ຂ່າວຫຼ້າສຸດ

ພັດທະນາຄວາມສາມາດ ດ້ານລະບາດວິທະຍາໃຫ້ພະນັກງານ

1.145 02 ພ.ພ. 2019 ຂ່າວໜ້າ​ໜຶ່ງ

    ກະ­ຊວງ​ສາ­ທາ­ລະ­ນະ​ສຸກ ຮ່ວມ​ກັບ​ສູນ​ຄວບ​ຄຸມ ແລະ ປ້ອງ​ກັນ​ພະ­ຍາດ ສ ອາ​ເມ​ຣິ​ກາ (USCDC) ຈັດ​ພິ­ທີ​ມອບ​ໃບ­ຢັ້ງ­ຢືນ​ໃຫ້​ຜູ້​ສຳ­ເລັດ ການ​ເຝິກ­ອົບ­ຮົມ​ລະ­ບາດ​ວິ­ທະ­ຍາ​ພາກ​ສະ­ໜາມ ຮຸ່ນ​ທີ 10 ຂຶ້ນ​ວັນ​ທີ 25 ເມ­ສາ 2019 ຜ່ານ​ມາ ຢູ່​ໂຮງ­ແຮມ​ຄຣາວ​ພລາ​ຊາ ໂດຍ​ມີ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ​ນາງ Rena Bitter ເອກ​ອັກ​ຄະ​ລັດ​ຖະ​ທູດ ສ ອາ​ເມ​ຣິ​ກາ ປະ­ຈຳ​ລາວ ທ່ານ Takeshi Kasai ອະ­ທິ­ການ​ບໍ­ດີ​ອົງ­ການ​ອະ­ນາ­ໄມ​ໂລກ ປະ­ຈຳ​ພາກ​ພື້ນ​ອາ­ຊີ​ຕາ­ເວັນ­ຕົກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຊຸດ​ເຝິກ­ອົບ­ຮົມ​ລະ­ບາດ​ວິ­ທະ­ຍາ​ພາກ​ສະ­ໜາມ ໄດ້​ຈັດ​ຂຶ້ນ​ແຕ່​ປີ 2009 ເປັນ­ຕົ້ນ​ມາ ແຕ່​ລະ​ປີ​ສຳ​ມະ​ນາ​ກອນ​ເຂົ້າ​ຮ່ວມ 8 ທ່ານ ທີ່​ມາ​ຈາກ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກະ­ຊວງ​ສາ­ທາ­ລະ­ນະ​ສຸກ ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ງົບ­ປະ­ມານ ແລະ ວິ­ຊາ​ການ​ຈາກ​ໂຄງ­ການ​ຫຼຸດ­ຜ່ອນ​ໄພ​ຂົ່ມ­ຂູ່ ສ ອາ​ເມ​ຣິ​ກາ ສູນ​ຄວບ​ຄຸມ­ພະ​ຍາດ​ຕິດ­ຕໍ່ ສ ອາ​ເມ​ຣິ​ກາ ແລະ ອົງ­ການ​ອະ­ນາ­ໄມ​ໂລກ ຈຸດ­ປະ­ສົງ​ການ​ຈັດ​ຊຸດ​ເຝິກ­ອົບ­ຮົມ​ນີ້ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ວຽກ​ງານ​ສາ­ທາ­ລະ­ນະ​ສຸກ ໃນ​ການ​ພັດ­ທະ­ນາ​ຄວາມ​ສາ­ມາດ​ດ້ານ​ລະ­ບາດ​ວິ­ທະ­ຍາ ໃຫ້​ພະ­ນັກ­ງານ​ຜູ້​ທີ່​ຮັບ­ຜິດ­ຊອບ​ວຽກ​ງານ​ປ້ອງ​ກັນ ແລະ ຄວບ​ຄຸມ­ພະ​ຍາດ​ແຕ່​ສູນ​ກາງ​ຮອດ​ທ້ອງ­ຖິ່ນ.

    ປັດ­ຈຸ­ບັນ​ມີ​ຜູ້​ສຳ­ເລັດ​ການ​ເຝິກ­ອົບ­ຮົມ​ແລ້ວ 79 ຄົນ ໃນ​ນີ້ ຂັ້ນ​ສູນ​ກາງ 29 ຄົນ ຂັ້ນ​ແຂວງ 34 ຄົນ ຂັ້ນ​ເມືອງ 8 ຄົນ ເຊິ່ງ​ຜູ້​ທີ່​ຈົບ​ໄປ​ແລ້ວ​ມີ​ບົດ­ບາດ​ສຳ­ຄັນ​ຕໍ່​ວຽກ​ງານ​ສາ­ທາ­ລະ­ນະ​ສຸກ ໂດຍ​ສະ­ເພາະ ການ​ປະ­ກອບ­ສ່ວນ​ໃນ​ວຽກ​ງານ​ກັນ ແລະ ຄວບ​ຄຸມ­ພະ​ຍາດ​ຕິດ­ຕໍ່ ຄື: ເຂົ້າ​ຮ່ວມ​ການ​ເຝົ້າ​ລະ­ວັງ ສອບ​ສວນ​ການ​ລະ­ບາດ ວິ­ເຄາະ​ຂໍ້​ມູນ ແລະ ຕອບ​ໂຕ້​ການ​ລະ­ບາດ​ຂອງ​ພະ­ຍາດ​ຕິດ­ຕໍ່ ໃນ​ຂອບ​ເຂດ​ທົ່ວ​ປະ­ເທດ ນອກ​ນີ້ ຍັງ​ສ້າງ​ບົດ​ຄົ້ນ­ຄວ້າ​ກ່ຽວ​ກັບ​ບັນ­ຫາ​ດ້ານ​ສາ­ທາ­ລະ­ນະ​ສຸກ ທີ່​ມີ​ໃນ​ປັດ­ຈຸ­ບັນ ເພື່ອ​ຊອກ​ຫາ​ສາ­ເຫດ​ຂອງ​ອາ­ການ​ເຈັບ ເພື່ອ​ສະ­ເໜີ​ການ​ນຳ​ໃນ​ການ​ວາງ​ມາດ​ຕະ­ການ​ແກ້​ໄຂ ແລະ ປັບ­ປຸງ​ວຽກ​ງານ​ກັນ ແລະ ຄວບ​ຄຸມ­ພະ​ຍາດ​ໃຫ້​ດີ​ຂຶ້ນ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