ​ງານ ແລະ ລະບຽບ​ການ​ທີ່​ກ່ຽວຂ້ອງ ກັບ​ການ​ປ້ອງ​ກັນ​ການ​ເກີດ​ພະຍາດ​ຕ່າງໆ​ຈາກ​ການ​ເຮັດ​ວຽກ​ຂອງ​ຜູ້​ອອກແຮງ​ງານ ປັດຈຸບັນ​ສູນ​ແຫ່ງ​ນີ້​ເປັນ​ສະຖານທີ່​ທຳ​ອິດ​ທີ່​ຈະ​ໄດ້​ມີ​ການ​ບໍລິການ​ກວດ​ສຸຂະພາບ​ແຮງ​ງານ​ປະຈຳ​ປີ​ແບບ​ເປັນ​ລະບົບ​ຄົບ​ຊຸດ ແລະ ທັນ​ສະໄໝ​ຢູ່​ລາວ ພ້ອມ​ທັງ​ຍັງ​ມີ​ລົດ​ເຄື່ອນ​ທີ່​ໃຫ້​ບໍລິການ​ກວດ​ສຸຂະພາບ​ທີ່​ມີ​ເຄື່ອງມື​ອຸປະກອນ​ການ​ແພດ​ຄົບ​ຊຸດ​ເພື່ອ​ລົງ​ໄປ​ໃຫ້​ບໍລິການ​ກວດ​ສຸຂະພາບ​ແຮງ​ງານ​ເຖິງ​ສະຖານທີ່​ເຮັດ​ວຽກ ແລະ ມີ​ພະນັກງານ​ວິຊາ​ການ​ດ້ານ​ການ​ແພດ​ຫຼາຍ​ກວ່າ 10 ຄົນ​ມາ​ໃຫ້​ບໍລິການ​ກວດ​ສຸຂະພາບ​ເຊິ່ງ​ວັນ​ໜຶ່ງ​ສາມາດ​ຮອງ​ຮັບ​ການ​ກວດ​ສຸຂະພາບ​ແຮງ​ງານ​ໄດ້​ເຖິງ 500 ກວ່າ​ຄົນ.

    ສຳລັບ​ກິດຈະກຳ​ຂອງ​ສູນ​ປະກອບ​ດ້ວຍ ການ​ກວດ​ສຸຂະພາບ​ແຮງ​ງານ​ຕ່າງ​ດ້າວ​ທີ່​ມາ​ເຮັດ​ວຽກ​ຢູ່​ລາວ ແຮງ​ງານ​ຂອງ​ປະຊາຊົນ​ລາວ ແຮງ​ງານ​ຈາກ​ລາວ​ທີ່​ຈະ​ໄປ​ອອກແຮງ​ງານ​ຢູ່​ຕ່າງປະເທດ ປະຊາຊົນ​ລາວ​ບັນດາເຜົ່າ​ທີ່​ອາໄສ​ຢູ່​ໃກ້​ກັບ​ບໍລິເວນ​ທີ່​ມີ​ຄວາມ​ສ່ຽງ​ຂອງ​ຜູ້​ປະກອບ​ການ​ຕ່າງໆ ກວດ​ສອບ​ສະຖານທີ່​ປະກອບ​ການ​ທີ່​ບໍ່​ປະຕິບັດ​ຕາມ​ຂໍ້​ບັງຄັບ​ວ່າ​ດ້ວຍ​ເລື່ອງ​ສະຫວັດດີ​ການ​ສຸຂະພາບ​ແຮງ​ງານ ການ​ກວດ​ສຸຂະພາບ​ປະຈຳ​ປີ​ແກ່​ແຮງ​ງານ​ໃນ​ສະຖານທີ່​ປະກອບ​ການ ການ​ຈັດ​ສະຫຼຸບ​ຂໍ້​ມູນ​ດ້ານ​ສຸຂະພາບ​ແຮງ​ງານ ແລະ ຈັດ​ຂໍ້​ມູນ​ທີ່​ກ່ຽວຂ້ອງ​ທາງ​ດ້ານ​ສຸຂະພາບ​ຂອງ​ແຮງ​ງານ​ຂອງ​ລັດຖະບານ ພ້ອມ​ທັງ​ຄວບ​ຄຸມ​ກຳກັບ​ການ​ອະນຸຍາດ ແລະ ຮັບຮອງ​ຜົນ​ການ​ກວດ​ສຸຂະພາບ​ຈາກ​ສູນ​ບໍລິການ​ກວດ​ສຸຂະພາບ​ອື່ນໆ ໃນ​ກໍລະນີ​ທີ່​ຈຳເປັນ​ຕາມ​ຄຳ​ແນະນຳ​ຈາກ​ກະຊວງ​ສາທາລະນະ​ສຸກ ແລະ ພາກສ່ວນ​ກ່ຽວຂ້ອງ.

ຂ່າວທີ່ກ່ຽວຂ້ອງ