ລລທ-ໂຕະລາວ ຮ່ວມສ້າງຜູ້ປະກອບການໃໝ່ ເພື່ອສົ່ງເສີມເສດຖະກິດລາວ

1.097 02 ພ.ພ. 2019 ຂ່າວໜ້າ​ໜຶ່ງ
ລລທ-ໂຕະລາວ ຮ່ວມສ້າງຜູ້ປະກອບການໃໝ່ ເພື່ອສົ່ງເສີມເສດຖະກິດລາວ

    ລັດ​ວິ​ສາ​ຫະ​ກິດ​ລາວ​ໂທລະ​ຄົມ­ມະ­ນາ­ຄົມ (ລລທ) ຮ່ວມ​ກັບ​ກຸ່ມ​ບໍ­ລິ­ສັດ ໂຕະ​ລາວ ລິ​ເລີ່ມ​ການ​ກໍ່­ສ້າງ​ລະ­ບົບ​ນິ­ເວດ​ສະ​ຕາດ​ອັບ (Startup) ໃນ​ການ​ສົ່ງ­ເສີມ​ການ​ດຳ­ເນີນ​ທຸ­ລະ​ກິດ​ໄອ​ຊີ​ທີ ເຕັກ​ໂນ​ໂລ​ຊີ ນະ​ວັດ­ຕະ​ກຳ ແລະ ຄວາມ​ຄິດ​ສ້າງ­ສັນ ເພື່ອ​ຫວັງ​ໃຫ້​ເປັນ​ປັດ​ໄຈ​ສຳ­ຄັນ ໃນ​ການ​ພັດ­ທະ­ນາ​ເສດ­ຖະ­ກິດ​ຂອງ​ລາວ ຂຶ້ນ​ວັນ​ທີ 29 ເມ­ສາ 2019 ຢູ່ ລລທ ໂດຍ​ມີ​ທ່ານ ປີ​ຍະ​ວັດ ຈະ​ຣິ​ຍະ​ເສດ​ຖະ​ພົງ ຮອງ​ຜູ້­ອຳ­ນວຍ­ການ​ໃຫຍ່ ລລທ ທ່ານ​ນາງ ສຸ­ພາ​ພອນ ສວນ​ນະ​ວົງ ຜູ້​ກໍ່​ຕັ້ງ ແລະ ຜູ້­ອຳ­ນວຍ­ການ​ກຸ່ມ​ບໍ­ລິ­ສັດ​ໂຕະ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ສຸ­ພາ​ພອນ ສວນ​ນະ​ວົງ ກ່າວ​ວ່າ: ນີ້​ແມ່ນ​ການ​ລິ​ເລີ່ມ​ບາດ­ກ້າວ​ຄັ້ງ​ສຳ­ຄັນ ໃນ​ການ​ສ້າງ​ສະ​ຕາດ​ອັບ​ໃນ​ລາວ (ສະ​ຕາດ​ອັບ ໝາຍ​ເຖິງ​ການ​ສ້າງ​ຜູ້​ປະ­ກອບ​ການ​ໃໝ່​ພາຍ​ໃນ 54 ຊົ່ວ­ໂມງ) ພວກ​ເຮົາ​ມີ​ຄວາມ​ຕື່ນ­ເຕັ້ນ​ເປັນ​ຢ່າງ​ຍິ່ງ​ທີ່ ລລທ ເຊິ່ງ​ເປັນ​ຜູ້​ໃຫ້​ບໍ­ລິ­ການ​ດ້ານ​ໂທລະ​ຄົມ­ມະ­ນາ­ຄົມ​ທີ່​ໃຫຍ່​ທີ່​ສຸດ​ໃນ​ລາວ ໄດ້​ຕັດ­ສິນ​ໃຈ​ຮ່ວມ​ມື ແລະ ສະ­ໜັບ­ສະ­ໜູນ​ວຽກ​ງານ​ສະ​ຕາດ​ອັບ​ນຳ​ພວກ​ເຮົາ ບາດ­ກ້າວ​ນີ້​ຈະ​ຖືກ​ຈາ­ລຶກ​ໄວ້​ໃນ​ປະ­ຫວັດ­ສາດ​ຂອງ​ວົງ​ການ​ສະ​ຕາດ​ອັບ​ໃນ​ລາວ ພ້ອມ​ທັງ​ເຊື້ອ​ໝັ້ນ​ວ່າ​ຈະ​ມີ​ທຸ­ລະ​ກິດ​ສະ​ຕາດ​ອັບ​ທີ່​ຈະ​ມາ​ປ່ຽນ­ແປງ ແລະ ເຮັດ​ໃຫ້​ສັງ­ຄົມ ມີ​ຜົນ​ບວກ​ຫຼາຍ​ຂຶ້ນ ພ້ອມ​ນີ້ ກໍ​ຫວັງ​ວ່າ​ຈະ​ມີ​ບໍ­ລິ­ສັດ​ໃຫຍ່ໆ​ເຂົ້າ​ມາ​ເປັນ​ສ່ວນ​ໜຶ່ງ ໃນ​ການ​ພັດ­ທະ­ນາ​ວົງ​ການ​ສະ​ຕາດ​ອັບ​ຂອງ​ພວກ​ເຮົາ.

