ຂ່າວຫຼ້າສຸດ

ປີ 2018 ນະຄອນຫຼວງ ປະຕິບັດ​ລາຍ​ຮັບ​ໄດ້​ລື່ນ​ແຜນການ

812 06 ພ.ພ. 2019 ຂ່າວໜ້າ​ໜຶ່ງ
ປີ 2018 ນະຄອນຫຼວງ ປະຕິບັດ​ລາຍ​ຮັບ​ໄດ້​ລື່ນ​ແຜນການ

    ພະແນກການ​ເງິນ ນະຄອນຫຼວງ​ວຽງ​ຈັນ (ນວ) ຈັດ​ກອງ​ປະຊຸມ​ສະຫຼຸບ​ການເຄື່ອນໄຫວ​ຈັດ​ຕັ້ງ​ປະຕິບັດ​ແຜນ​ງົບປະມານ ປະຈຳ​ປີ 2018 ແລະ ທິດ​ທາງ​ແຜນ​ງົບປະມານ ປະຈຳ​ປີ 2019 ຂຶ້ນ​ວັນ​ທີ 3 ພຶດສະພາ 2019 ຢູ່​ຫ້ອງ​ວ່າການ​ປົກຄອງ ນວ ໂດຍ​ເປັນ​ປະທານ​ຂອງ​ທ່ານ ຄຳ​ພັນ ມາລາ​ບັນດິດ ຫົວໜ້າ​ພະແນກການ​ເງິນ ນວ ມີ​ທ່ານ ອາດ​ສະພັງ​ທອງ ສີ​ພັນ​ດອນ ຮອງ​ເຈົ້າ​ຄອງ ນວ ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

    ທ່ານ ຄຳ​ພັນ ມາລາ​ບັນດິດ ກ່າວ​ວ່າ: ແຜນ​ລາຍ​ຮັບ-ລາຍ​ຈ່າຍ​ງົບປະມານ ຂອງ ນວ ປະຈຳ​ປີ 2018 ທີ່​ກະຊວງ​ການ​ເງິນ​ແຈ້ງ​ໃຫ້ ນວ ຈັດ​ຕັ້ງ​ປະຕິບັດ​ແມ່ນ 1.222,71 ຕື້​ກີບ ຜ່ານ​ການ​ຈັດ​ເກັບ​ຕົວ​ຈິງ ຮອດ​ວັນ​ທີ 31 ທັນວາ 2018 ປະຕິບັດ 1.284,67 ຕື້​ກີບ ເທົ່າ​ກັບ 105,07% (ລື່ນ​ແຜນການ) ໃນ​ນີ້ ສ່ວຍ​ສາ​ອາກອນ​ປະຕິບັດ​ໄດ້ 1.205,25 ຕື້​ກີບ (ແຜນການ 1.157,07 ຕື້​ກີບ) ຊັບ​ສິນ 78,48 ຕື້​ກີບ (ແຜນການ 65 ຕື້​ກີບ) ລັດ​ວິ​ສາ​ຫະ​ກິດ 876 ລ້ານ​ກີບ (ແຜນການ 633,1 ລ້ານ​ກີບ) ແລະ ລາຍ​ຮັບ​ອື່ນໆ 44,23 ລ້ານ​ກີບ ສຳລັບ​ລາຍ​ຮັບ​ພູດ​ສູນ​ກາງ (ພາສີ) ປະຕິບັດ​ໄດ້ 2.886,75 ຕື້​ກີບ ເທົ່າ​ກັບ 86,74% (ແຜນການ 3.327,96 ຕື້​ກີບ) ສ່ວນ​ລາຍ​ຈ່າຍ   ແມ່ນ 637,97 ຕື້​ກີບ ການຈັດຕັ້ງ​ປະຕິບັດ​ອະນຸມັດ​ລາຍ​ຈ່າຍ​ງົບປະມານ​ໃນ​ງວດ 4 ມີ​ການ​ດັດແກ້​ເພີ່ມ​ຂຶ້ນ 641,62 ຕື້​ກີບ ປະຕິບັດ​ໝົດ​ປີ 2018 ເທົ່າ​ກັບ 625,28 ຕື້​ກີບ ເທົ່າ​ກັບ 97,45% ຂອງ​ແຜນການ.

