ສະໜອງທຶນພັດທະນາສວນພຶກສາສາດ ຫ້ວຍຍາງ-ດົງໝາກຄາຍ

1.192 02 ພ.ພ. 2019 ຂ່າວໜ້າ​ໜຶ່ງ
ສະໜອງທຶນພັດທະນາສວນພຶກສາສາດ ຫ້ວຍຍາງ-ດົງໝາກຄາຍ

    ພິ­ທີ​ລົງ​ນາມ​ສັນ­ຍາ​ສະ­ໜອງ​ທຶນ​ໃຫ້ 2 ໂຄງ­ການ ໃນ​ການ​ຟື້ນ​ຟູ ແລະ ພັດ­ທະ­ນາ​ສວນ­ພຶກ­ສາ­ສາດ​ຫ້ວຍ​ຍາງ-ດົງ​ໝາຍ​ຄາຍ ຈັດ​ຂຶ້ນ​ວັນ​ທີ 26 ເມ­ສາ 2019 ຢູ່​ໂຮງ­ແຮມ​ວຽງ​ຈັນ​ພລາ​ຊາ ລະ­ຫວ່າງ​ທ່ານ​ນາງ ບຸນ​ພາ​ມາ ໂພ­ທິ​ສານ ຮອງ​ຫົວ­ໜ້າ​ຫ້ອງ­ການ​ກອງ​ທຶນ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ທ່ານ ຊູ​ຊາດ ໄຊ​ຍະ​ກຸມ­ມານ ຫົວ­ໜ້າ​ກົມ​ປ່າ­ໄມ້ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ທ່ານ​ນາງ ລັດ­ສະ­ໝີ ບຸບ­ຜາ ຄະ­ນະ­ບໍ­ດີ ຄະ­ນະ​ວິ­ທະ­ຍາ­ສາດ​ປ່າ­ໄມ້ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໂດຍ​ມີ​ທ່ານ ພູ​ວົງ ຫຼວງ​ໄຊ­ຊະ­ນະ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ຮອງ​ຫົວ­ໜ້າ​ກອງ​ທຶນ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ວອນ​ມາ­ລີ ມັງ​ໜໍ່​ເມກ ຜູ້​ປະ­ສານ​ງານ​ໂຄງ­ການ ກ່າວ​ວ່າ: ສຳ­ລັບ​ໂຄງ­ການ​ທຳ​ອິດ​ຂອງ​ກົມ​ປ່າ­ໄມ້ ມີ​ມູນ​ຄ່າ 1,64 ຕື້​ກີບ ໄລ­ຍະ​ການ​ປະ­ຕິ­ບັດ​ໂຄງ­ການ 4 ປີ (26 ເມ­ສາ 2019-25 ເມ­ສາ 2023) ເຊິ່ງ​ເປັນ​ໂຄງ­ການ​ປູກ​ຕົ້ນ­ໄມ້ ເພື່ອ​ຟື້ນ​ຟູ​ສວນ­ພຶກ­ສາ­ສາດ​ຫ້ວຍ​ຍາງ-ດົງ​ໝາຍ​ຄາຍ ເພື່ອ​ປະ­ກອບ­ສ່ວນ​ຟື້ນ​ຟູ​ສະ­ພາບ​ປ່າ­ໄມ້​ຢູ່​ເຂດ​ດັ່ງ­ກ່າວ ໃຫ້​ມີ​ຄວາມ​ດົກ­ໜາ ແລະ ອຸ­ດົມ­ສົມ­ບູນ​ໄປ​ດ້ວຍ​ຊະ­ນິດ​ພັນ​ໄມ້​ພື້ນ­ເມືອງ ແລະ ພັນ​ໄມ້​ຕ່າງ­ປະ­ເທດ ແນ­ໃສ່​ເຮັດ​ໃຫ້​ສວນ­ພຶກ­ສາ­ສາດ​ແຫ່ງ​ນີ້ ກາຍ­ເປັນ​ສະ­ຖານ­ທີ່​ສຶກ​ສາ​ຄົ້ນ­ຄວ້າ​ດ້ານ​ປ່າ­ໄມ້ ເປັນ​ແຫຼ່ງ​ແນວ​ພັນ​ໄມ້ ແລະ ເປັນ​ສະ­ຖານ­ທີ່­ພັກ­ຜ່ອນ.