    ທ່ານ ປີ​ຍະ​ວັດ ຈະ​ຣິ​ຍະ​ເສດ​ຖະ​ພົງ ກ່າວ​ວ່າ: ດ້ວຍ​ວິ­ໄສ​ທັດ​ທີ່​ຄ້າຍ­ຄື​ກັນ​ກັບ​ຜູ້​ສ້າງ​ສະ​ຕາດ​ອັບ ແບບ​ໂຕະ​ລາວ ລລທ ຈຶ່ງ​ໄດ້​ຕັດ­ສິນ​ໃຈ​ທີ່​ຈະ​ເລີ່ມ​ບາດ­ກ້າວ​ທຳ​ອິດ​ນີ້ ເພື່ອ​ສ້າງ​ການ​ຮ່ວມ​ມື​ໃນ​ການ​ສົ່ງ­ເສີມ​ລະ­ບົບ​ນິ­ເວດ​ສະ​ຕາດ​ອັບ​ຮ່ວມ​ກັນ ເພື່ອ​ເລີ່ມ​ບາດ­ກ້າວ​ທີ່​ສຳ­ຄັນ​ພວກ​ເຮົາ​ຈະ​ຈັດ​ແຂ່ງ­ຂັນ “Startup Weekend Vientiane” (ການ​ແຂ່ງ­ຂັນ​ແນວ​ຄວາມ​ຄິດ​ດ້ານ​ທຸ­ລະ​ກິດ) ນຳ​ສະ­ເໜີ​ໂດຍ ລລທ ໃນ​ວັນ​ທີ 24-26 ພຶດ­ສະ­ພາ 2019 ໂດຍ​ຜ່ານ​ການ​ແຂ່ງ­ຂັນ 5 ທີມ​ທີ່​ມີ​ຄຸນ­ສົມ­ບັດ​ເໝາະ​ສົມ ຈະ​ໄດ້​ຮັບ​ຄັດ​ເລືອກ​ເຂົ້າ​ຮ່ວມ​ໂຄງ­ການ​ບົ່ມ​ເພາະ​ທຸ­ລະ​ກິດ​ເປັນ​ເວ­ລາ 1 ປີ.

    ໄລ­ຍະ​ຜ່ານ​ມາ ໂຕະ​ລາວ ເຊິ່ງ​ເປັນ​ສູນ​ບົ່ມ​ເພາະ​ທຸ­ລະ​ກິດ​ສະ​ຕາດ​ອັບ​ທີ່​ໃຫຍ່​ທີ່​ສຸດ​ໃນ​ລາວ ໄດ້​ຈັດ​ແຂ່ງ­ຂັນ Startup Weekend ແລ້ວ 6 ຄັ້ງ ເຊິ່ງ​ມີ​ທຸ­ລະ​ກິດ​ເດັ່ນໆ​ທີ່​ເກີດ​ຈາກ​ການ​ແຂ່ງ­ຂັນ​ເຊັ່ນ: Bizgital Mual.la Loca book delivery ແລະ ອື່ນໆ​ທີ່​ແນວ​ຄວາມ​ຄິດ​ທາງ​ທຸ­ລະ​ກິດ​ໄດ້​ຖືກ​ນຳ­ໄປ​ພັດ­ທະ­ນາ​ໃຫ້​ເປັນ​ທຸ­ລະ​ກິດ​ທີ່­ແທ້​ຈິງ ສຳ­ລັບ​ຄັ້ງ​ນີ້ ເປັນ​ຄັ້ງ​ທີ 7 ມີ​ຜູ້​ເຂົ້າ​ຮ່ວມ​ແຂ່ງ­ຂັນ​ເກືອບ 700 ຄົນ ເຊິ່ງ​ຜູ້​ສົນ­ໃຈ​ສາ­ມາດ​ສອບ​ຖາມ​ໄດ້​ທີ່: [email protected] 020 77010655 ຫຼື fb.com/StartupWeekendVientaine.

ຂ່າວທີ່ກ່ຽວຂ້ອງ