ຮ່ວມມືສະໜອງຂໍ້ມູນນັກສຶກສາ ທີ່ຂຶ້ນທະບຽນຊອກຫາວຽກ

1.591 02 ພ.ພ. 2019 ຂ່າວໜ້າ​ໜຶ່ງ

    ເພື່ອ​ເປັນ​ການ­ຈັດ­ຕັ້ງ​ປະ­ຕິ­ບັດ​ກົນ​ໄກ​ການ​ສະ­ໜອງ​ຂໍ້​ມູນ​ນັກ​ສຶກ​ສາ ທີ່​ຂຶ້ນ​ທະ­ບຽນ​ຊອກ​ຫາ​ວຽກ​ເຮັດ​ງານ​ທຳ ເພື່ອ​ລົງ​ໃນ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ​ແຫ່ງ​ຊາດ (LMIS) ໃຫ້​ມີ​ຫຼາຍ ແລະ ຄົບ​ຖ້ວນ​ເພື່ອ​ໃຫ້​ສັງ­ຄົມ ແລະ ຜູ້​ປະ­ກອບ​ການ​ໄດ້​ຮັບ​ຮູ້ ແລະ ນຳ​ໃຊ້​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ທີ່​ມີ​ຄຸນ​ນະ​ພາບ​ສູງ ທັນ​ຕາມ​ເວ­ລາ​ຖືກ­ຕ້ອງ ແລະ ສອດ­ຄ່ອງ​ກັບ​ຄວາມ​ຕ້ອງ­ການ​ຂອງ​ຕະ­ຫຼາດ​ແຮງ​ງານ ໃນ​ວັນ​ທີ 22 ເມ­ສາ 2019 ທີ່​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ຮວ່ມ​ມື​ກັບ​ກົມ​ຈັດ​ຕັ້ງ ແລະ ພະ­ນັກ­ງານ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຈັດ​ພິ­ທີ​ລົງ​ນາມ​ບົດ​ບັນ­ທຶກ​ຮ່ວມ​ມື​ກັນ ຈັດ​ຕັ້ງ​ປະ­ຕິ­ບັດ​ກົນ​ໄກ​ສະ­ໜອງ​ຂໍ້​ມູນ​ນັກ​ສຶກ​ສາ ເພື່ອ​ຂຶ້ນ​ທະ­ບຽນ​ຊອກ​ຫາ​ວຽກ​ເຮັດ​ງານ​ທຳ ລົງ​ໃນ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ຕາງ­ໜ້າ​ເຊັນ​ໂດຍ​ທ່ານ ໄທ ແສງ​ອາ​ລຸນ ຮອງ​ຫົວ­ໜ້າ​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ແລະ ທ່ານ ບຸນ​ທະ­ວີ ໄຊ​ຍະ​ເພັດ ຮອງ​ຫົວ­ໜ້າ​ກົມ​ຈັດ​ຕັ້ງ ແລະ ພະ­ນັກ­ງານ ມີ​ພະ­ນັກ­ງານ​ກ່ຽວ­ຂ້ອງ​ສອງ​ຝ່າຍ​ເຂົ້າ​ຮ່ວມ.

    ທ່ານ ໄທ ແສງ​ອາ​ລຸນ ໄດ້​ກ່າວ​ວ່າ: ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ໄດ້​ພະ­ຍາ­ຍາມ​ພັດ­ທະ­ນາ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ໃຫ້​ມີ​ຄວາມ​ເຂັ້ມ­ແຂງ ແລະ ເປັນ​ລະ­ບົບ​ຄົບ​ຊຸດ ເພາະ­ວ່າ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ຈະ​ເຮັດ​ໜ້າ­ທີ່​ເປັນ​ສື່​ກາງ​ໃຫ້​ແກ່​ການ​ບໍ­ລິ­ການ​ຈັດ​ຫາ​ງານ ຊ່ວຍ​ແນະ­ນຳ​ໃນ​ການ​ຊອກ​ຫາ​ວຽກ​ເຮັດ​ງານ​ທຳ ສະ­ໜອງ​ຂໍ້​ມູນ​ກ່ຽວ​ກັບ​ບັນ­ດາ​ໜ້າ​ວຽກ​ຕ່າງໆ ທີ່​ຕະ­ຫຼາດ​ແຮງ​ງານ​ຕ້ອງ­ການ ແນະ­ນຳ​ບັນ­ດາ​ອາ­ຊີບ ຫຼື ໜ້າ​ວຽກ​ທີ່​ເໝາະ​ສົມ​ໃຫ້​ແກ່​ນັກ­ຮຽນ ນັກ​ສຶກ​ສາ ຫຼື ຜູ້​ທີ່​ກຳ­ລັງ​ຊອກ​ວຽກ​ເຮັດ​ສາ­ມາດ​ເຂົ້າ​ສະ­ໝັກ​ງານ​ໃນ​ໜ້າ​ວຽກ​ເຫຼົ່າ­ນັ້ນ ແນະ­ນຳ​ການ​ປະ­ກອບ​ອາ­ຊີບ​ໃຫ້​ຂໍ້​ມູນ​ຄ່າ​ແຮງ​ງານ​ຂອງ​ກຸ່ມ​ອາ­ຊີບ ໃຫ້​ຂໍ້​ມູນ​ກ່ຽວ​ກັບ​ອາ­ຊີບ ຫຼື ຕຳ­ແໜ່ງ​ງານ​ທີ່​ຈະ​ເກີດ​ຂຶ້ນ​ໃໝ່ ແລະ ອາ­ຊີບ​ທີ່​ອາດ​ຈະ​ເລີກ​ຈ້າງ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