ເຊີນເຂົ້າຮ່ວມງານວາງສະແດງຜະລິດຕະພັນລາວ

1.308 03 ພ.ພ. 2019 ຂ່າວໜ້າ​ໜຶ່ງ
ເຊີນເຂົ້າຮ່ວມງານວາງສະແດງຜະລິດຕະພັນລາວ

    ງານ​ວາງ­ສະ­ແດງ​ຜະ­ລິດ​ຕະ​ພັນ​ລາວ 2019 (Made in Laos 2019) ຈະ​ຈັດ​ຂຶ້ນ​ວັນ​ທີ 10-19 ພຶດ­ສະ­ພາ 2019 ຢູ່​ສູນ​ການ​ຄ້າ ລາວ-ໄອ​ເຕັກ ເພື່ອ​ປະ­ຕິ­ບັດ​ຕາມ​ນະ­ໂຍ­ບາຍ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ພັກ-ລັດ­ຖະ­ບານ ຕໍ່​ກັບ​ການ​ຊຸກ­ຍູ້-ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ​ພາຍ​ໃນ​ປະ­ເທດ ແລະ ເພື່ອ​ຊຸກ­ຍູ້​ສົ່ງ­ເສີມ​ສ້າງ​ຄວາມ​ເຂັ້ມ­ແຂງ​ໃຫ້​ຜູ້​ປະ­ກອບ​ການ ສະ­ນັ້ນ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ຈຶ່ງ​ໄດ້​ຮ່ວມ​ກັບ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຂວງ ສະ­ມາ­ຄົມ ກຸ່ມ​ທຸ­ລະ​ກິດ ແລະ ສູນ​ການ​ຄ້າ ລາວ-ໄອ​ເຕັກ ຈັດ​ງານ​ດັ່ງ­ກ່າວ​ຂຶ້ນ.

    ງານ​ຄັ້ງ​ນີ້ ຈະ​ມີ​ກາ­ນວາງ­ສະ­ແດງ​ຫຼາຍ​ຜະ­ລິດ​ຕະ​ພັນ​ທີ່​ຜະ­ລິດ ແລະ ປະ­ກອບ​ຢູ່ ສປປ ລາວ ໂດຍ​ຜູ້​ປະ­ກອບ​ການ​ທາງ​ພາຍ​ໃນ ແລະ ຕ່າງ­ປະ­ເທດ ເປັນ­ຕົ້ນ ຂະ­ແໜງ​ຫັດ­ຖະ­ກຳ ອຸດ­ສາ­ຫະ­ກຳ ອັນ­ຍະ​ມະ­ນີ ເຟີ​ນີ​ເຈີ ຕັດ­ຫຍິບ ການ​ຢາ ທ່ອງ​ທ່ຽວ ແລະ ການ​ບໍ­ລິ­ການ ລວມ​ເຖິງ​ຜະ­ລິດ​ຕະ​ພັນ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ ຫຼາຍ​ກວ່າ 250 ຫ້ອງ​ວາງ­ສະ­ແດງ ເຊິ່ງ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຂວງ ບັນ­ດາ​ກຸ່ມ ສະ­ມາ­ຄົມ​ທຸ­ລະ​ກິດ ກໍ​ຈະ​ລະ­ດົມ​ສະ­ມາ­ຊິກ​ນຳ​ເອົາ​ຜະ­ລິດ​ຕະ​ພັນ​ໂດດ​ເດັ່ນ ແລະ ເປັນ​ເອ­ກະ­ລັກ​ເຂົ້າ​ຮ່ວມ​ວາງ­ສະ­ແດງ​ຕື່ມ​ອີກ ນອກ​ນີ້ ຍັງ​ຈະ​ມີ​ສຳ​ມະ​ນາ​ກ່ຽວ​ກັບ​ການ​ແປ​ຮູບ​ສິນ­ຄ້າ​ກະ­ສິ­ກຳ ການ​ກຽມ​ຄວາມ​ພ້ອມ​ເຂົ້າ​ຮ່ວມ​ງານ​ວາງ­ສະ­ແດງ​ຢູ່​ຕ່າງ­ປະ­ເທດ ການ​ນຳ​ສະ­ເໜີ​ຂອງ​ບໍ­ລິ­ສັດ​ທີ່​ປະ­ສົບ​ຜົນ­ສຳ­ເລັດ​ການ​ເຮັດ​ທຸ­ລະ​ກິດ​ຢູ່ ສປປ ລາວ ການ​ນຳ​ສະ­ເໜີ​ກ່ຽວ​ກັບ​ຜະ­ລິດ​ຕະ​ພັນ ແລະ ການ​ບໍ­ລິ­ການ​ທີ່​ທັນ​ສະ­ໄໝ​ຂອງ​ທະ­ນາ­ຄານ​ພັດ­ທະ­ນາ​ລາວ ແລະ ເງື່ອນ­ໄຂ​ການ​ເຂົ້າ​ຫາ​ແຫຼ່ງ​ທຶນ​ຂອງ​ທະ­ນາ­ຄານ​ພັດ­ທະ­ນາ​ລາວ ປັດ­ຈຸ­ບັນ​ມີ​ບໍ­ລິ­ສັດ​ສະ­ໝັກ​ເຂົ້າ​ຮ່ວມ​ງານ 180 ຫ້ອງ ເຊິ່ງ​ແບ່ງ​ອອກ​ເປັນ​ປະ­ເພດ​ສິນ­ຄ້າ​ດັ່ງ­ນີ້: ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຂວງ 18 ຫ້ອງ ຜະ­ລິດ​ຕະ​ພັນ​ໂອ​ດ໊ອບ 35 ຫ້ອງ ຜະ­ລິດ​ຕະ​ພັນ​ຫັດ­ຖະ­ກຳ​ຜ້າ­ໄໝ-ຜ້າ​ຝ້າຍ 30 ຫ້ອງ ຜະ­ລິດ​ຕະ​ພັນ​ຫັດ­ຖະ­ກຳ​ເຄື່ອງ​ເງິນ 10 ຫ້ອງ ຜະ­ລິດ​ຕະ​ພັນ​ອາ­ຫານ 29 ຫ້ອງ ແລະ ຜະ­ລິດ​ຕະ​ພັນ​ອື່ນໆ 58 ຫ້ອງ.

    ພິ­ທີ​ຖະ­ແຫຼງ​ຂ່າວ​ຈັດ​ງານ​ວາງ­ສະ­ແດງ​ຜະ­ລິດ​ຕະ​ພັນ​ລາວ 2019 ຈັດ​ຂຶ້ນ​ວັນ​ທີ 30 ເມ­ສາ 2019 ຢູ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ໂດຍ​ມີ​ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ທ່ານ ໄຊ​ສົມ​ເພັດ ນໍ­ລະ​ສິງ ຫົວ­ໜ້າ​ກົມ​ສົ່ງ­ເສີມ​ການ​ຄ້າ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ ສີ​ບຸນ​ທຳ ສີ​ບຸນ​ມີ ອຳ­ນວຍ​ການ​ໃຫຍ່​ບໍ­ລິ­ສັດ ລາວ​ເວີນ ມະ­ຫາ­ຊົນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