ເບິ່ງບ້ານເຂົາເອົາບົດຮຽນ 02/05/2019

1.072 02 ພ.ພ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ເລີ່ມ​ດ້ວຍ​ຂ່າວ​ມາດ​ຕະ­ການ​ຫ້າມ​ພະ­ນັກ­ງານ​ຂັ້ນ​ສູງ ຂອງ​ນະ­ຄອນ­ຫຼວງ​ກົວ​ລາ​ລຳ​ເປີ ມາ​ເລ​ເຊຍ ໄປ​ຕີ​ກ໋ອບ​ຢູ່​ຕ່າງ­ປະ­ເທດ ບັນ­ຫາ​ເຫຼົ້າ​ເຖື່ອນ​ຢູ່​ອິນ​ໂດ​ເນ​ເຊຍ ແລະ ເລື່ອງ​ສິງ­ກະ­ໂປ ສັ່ງ​ຫ້າມ​ເລື່ອງ​ການ​ເຜີຍ­ແຜ່​ຂ່າວ​ພົວ­ພັນ​ກັບ​ເຫດ­ການ​ກໍ່​ການ​ຮ້າຍ.

    ທີ່ ມາ​ເລ​ເຊຍ: ຂ່າວ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ​ຈາກ​ມາ​ເລ​ເຊຍ ທີ່​ອອກ​ມາ​ໃນ​ຕົ້ນ​ເດືອນ​ມັງ­ກອນ 2017 ກໍ​ຄື ທາງ​ການ​ຂອງ​ປະ­ເທດ​ນີ້ ໄດ້​ອອກ​ຄຳ­ເຕືອນ​ພະ­ນັກ­ງານ ລັດ­ຖະ­ກອນ ນະ­ຄອນ­ຫຼວງ ໂດຍ​ສະ­ເພາະ​ແມ່ນ​ພະ­ນັກ­ງານ​ຂັ້ນ “ເຕີບໆ” ບໍ່​ໃຫ້​ອອກ​ໄປ​ຕີ​ກ໋ອບ​ຢູ່​ຕ່າງ­ປະ­ເທດ ທ່ານ ຊຸນ ກິ​ຟະ​ລີ ອັບ​ດູນ​ຮີວ ຫົວ­ໜ້າ​ຜູ້​ກວດ­ກາ​ພິ­ເສດ ຄະ­ນະ​ກຳ­ມະ­ການ​ຕ້ານ​ການ​ສໍ້​ລາດ​ບັງ​ຫຼວງ ມາ​ເລ​ເຊຍ ໄດ້​ມີ​ຄຳ​ເຫັນ​ກ່ຽວ​ກັບ​ເລື່ອງ​ນີ້​ວ່າ ມີ​ເຈົ້າ​ໜ້າ­ທີ່​ຂັ້ນ​ສູງ​ສວຍ​ໃຊ້​ຕຳ­ແໜ່ງ​ໜ້າ­ທີ່ ເພື່ອ​ສະ­ແຫວງ­ຫາ​ຜົນ​ປະ­ໂຫຍດ​ສ່ວນ​ຕົວ ໂດຍ​ໃຊ້​ການ​ໄປ​ຕີ​ກ໋ອບ​ຢູ່​ຕ່າງ­ປະ­ເທດ​ບັງ​ໜ້າ ເພື່ອ​ໄປ​ພົບ​ກັບ​ເຫຼົ່າ​ນັກ­ທຸ­ລະ­ກິດ​ທີ່​ມີ​ຜົນ​ໄດ້­ຜົນ​ເສຍ​ຮ່ວມ​ກັນ ຂໍ້​ອ້າງ​ວ່າ​ໄປ​ຕີ​ກ໋ອບ​ນັ້ນ ໃນ​ຕົວ​ຈິງ​ແມ່ນ​ແຜນ­ການ​ທີ່​ໄດ້​ວາງ​ໄວ້​ລ່ວງ​ໜ້າ​ແລ້ວ ຂໍ້​ອ້າງ​ເລື່ອງ​ຕີ​ກ໋ອບ ແຕ່​ເພື່ອ​ຊອກ​ຜົນ​ປະ­ໂຫຍດ​ສ່ວນ​ຕົວ​ຂອງ​ເຫຼົ່າ​ພະ­ນັກ­ງານ​ສໍ້​ລາດ​ບັງ​ຫຼວງ​ນັ້ນ ໄດ້​ກາຍ­ເປັນ​ບັນ­ຫາ​ໜັກ­ໜ່ວງ​ທີ່​ມີ​ມາ​ແຕ່​ເຫິງ​ແລ້ວ​ຢູ່​ມາ​ເລ​ເຊຍ ການ​ໄປ​ຕີ​ກ໋ອບ​ໃນ​ລັກ­ສະ­ນະ​ນີ້​ຂອງ​ພະ­ນັກ­ງານ​ລັດ ແມ່ນ​ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ການ​ເງິນ​ຈາກ​ນັກ­ທຸ­ລະ­ກິດ ເຊັ່ນ: ຄ່າ​ປີ້​ຍົນ ຄ່າ​ພັກ​ເຊົາ ແລະ ຄ່າ​ບໍ­ລິ­ການ​ອື່ນໆ ການ​ສະ­ໜັບ­ສະ­ໜູນ​ດ້ວຍ​ການ​ເງິນ​ດັ່ງ­ກ່າວ ໃນ​ຕົວ​ຈິງ​ກໍ​ແມ່ນ​ການ​ໃຫ້ ແລະ ຮັບ​ສິນ​ບົນ ເພື່ອ​ຊື້​ຈ້າງ​ພະ­ນັກ­ງານ​ລັດ​ນັ້ນ​ເອງ ຍ້ອນ​ແນວ​ນີ້​ເອງ ຄະ­ນະ​ກຳ­ມະ­ການ​ຕ້ານ​ການ​ສໍ້​ລາດ​ບັງ​ຫຼວງ​ຂອງ​ມາ​ເລ​ເຊຍ ຈຶ່ງ​ເລັ່ງ​ແກ້​ໄຂ​ບັນ­ຫາ​ນີ້​ຢ່າງ​ຈິງ​ຈັງ ແລະ ຕິດ­ຕາມ​ບັນ­ດາ​ພະ­ນັກ­ງານ​ທີ່​ເປັນ​ເປົ້າ​ໝາຍ​ຢ່າງ​ໃກ້­ຊິດ.

