ຖວ​​ທ ນວ ຫວນ​ຄືນ​ວັນ​ກຳມະກອນ​ສາກົນ

1.206 30 ມ.ສ. 2019 ຂ່າວໜ້າ​ໜຶ່ງ
ຖວ​​ທ ນວ ຫວນ​ຄືນ​ວັນ​ກຳມະກອນ​ສາກົນ

    ສະຫະພັນ​ກຳມະບານ ພະ​ແນກ​ຖະແຫຼງ​ຂ່າວ ວັດ​ຖະ​ນະ​ທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ (ຖວ​​ທ ນວ) ຈັດ​ປາຖະກະຖາ​ຫວນ​ຄືນ​ມູນເຊື້ອ​ວັນ​ກຳມະກອນ​ສາກົນ ຄົບຮອບ 133 ປີ (1 ພຶດສະພາ 1886-1 ພຶດສະພາ 2019) ຂຶ້ນ​ວັນ​ທີ  26 ເມສາ 2019 ຢູ່​ພະ​ແນກ​ດັ່ງກ່າວ ໂດຍ​ການ​ປາຖະກະຖາ​ຂອງ​ທ່ານ ຄຳ​ປະດິດ ເຂັມ​ມານິດ ຫົວໜ້າ​ພະ​ແນກ ຖວ​​ທ ນວ ມີ​ຄະນະ​ສະຫະພັນ​ກຳມະບານ ສະມາຊິກ​ກຳມະບານ ແລະ ພະນັກງານ-ລັດຖະກອນ​ເຂົ້າ​ຮ່ວມ.

    ທ່ານ ຄຳ​ປະດິດ ເຂັມ​ມານິດ ກ່າວ​ວ່າ: ກ່ອນ​ໜ້າ​ນີ້ 133 ປີ ຄື​ວັນ​ທີ 1 ພຶດສະພາ 1886 ເປັນ​ວັນ​ທີ່​ມີ​ຄວາມ  ໝາຍ​ສຳຄັນ ສຳລັບ​ຊົນ​ຊັ້ນ​ກຳມະກອນ ແລະ ຊາວ​ຜູ້​ອອກແຮງ​ງານ​ທົ່ວ​ໂລກ ເຊິ່ງ​ເປັນ​ວັນ​ທີ່​ຊົນ​ຊັ້ນ​ກຳມະກອນ​ໄດ້​ເຕົ້າໂຮມ ແລະ ສາມັກຄີ​ກັນ​ລຸກ​ຮື້​ຂຶ້ນ​ຕໍ່ຕ້ານ​ການ​ກົດ​ຂີ່​ຂູດ​ຮີດ ທວງ​ເອົາ​ສິດທິ​ພື້ນຖານ​ຂອງ​ພົນລະເມືອງ ແລະ ຜົນ​ປະໂຫຍດ​ອັນ​ຊອບ​ທຳ​ຂອງ​ຕົນ​ຈາກ​ພວກ​ນາຍທຶນ ເຊິ່ງ​ໄດ້​ເລີ່ມ​ເກີດ​ຂຶ້ນ​ຢູ່ ສ ອາ​ເມ​ຣິ​ກາ ຖະແຫຼງການ​ຊົນ​ຊັ້ນ​ກຳມະກອນ​ຮຽກຮ້ອງ​ໃຫ້​ນາຍທຶນ​ກຳນົດ​ໃຫ້​ກຳມະກອນ​ເຮັດ​ວຽກ 8 ຊົ່ວໂມງ 8 ຊົ່ວໂມງ​ພັກຜ່ອນ ແລະ 8 ຊົ່ວ ໂມງ​ຮ່ຳຮຽນ ເຊິ່ງ​ວັນ​ດັ່ງກ່າວ ກຳມະກອນ​ໄດ້​ນັດ​ຢຸດ​ງານ 5.000 ແຫ່ງ ໃນ​ຕົວ​ເມືອງ​ໃຫຍ່​ທົ່ວ ສ ອາ​ເມ​ຣິ​ກາ ມີ​ກຳມະກອນ​ເຂົ້າ​ຮ່ວມ​ຫຼາຍ​ກວ່າ 500.000 ຄົນ ສະນັ້ນ ວັນ​ທີ 1 ພຶດສະພາ 1886 ຈຶ່ງ​ເປັນ​ກະແສ​ຟອງ​ອັນ​ໃຫຍ່​ຫຼວງ ແລະ ແຂງແຮງ ເປັນ​ກຳລັງ​ໃຈ​ໃຫ້​ຊົນ​ຊັ້ນ​ກຳມະກອນ​ທົ່ວ​ໂລກ ທັງ​ເປັນ​ບາດກ້າວ​ຂະຫຍາຍຕົວ​ແຫ່ງ​ໄຊຊະນະ​ໃນ​ຂະ​ບວນ​ການ​ຕໍ່ສູ້​ເພື່ອ​ປົກ​ປ້ອງ​ສິດ ຜົນ​ປະໂຫຍດ​ອັນ​ຊອບ​ທຳ​ຂອງ​ຕົນ ແລະ ມີ​ການ​ສະເຫຼີມສະຫຼອງ​ຢ່າງ​ຍິ່ງ​ໃຫຍ່ ກາຍເປັນ​ປາງ​ບຸນ​ໃຫຍ່​ຂອງ​ຊົນ​ຊັ້ນ​ກຳມະກອນ​ທົ່ວ​ໂລກ ປະຫວັດສາດ​ຄວາມ​ເປັນ​ມາ​ຄວາມ​ໝາຍ​ຄວາມ​ສຳຄັນ​ຂອງ​ວັນ​ກຳມະກອນ​ສາກົນ ການ​ເຕີບ​ໃຫຍ່​ຂະ​ຍາຍ​ຕົວ​ຂອງ​ຊົນ​ຊັ້ນ​ກຳມະກອນ​ທົ່ວ​ໂລກ ມູນ​ເຊ​​ື້ື້ອ-ທາດ​ແທ້ ແລະ ຜົນງານ​ການເຄື່ອນໄຫວ​ຂອງ​ຊົນ​ຊັ້ນ​ກຳມະກອນ​ລາວ ໃນ​ການ​ປະກອບສ່ວນ​ໃນ​ພາລະກິດ​ປະຕິວັດ ຕໍ່ສູ້​ປົດ​ປ່ອຍ​ຊາດ ກໍ​ຄື​ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ ໃຫ້​ມີ​ຄວາມ​ຈະເລີນ​ກ້າວໜ້າ​ຕະຫຼອດ​ໄລຍະ​ທີ່​ຜ່ານ​ມາ.

