ສາລາວົງ ທໍາມະເຈດີ ຜະລິດລູກກົບຂາຍສ້າງລາຍຮັບ 30 ລ້ານກີບຕໍ່ປີ

1.351 03 ພ.ພ. 2019 ຂ່າວໜ້າ​ໜຶ່ງ
ສາລາວົງ ທໍາມະເຈດີ ຜະລິດລູກກົບຂາຍສ້າງລາຍຮັບ 30 ລ້ານກີບຕໍ່ປີ

    ເພື່ອສືບຕໍ່ອະນຸຮັກມູນເຊື້ອດຸໝັ່ນຂອງແມ່ຍິງລາວ ສ້າງທຸກເງື່ອນໄຂອໍານວຍຄວາມສະດວກໃຫ້ສະມາຊິກໃນຄອບຄົວ ຕັ້ງໜ້າປະກອບສ່ວນໃນພາລະກິດລວມຂອງຊາດ ແນໃສ່ປະຕິບັດຂໍ້ແຂ່ງຂັນ 3 ດີຂອງແມ່ຍິງລາວ ຄືພົນລະເມືອງດີ ພັດທະນາດີ ແລະ ສ້າງຄອບຄົວດີ ເຊິ່ງນາງ ສາລາວົງ ທຳມະເຈດີ ແມ່ນສະມາຊິກສະຫະພັນແມ່ຍິງຄົນໜຶ່ງ ທີ່ໄດ້ສືບຕໍ່ມູນເຊື້ອດຸໝັ່ນ ມານຳໃຊ້ເຂົ້າໃນການລ້ຽງລູກກົບສ້າງເສດຖະກິດຄອບຄົວໃຫ້ເຂັ້ມແຂງ ຈົນກາຍເປັນຄອບຄົວຕົວແບບ.

    ທ່ານນາງ ສາລາວົງ ທຳມະເຈດີ ຄອບຄົວຕົວແບບໃນການຜະລິດລູກກົບ ບ້ານໜອງສະ ເມືອງນາຊາຍທອງ ນະຄອນຫຼວງວຽງຈັນ ໃຫ້ສໍາພາດເມື່ອບໍ່ດົນມານີ້ວ່າ: ຕົນເອງເປັນພະນັກງານລັດສັງກັດໜ່ວຍງານບໍລິຫານງານ ແລະ ຂໍ້ມູນຂ່າວສານ ສູນພັດທະນາການປະມົງນໍ້າຊ່ວງ ໄດ້ນຳໃຊ້ເວລາຫວ່າງນອກໂມງການ ຜະລິດລູກກົບຂາຍ ເລີ່ມແຕ່ປີ 2006 ເປັນຕົ້ນມາ ໂດຍອີງໃສ່ພື້ນຖານ ແລະ ບົດຮຽນຈາກການຮຽນຮູ້ ເຝິກອົບຮົມຈາກບ່ອນທີ່ເຮັດວຽກ ເປັນແຮງບັນດານໃຈໜຶ່ງ ແລະ ອີງໃສ່ຄວາມມັກຮັກ ແລະ ຢາກພັດທະນາຊີວິດຄອບຄົວຕົນເອງໃຫ້ດີຂຶ້ນເລື້ອຍໆ ຈຶ່ງໄດ້ຜະລິດລູກກົບເພື່ອຈໍາໜ່າຍ ເນື່ອງຈາກການຜະລິດລູກກົບໃຊ້ຕົ້ນທຶນຕໍ່າ ໃນນີ້ ເບື້ອງຕົ້ນໄດ້້ລົງທຶນ 10 ລ້ານກີບເພື່ອສ້າງອ່າງ ແລະ ຊື້ພໍ່-ແມ່ພັນ 200 ໂຕ ຜ່ານການຜະລິດລູກກົບຂາຍປີທໍາອິດສາມາດໄດ້ກໍາໄລ 15 ລ້ານກີບ ແລະ ເພີ່ມຂຶ້ນເລື້ອຍໆ ປັດຈຸບັນສ້າງລາຍຮັບໃຫ້ຄອບຄົວສູງ 30 ລ້ານກີບຕໍ່ປີ ຫຼັງຫັກຄ່າໃຊ້ຈ່າຍທັງໝົດ.

    ການຜະລິດລູກກົບ ແມ່ນໄດ້ຜະລິດແບບເຄິ່ງທໍາມະຊາດ ປີໜຶ່ງສາມາດຜະລິດໄດ້ 3 ຊຸດ ຊຸດໜຶ່ງມີພໍ່-ແມ່ພັນ 15 ຄູ່ ຈະໄດ້ລູກກົບ 15.000 ໂຕ ໂດຍລູກຄ້າຫຼັກໆແມ່ນປະຊາຊົນທົ່ວໄປ ແລະ ອ້າຍ-ນ້ອງທະຫານ ສໍາລັບລາຄາຂາຍແມ່ນ 500 ກີບຕໍ່ໂຕ ການຜະລິດລູກກົບ ເຖິງວ່າຈະຜະລິດໄດ້ຫຼາຍແຕ່ກໍຍັງບໍ່ພຽງພໍກັບຄວາມຕ້ອງການຂອງຕະຫຼາດ ຈິ່ງໄດ້ວາງແຜນຂະຫຍາຍພື້ນທີ່ລ້ຽງຕື່ມອີກ ເພື່ອສະໜອງລູກກົບໃຫ້ພຽງພໍ ພ້ອມນີ້ຍັງໄດ້ລິເລີ່ມບຸກເບີກເນື້ອທີ່ຜະລິດລູກປາອີກ 11 ໜອງ ແລະ ລ້ຽງໝູຈໍານວນໜຶ່ງ ເຊິ່ງຄາດວ່າປີຕໍ່ໄປຈະສາມາດສ້າງລາຍຮັບໃຫ້ຄອບຄົວຫຼາຍຂຶ້ນ.

ຂ່າວທີ່ກ່ຽວຂ້ອງ