ຫາລືສິ່ງທ້າທາຍໃນການແກ້ໄຂບັນຫາ ລະເບີດບໍ່ທັນແຕກຢູ່ລາວ

884 02 ພ.ພ. 2019 ຂ່າວໜ້າ​ໜຶ່ງ
ຫາລືສິ່ງທ້າທາຍໃນການແກ້ໄຂບັນຫາ ລະເບີດບໍ່ທັນແຕກຢູ່ລາວ

    ກະ­ຊວງ​ການ​ຕ່າງ­ປະ­ເທດ ຮ່ວມ​ກັບ​ຄະ­ນະ​ກຳ­ມະ­ການ​ກາ­ແດງ​ສາ­ກົນ (ICRC) ປະ­ຈຳ​ລາວ ຈັດ​ສຳ​ມະ​ນາ​ກ່ຽວ​ກັບ​ລະ­ເບີດ​ຝັງ​ດິນ ລະ­ເບີດ​ລູກ​ຫວ່ານ ແລະ ສິ່ງ​ເສດ​ເຫຼືອ​ຕົກ​ຄ້າງ​ຈາກ​ສົງ­ຄາມ ຂຶ້ນ​ວັນ​ທີ 29-30 ເມ­ສາ 2019 ຢູ່​ໂຮງ­ແຮມ​ຄຣາວ​ພລາ​ຊາ ໂດຍ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ວົງ​ໜໍ່​ແກ້ວ ຫົວ­ໜ້າ​ກົມ​ອົງ​ການ­ຈັດ­ຕັ້ງ​ສາ­ກົນ ກະ­ຊວງ​ການ​ຕ່າງ­ປະ­ເທດ ແລະ ທ່ານ Christoph Sutter ຫົວ­ໜ້າ​ຫ້ອງ­ການ​ພາກ​ພື້ນ ICRC ປະ­ຈຳ​ລາວ ມີ​ບັນ­ດາ​ທູ­ຕາ­ນຸ­ທູດ ຄູ່​ຮ່ວມ​ພັດ­ທະ­ນາ ຜູ້­ຕາງ­ໜ້າ​ຈາກ​ລາວ ກຳ­ປູ­ເຈຍ ຫວຽດ­ນາມ ໄທ ມຽນ​ມາ ຟີ​ລິບ​ປີນ ອິນ​ໂດ​ເນ​ເຊຍ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ​ມະ​ນາ​ຄັ້ງ​ນີ້ ເປັນ​ສຳ​ມະ​ນາ​ລະ­ດັບ​ພາກ​ພື້ນ ເຊິ່ງ​ຈັດ​ຂຶ້ນ​ເປັນ​ຄັ້ງ​ທຳ​ອິດ​ຢູ່​ລາວ ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ທຶນ ແລະ ຊ່ຽວ­ຊານ​ຈາກ ICRC ປະ­ຈຳ​ລາວ ຈຸດ­ປະ­ສົງ​ເພື່ອ​ປຶກ­ສາ​ຫາ­ລື​ກ່ຽວ​ກັບ​ສິ່ງ​ທ້າ​ທາຍ ທີ່​ພົບ­ພໍ້​ໃນ​ການ​ແກ້​ໄຂ​ບັນ­ຫາ​ລະ­ເບີດ​ຝັງ​ດິນ ລະ­ເບີດ​ລູກ​ຫວ່ານ ແລະ ສິ່ງ​ເສດ​ເຫຼືອ​ອື່ນໆ​ຈາກ​ສົງ­ຄາມ​ທີ່​ຕົກ​ຄ້າງ​ໃນ​ປະ­ເທດ ແລະ ການ​ເຜີຍ­ແຜ່​ຄວາມ​ຮັບ​ຮູ້​ກ່ຽວ​ກັບ​ຜົນ​ກະ­ທົບ​ຂອງ​ອາ­ວຸດ​ເຫຼົ່າ​ນີ້ ສົ່ງ­ເສີມ​ການ​ຮ່ວມ​ມື​ລະ­ຫວ່າງ​ປະ­ເທດ​ຜູ້​ໃຫ້​ທຶນ ແລະ ປະ­ເທດ​ທີ່​ໄດ້​ຮັບ​ຜົນ​ກະ­ທົບ​ຈາກ​ລະ­ເບີດ​ບໍ່​ທັນ​ແຕກ​ຕົກ​ຄ້າງ​ຈາກ​ສົງ­ຄາມ ໃນ​ການ​ແກ້​ໄຂ​ສິ່ງ​ທ້າ​ທາຍ​ດ້ານ​ການ​ທຳ­ລາຍ​ລະ­ເບີດ ກວດ​ກູ້​ລະ­ເບີດ ການ​ຊ່ວຍ­ເຫຼືອ​ຜູ້​ຖືກ​ເຄາະ​ຮ້າຍ ແລະ ການ​ສຶກ​ສາ ເພື່ອ​ຊ່ວຍ​ຫຼຸດ­ຜ່ອນ​ຄວາມ​ສ່ຽງ​ຈາກ​ລະ­ເບີດ​ບໍ່​ທັນ​ແຕກ ທີ່​ຕົກ​ຄ້າງ​ຢູ່​ລາວ (ລບຕ) ແລະ ສົ່ງ­ເສີມ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ສົນ­ທິ­ສັນ­ຍາ​ສາ­ກົນ​ທີ່​ກ່ຽວ­ຂ້ອງ ເປັນ­ຕົ້ນ​ການ​ປືກ​ສາ​ຫາ­ລື​ຫຼາຍ​ບັນ­ຫາ​ທີ່​ກ່ຽວ​ພັນ​ເຖິງ​ຜົນ​ຮ້າຍ ແລະ ຜົນ​ກະ­ທົບ​ຈາກ​ລະ­ເບີດ​ຝັງ​ດິນ ລະ­ເບີດ​ລູກ​ຫວ່ານ ແລະ ສິ່ງ​ເສດ​ເຫຼືອ​ຕົກ​ຄ້າງ​ຈາກ​ສົງ­ຄາມ ການ​ຊ່ວຍ­ເຫຼືອ​ດ້ານ​ມະ­ນຸດ­ສະ­ທຳ​ຕໍ່​ຜູ້​ທີ່​ໄດ້​ຮັບ​ຜົນ​ກະ­ທົບ​ຈາກ​ລະ­ເບີດ​ບໍ່​ທັນ​ແຕກ ການ​ແລກ­ປ່ຽນ​ບົດ­ຮຽນ ແລະ ແບບ­ແຜນ​ການ​ເຮັດ​ວຽກ​ທີ່​ດີ ໃນ​ການ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ຂອງ​ແຕ່​ລະ​ປະ­ເທດ ແລະ ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ຕ່າງໆ​ໃນ​ຂອບ​ວຽກ​ງານ​ດັ່ງ­ກ່າວ ນອກ​ນີ້ ຍັງ​ໄດ້​ແລກ­ປ່ຽນ​ຄຳ​ຄິດ​ເຫັນ​ຈາກ​ປະ­ເທດ​ຄູ່​ຮ່ວມ​ພັດ­ທະ­ນາ ອົງ​ການ­ຈັດ­ຕັ້ງ​ສາ­ກົນ​ທີ່​ບໍ່​ສັງ­ກັດ​ລັດ­ຖະ­ບານ ແລະ ໜ່ວຍ​ງານ​ທີ່​ກ່ຽວ­ຂ້ອງ​ພາຍ​ໃນ ແລະ ຕ່າງ­ປະ­ເທດ ກ່ຽວ​ກັບ​ບັນ­ຫາ​ສິ່ງ​ທ້າ​ທາຍ ແລະ ແຜນ­ການ​ໃນ­ຕໍ່­ໜ້າ.