    ການຈັດຕັ້ງ​ປະຕິບັດ​ແຜນ​ງົບປະມານ ປະຈຳ​ປີ 2018 ເຖິງ​ວ່າ​ຈະ​ມີ​ສິ່ງ​ທ້າ​ທາຍ​ຫຼາຍ​ດ້ານ ຄະນະ​ພັກ ອົງການ​ປົກຄອງ ນວ ແລະ ຄະນະ​ພັກ-ຄະນະ​ນຳ​ພະແນກການ​ເງິນ ນວ ພ້ອມ​ກັບ​ຂະແໜງການ​ສາຍ​ຕັ້ງ​ໄດ້​ໃຫ້​ຄວາມ​ສຳຄັນ​ໃນ​ການ​ຊີ້​ນຳ-ນຳພາ​ວຽກ​ງານ​ຮອບດ້ານ ເອົາໃຈໃສ່​ຊີ້​ນຳ​ໃນ​ການຈັດຕັ້ງ​ປະຕິບັດ​ແຜນ​ງົບປະມານ​ຢ່າງ​ໃກ້ຊິດ ໂດຍ​ສະເພາະ ໄດ້​ອອກ​ຫຼາຍ​ມາດ​ຕະການ​ໃໝ່​ທີ່​ຈຳເປັນ ເພື່ອ​ຊຸກຍູ້​ການ​ເກັບ​ລາຍ​ຮັບ​ເຊັ່ນ: ປັບປຸງ​ກົນ​ໄກ​ເກັບ​ລາຍ​ຮັບ-ຄຸ້ມ​ຄອງ​ລາຍ​ຈ່າຍ​ໃຫ້​ມີ​ຄວາມ​ເຂັ້ມແຂງ​ຮັດກຸມ​ກວ່າ​ເກົ່າ ການ​ນຳ​ຂັ້ນ​ກະຊວງ ແລະ ບັນດາ​ກົມ ຂະແໜງການ​ສາຍ​ຕັ້ງ ກໍ​ໄດ້​ສຸມ​ໃສ່​ຊີ້​ນຳ​ວຽກ​ງານ​ຈັດ​ເກັບ​ລາຍ​ຮັບ​ເຂົ້າ​ງົບປະມານ​ຢ່າງ​ເປັນ​ປົກກະຕິ ຕິດຕາມ​ກວດກາ​ຜົນ​ຂອງ​ການຈັດຕັ້ງ​ປະຕິບັດ​ຂໍ້​ກຳນົດ ກົດ​ລະບຽບ ມະຕິ​ຄຳ​ສັ່ງ ກົດໝາຍ​ສ່ວຍ​ສາ​ອາກອນ ກົດໝາຍ​ງົບປະມານ ແລະ ບັນດາ​ກົດໝາຍ​ອື່ນໆ.

    ສຳລັບ​ລາຍ​ຮັບ​ປີ 2019 ກະຊວງ​ການ​ເງິນ​ແຈ້ງ​ໃຫ້ ນວ ປະຕິບັດ 4.782,47 ຕື້​ກີບ ຫຼື ທຽບ​ເທົ່າ 9,79% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ນວ ທຽບໃສ່​ປີ 2018 ເພີ່ມ​ຂຶ້ນ 5,09% ໃນ​ນີ້ ລາຍ​ຮັບ​ສູນ​ກາງ (ພາສີ) ປະຕິບັດ​ຢູ່ ນວ 3.424,80 ຕື້​ກີບ ເພີ່ມ​ຂຶ້ນ 2,9% ລາຍ​ຮັບ​ບ້ວງ​ຂອງ ນວ 1.357,67 ຕື້​ກີບ ເພີ່ມ​ຂຶ້ນ 11,03% ໃນ​ນີ້ ລາຍ​ຮັບ​ສ່ວຍ​ສາ​ອາກອນ 1.293,37 ຕື້​ກີບ ຊັບ​ສິນ​ຂອງ​ລັດ 63,67 ຕື້​ກີບ ວິ​ສາ​ຫະ​ກິດ​ລັດ​ລົງທຶນ 0,63 ຕື້​ກີບ ໃນ​ນີ້ ຂັ້ນ ນວ ຈັດ​ເກັບ 989,38 ຕື້​ກີບ ແລະ ເມືອງ​ຈັດ​ເກັບ 368,29 ຕື້​ກີບ.

 

ຂ່າວທີ່ກ່ຽວຂ້ອງ