    ທີ່ ອິນ​ໂດ​ເນ​ເຊຍ: ເລີ່ມ​ແຕ່​ຕົ້ນ​ປີ 2018 ເຈົ້າ​ໜ້າ­ທີ່​ຕຳ­ຫຼວດ ອິນ​ໂດ​ເນ​ເຊຍ ໄດ້​ປະ­ກາດ​ຜະ­ເດັດ​ເສິກ​ກັບ​ຂະ​ບວນ​ການ​ຄ້າ­ຂາຍ​ເຫຼົ້າ​ເຖື່ອນ ທີ່​ໄດ້​ຂ້າ​ຊີ­ວິດ​ຜູ້​ບໍ­ລິ­ໂພກ​ໄປ​ຈຳ­ນວນ 51 ຄົນ ຢູ່​ເກາະ ຈາ​ວາ ຕາ­ເວັນ­ຕົກ ແລະ 31 ຄົນ ໃນ​ເຄຼດ​ເຕີ​ຈາ​ວາ ໃນ​ທ້າຍ​ເດືອນ​ມີ­ນາ-ຕົ້ນ​ເດືອນ​ເມ­ສາ ປີ 2018 ທ່ານ​ພົນ​ເອກ ເຊຍ ຟຼຸດ​ດິນ ຮອງ​ຜູ້​ບັນ­ຊາ​ການ​ຕຳ­ຫຼວດ ອິນ​ໂດ​ເນ​ເຊຍ ໄດ້​ຢ້ຳ​ກ່ຽວ​ກັບ​ເລື່ອງ​ນີ້​ວ່າ ເຈົ້າ​ໜ້າ­ທີ່​ຕຳ­ຫຼວດ​ຈະ​ເຄື່ອນ​ໄຫວ​ປະ­ຕິ­ບັດ​ງານ​ຕ້ານ​ເຫຼົ້າ​ເຖື່ອນ​ໃຫ້​ຊິ້ນ​ຊາກ​ໄປ​ໂດຍ​ໄວ ທ່ານ​ບອກ​ວ່າ ຜູ້​ທີ່​ຕົກ​ເປັນ​ເຫຍື່ອ​ເຫຼົ້າ​ເຖື່ອນ​ໃນ​ທົ່ວ​ອິນ​ໂດ​ເນ​ເຊຍ ນັ້ນ ມີ​ຫຼາຍ​ກວ່າ 100 ຄົນ​ແລ້ວ ທ່ານ​ບອກ​ອີ​ກວ່າ ແກ້​ໄຂ​ບັນ­ຫາ​ນີ້ ອຳ­ນາດ​ການ​ປົກ­ຄອງ​ທຸກ​ຂັ້ນ​ຕ້ອງ​ຈຳ­ກັດ​ການ​ຜະ­ລິດ​ເຫຼົ້າ​ເຖື່ອນ​ໃຫ້​ໄດ້ ສ່ວນ​ເຈົ້າ​ໜ້າ­ທີ່​ຕຳ­ຫຼວດ​ນັ້ນ ກໍ​ຕ້ອງ​ຮອບ​ຮູ້​ບັນ­ຫາ​ທີ່​ເປັນ​ກົກ​ຮາກ​ຂອງ​ການ­ຈຳ­ໜ່າຍ ແລະ ການ​ບໍ­ລິ­ໂພກ​ເຫຼົ້າ​ເຖື່ອນ​ແບບ​ຊະ­ຊາຍ ແລະ ຕ້ອງ​ນຳ​ເອົາ​ຜູ້​ກະ­ທຳ​ຜິດ​ມາ​ລົງ­ໂທດ​ຢ່າງ​ສະ​ສົມ​ໃຫ້​ໄດ້ ຂ່າວ​ບອກ​ວ່າ ເຫຼົ້າ​ເຖື່ອນ​ທີ່​ເຈົ້າ​ໜ້າ­ທີ່​ຕຳ­ຫຼວດ​ຢຶດ​ມາ​ໄດ້​ນັ້ນ ມີ​ສ່ວນ​ປະ­ສົມ​ຂອງ​ເຫຼົ້າ​ສົດ​ກັບ​ສານ​ທີ່​ມີ​ໃນ​ສ່ວນ​ປະ­ສົມ​ຂອງ​ເຄື່ອງ​ດື່ມ​ຊູ​ກຳ­ລັງ.