    ທ່ານ ຫົວໜ້າ​ພະ​ແນກ ຖວ​​ທ ນວ ຍັງ​ໄດ້​ເນັ້ນ​ໃຫ້​ສະຫະພັນ​ກຳມະບານ ຖວ​​ທ ນວ ເອົາໃຈໃສ່​ສຶກ​ສາ​ອົບຮົມ​ການເມືອງ-ແນວ​ຄິດ​ເປັນ​ສຳຄັນ ແນໃສ່​ໃຫ້​ພະນັກງານ​ລັດຖະກອນ ກໍ​ຄື ສະມາຊິກ​ກຳມະບານ ກຳ​ໄດ້​ແນວທາງ​ນະໂຍບາຍ​ຂອງ​ພັກ-ລັດ ພ້ອມ​ທັງ​ເອົາໃຈໃສ່​ຜັນ​ຂະຫຍາຍ​ວຽກ​ງານ 2 ດີ 5 ເປັນ​ເຈົ້າ ແລະ ຖື​ເອົາ​ວຽກ​ງານ 3 ສ້າງ​ເປັນ​ສຳຄັນ ໂດຍ​ສະເພາະ 4 ເນື້ອ​ໃນ 4 ຄາດໝາຍ ເອົາໃຈໃສ່​ທົບ​ທວນຄືນ​ຄຳ​ຂວັນ​ຂອງ​ອົງການ​ກຳມະບານ ພ້ອມ​ທັງ​ຜັນ​ຂະຫຍາຍ​ເຂົ້າ​ສູ່​ວຽກ​ງານ​ຕົວ​ຈິງ.

ຂ່າວທີ່ກ່ຽວຂ້ອງ