    ວຽກ​ງານ​ການ​ເກັບ​ກູ້​ລະ­ເບີດ​ບໍ່​ທັນ​ແຕກ ແລະ ສິ່ງ​ເສດ​ເຫຼືອ​ອື່ນໆ​ທີ່​ຕົກ​ຄ້າງ​ຈາກ​ສົງ­ຄາມ ແມ່ນ​ບຸ­ລິ­ມະ­ສິດ​ໜຶ່ງ​ທີ່​ສຳ­ຄັນ​ຂອງ​ລັດ­ຖະ­ບານ​ລາວ ເພາະ​ວຽກ​ງານ​ດັ່ງ­ກ່າວ​ຕິດ​ພັນ​ກັບ​ຄວາມ​ປອດ​ໄພ​ຂອງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ແລະ ວຽກ​ງານ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຢ່າງ​ແຍກ​ອອກ​ຈາກ​ກັນ​ບໍ່​ໄດ້ ໂດຍ​ເຫັນ​ເຖິງ​ຄວາມ​ສຳ­ຄັນ​ດັ່ງ­ກ່າວ ລັດ­ຖະ­ບານ​ຈຶ່ງ​ໄດ້​ສ້າງ­ຕັ້ງ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ ລບຕ ອອກ​ນິ­ຕິ​ກຳ​ຕ່າງໆ ສຸມ​ກຳ­ລັງ​ແຮງ ແລະ ຊັບ­ພະ­ຍາ­ກອນ​ທີ່​ມີ​ໃນ​ການ​ແກ້​ໄຂ​ບັນ­ຫາ ລບຕ ຢູ່​ລາວ ຮ່ວມ​ມື​ກັບ​ສາ­ກົນ ເພື່ອ​ຮັບ­ປະ­ກັນ​ການ​ດຳ­ລົງ​ຊີ­ວິດ​ທີ່​ປອດ​ໄພ​ຂອງ​ປະ­ຊາ­ຊົນ ແລະ ສົ່ງ­ເສີມ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຢ່າງ­ຮອບ­ດ້ານ ອັນ​ພົ້ນ​ເດັ່ນ​ແມ່ນ​ການ​ຮັບ­ຮອງ​ເອົາ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ​ແຫ່ງ​ຊາດ (ປພຍ) ເປົ້າ​ໝາຍ​ທີ 18 ພາຍ​ໃຕ້​ຫົວ­ຂໍ້ “ຊີ­ວິດ​ທີ່​ປອດ​ໄພ​ຈາກ​ລະ­ເບີດ​ບໍ່​ທັນ​ແຕກ”.

ຂ່າວທີ່ກ່ຽວຂ້ອງ