    ທີ່ ສິງ­ກະ­ໂປ: ໃນ​ວັນ​ທີ 21 ເດືອນ​ມີ­ນາ 2018 ສະ­ພາ​ແຫ່ງ​ຊາດ​ສິງ­ກະ­ໂປ ໄດ້​ຮັບ­ຮອງ​ເອົາ​ກົດ­ໝາຍ​ກ່ຽວ​ກັບ​ເຫດ­ການ​ໂຈມ​ຕີ​ທີ່​ມີ​ລັກ­ສະ­ນະ​ກໍ່​ການ​ຮ້າຍ ໂດຍ​ໄດ້​ກຳ­ນົດ​ຫ້າມ​ການ​ຖ່າຍ­ຮູບ ຖ່າຍ​ວີ​ດີ​ໂອ ການ​ສົ່ງ​ຂໍ້­ຄວາມ ການ​ບັນ­ທຶກ​ສຽງ ກ່ຽວ​ກັບ​ບັນ­ຫາ​ທີ່​ມີ​ລັກ­ສະ­ນະ​ວິ­ພາກ​ວິ­ຈານ ເລື່ອງ​ການ​ປະ­ຕິ­ບັດ​ງານ​ຂອງ​ເຈົ້າ​ໜ້າ­ທີ່​ຕຳ­ຫຼວດ ການ​ກຳ­ນົດ​ຫ້າມ​ດັ່ງ­ກ່າວ ແມ່ນ​ເພື່ອ​ປ້ອງ​ກັນ​ບໍ່​ໃຫ້​ພວກ​ກໍ່​ການ​ຮ້າຍ​ກຳ​ໄດ້​ຂໍ້​ມູນ​ການ​ສືບ­ສວນ ແລະ ການ​ປະ­ຕິ­ບັດ​ງານ​ຊ່ວຍ­ເຫຼືອ​ເຫຍື່ອ ຂໍ້​ກຳ­ນົດ​ຫ້າມ​ນີ້ ປະ­ຕິ­ບັດ​ສະ­ເພາະ​ໃນ​ເຂດ​ພິ­ເສດ​ເທົ່າ​ນັ້ນ ແລະ ຈະ​ຖືກ​ຍົກ­ເລີກ​ຫຼັງ​ຈາກ​ສະ­ຖາ­ນະ​ການ​ກ້າວ​ເຂົ້າ​ສູ່​ສະ­ພາບ​ປົກ­ກະ­ຕິ.

ຂ່າວທີ່ກ່ຽວຂ້ອງ