    ສ່ວນ​ໂຄງ­ການ​ທີ 2 ຂອງ​ຄະ­ນະ​ວິ­ທະ­ຍາ­ສາດ​ປ່າ­ໄມ້ ມີ​ມູນ​ຄ່າ 839 ລ້ານ​ກວ່າ​ກີບ ໄລ­ຍະ​ປະ­ຕິ­ບັດ​ໂຄງ­ການ 2 ປີ (26 ເມ­ສາ 2019-25 ເມ­ສາ 2021) ເຊິ່ງ​ເປັນ​ໂຄງ­ການ​ພັດ­ທະ­ນາ​ສວນ­ພຶກ­ສາ­ສາດ​ຫ້ວຍ​ຍາງ-ດົງ​ໝາຍ​ຄາຍ ເພື່ອ​ຟື້ນ​ຟູ ແລະ ປູກ​ຄືນ​ໃນ​ພື້ນ​ທີ່​ສວນ­ພຶກ­ສາ­ສາດ ໃຫ້​ມີ​ຄວາມ​ອຸ­ດົມ­ສົມ­ບູນ​ໄປ​ດ້ວຍ​ພືດ​ພັນ​ໄມ້​ຫຼາຍໆ​ຊະ­ນິດ​ພື້ນ­ເມືອງ ປົກ​ປັກ​ຮັກ­ສາ​ຊະ­ນິດ​ພັນ​ພືດ ສຶກ​ສາ-ຄົ້ນ­ຄວ້າ​ໃນ​ລະ­ດັບ​ຊະ­ນິດ​ພັນ ຈົນ​ໄປ​ເຖິງ​ລະ­ດັບ​ສັງ­ຄົມ​ພືດ ລະ­ບົບ​ນິ­ເວດ ແລະ ສາ­ມາດ​ສ້າງ​ລາຍ​ຮັບ​ໃຫ້​ແກ່​ປະ­ເທດ​ຊາດ.

    ນອກ​ນີ້ ຍັງ​ສ້າງ​ໃຫ້​ເປັນ​ສະ­ຖານ­ທີ່​ເຝິກ​ທົດ​ລອງ ຄົ້ນ­ຄວ້າ ສາ­ທິດ​ວິ­ຊາ​ຕ່າງໆ​ຂອງ​ຫຼັກ­ສູດ​ທີ່​ກ່ຽວ­ຂ້ອງ​ໃນ​ຄະ­ນະ​ວິ­ທະ­ຍາ­ສາດ​ປ່າ­ໄມ້ ແລະ ຄະ­ນະ​ວິ­ຊາ​ຕ່າງໆ ໃນ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ເປັນ​ບ່ອນ​ສາ­ທິດ ເປັນ​ບ່ອນ​ພັກ­ຜ່ອນ ເປັນ​ການ​ປູກ​ຈິດ​ສຳ­ນຶກ​ໃຫ້​ຄົນ​ຮຸ່ນ​ຫຼັງ ເວົ້າ​ສະ­ເພາະ ນັກ­ຮຽນ-ນັກ​ສຶກ​ສາ​ລະ­ດັບ​ຕ່າງໆ​ໃນ​ທົ່ວ​ປະ­ເທດ ເຫັນ​ໄດ້​ຄວາມ​ສຳ­ຄັນ​ຂອງ​ການ​ອະ­ນຸ​ຮັກ​ຊັບ­ພະ­ຍາ­ກອນ​ປ່າ­ໄມ້ ພູມ​ປັນ­ຍາ​ທ້ອງ­ຖິ່ນ ແລະ ວິ­ຖີ​ຊີ­ວິດ​ແບບ​ດັ້ງ­ເດີມ.

ຂ່າວທີ່ກ່ຽວຂ້ອງ