ເບີ່ງບ້ານເຂົາເອົາບົດຮຽນ 06-05-2019

920 07 ພ.ພ. 2019 ຫົວຂໍ້ຂ່າວອື່ນໆ

     ມື້ນີ້ ຂໍ​ສະເໜີ ກ່ຽວ​ກັບ​ກົດໝາຍ​ວ່າ​ດ້ວຍ ຄ່າ​ເຊົ່າ ທີ່ ພັກ​ເຊົາ ຢູ່​ກຳປູເຈຍ ເລື່ອງ​ອີ​ຣັກ ຫ້າມ​ເຈົ້າ​ນາຍ​ທີ່​ພົວພັນ​ກັບ​ຄະດີ​ສໍ້​ລາດ​ບັງ​ຫຼວງ ເດີນທາງ​ໄປ​ຕ່າງປະເທດ ແລະ ເລື່ອງ​ການ​ສັ່ງ​ຫ້າມ​ເປີດ​ຮ້ານ​ຄ້າ​ໃນ​ວັນ​ອາທິດ ທີ່​ຮົງ​ກາ​ຣີ

    ທີ່​ກຳປູເຈຍ ເພື່ອ​ແກ້​ໄຂ​ບັນຫາ ຂາດແຄນ​ທີ່​ພັກ​ອາໄສ​ໃນ​ຍຸກ​ການ​ພັດທະນາ ເສດຖະກິດ-ສັງຄົມ ພວມ​ເບັ່ງ​ບານ ນີ້ ສະພາ​ແຫ່ງ​ຊາດ ກຳປູເຈຍ ໄດ້​ຮັບຮອງ​ເອົາ​ກົດໝາຍ ວ່າ​ດ້ວຍ​ການ​ກວດກາ​ການ​ເຊົ່າ ທີ່ຢູ່​ອາໄສ​ເມື່ອ​ປະມານ 4 ປີ​ປາຍ​ຜ່ານ​ມາ (ວຽງ​ຈັນ​ທາມ 7 ກໍລະກົດ  2015 )ຈຸດປະສົງ​ຂອງ​ກົດໝາຍ ສະບັບ​ນີ້ ແມ່ນ​ເພື່ອ​ປົກ​ປ້ອງ ເຫຼົ່າ​ກຳມະກອນ ແລະ ນັກ​ສຶກ​ສາ ຈາກ​ຄ່າ​ເຊົ່າ​ທີ່ຢູ່​ອາໄສ ທີ່​ນັບ​ມື້​ສູງ​ຂຶ້ນ ແຮງ​ງານ​ທີ່​ໄດ້​ຮັບ​ຜົນ​ປະໂຫຍດ​ໂດຍ​ກົງ​ຈາກ​ກົດໝາຍ​ນີ້ ແມ່ນ​ກຳມະກອນ​ຂະແໜງ​ອຸດສາຫະກຳ​ຕັດຫຍິບ ທີ່​ມີ​ຈຳນວນ​ພົນ​ຫຼາຍ​ກວ່າ​ໃນ​ຂະແໜງການ​ອື່ນໆ ທ່ານ ເປັນ ປັນຍາ ປະທານ​ກຳມາ​ທິ​ການ ກົດໝາຍ ແລະ ຍຸຕິ​ທຳ ໃນ​ສະພາ​ແຫ່ງ​ຊາດ ກຳປູເຈຍ ຊຸດ​ກ່ອນ ມີ​ຄຳ​ເຫັນ​ວ່າ ກົດໝາຍ​ກວດກາ ຄ່າ​ເຊົ່າ​ທີ່ຢູ່​ອາໄສ ແມ່ນ​ພື້ນຖານ​ດ້ານ​ນິຕິ​ກຳ ເພື່ອ​ຜັນ​ຂະຫຍາຍ​ນະໂຍບາຍ​ແຫ່ງ​ຊາດ ກ່ຽວ​ກັບ​ທີ່ຢູ່​ອາໄສ ປະກອບສ່ວນ​ດຶງ​ດູດ ການ​ລົງທຶນ ພາກ​ເອກະ​ຊົນ ເຂົ້າ​ໃສ່​ການ​ປຸກ​ສ້າງ​ເຮືອນ​ເຊົ່າ​ໃນ​ລາຄາ​ອັນ​ເໝາະ​ສົມ ຕາມ​ສະຖິຕິ​ເມື່ອ 4 ປີຜ່ານມາ ອຸດສາຫະກຳ​ຕັດຫຍິບ​ເຄື່ອງນຸ່ງ ແລະ ເກີບ ແມ່ນ​ຂະແໜງ​ອຸດສາຫະກຳ​ທີ່​ສ້າງ​ລາຍ​ຮັບ ເປັນ​ເງິນຕາ​ຕ່າງປະເທດ ໃຫຍ່​ທີ່​ສຸດ​ຂອງ​ກຳປູເຈຍ ອຸດສາຫະກຳ​ຂະແໜງ​ນີ້ ມີ​ກຳມະກອນ​ຫຼາຍ​ກ່ວ​​າ 7 ແສນ​ຄົນ ທີ່​ເຮັດ​ວຽກ​ໃນ​ໂຮງງານ ກວ່າ 1.000 ແຫ່ງ ໃນ​ປີ 2014 ມູນ​ຄ່າ​ການ​ສົ່ງ​ອອກ ຂອງ​ອຸດສາຫະກຳ ຂະ ແໜງ​ນີ້​ແມ່ນ 6,2 ຕື້​ໂດ​ລາ​ສະຫະລັດ ເທົ່າ​ກັບ 80,5% ຂອງ​ມູນ​ຄ່າ​ການ​ສົ່ງ​ອອກ​ທັງ​ໝົດ​ຂອງ​ປະເທດ.

    ທີ່​ອີ​ຣັກ ມາດ​ຕະການ ເດັດ​ເດັດ​ໜຶ່ງ​ທີ່​ທາງ​ການ​ປະເທດ​ອີ​ຣັກ ນຳ​ໃຊ້​ເພື່ອ​ຕ້ານ​ການ​ສໍ້​ລາດ​ບັງ​ຫຼວງ ກໍ​ຄື​ການ​ສັ່ງ​ຫ້າມ ເຈົ້າ​ໜ້າທີ່ ທີ່​ຕິດ​ຄະດີ​ນີ້​ເດີນທາງ​ອອກ​ໄປ​ຕ່າງປະເທດ ດັ່ງ​ທີ່​ມີ​ຂ່າວ ເມື່ອ​ຕົ້ນ​ເດືອນ​ສິງຫາ ປີ 2016 ວ່າ ທ່ານ ຮາຍ​ເດີ ອານ ອາ​ບາ​ດີ ນາຍົກລັດຖະມົນຕີ​ອີ​ຣັກ ໄດ້​ອອກ​ຄຳ​ສັ່ງ “ຫ້າມ​ເດີນທາງ​ໄປ​ຕ່າງປະເທດ​ຊົ່ວຄາວ” ສຳລັບ​ເຈົ້າ​ໜ້າທີ່​ທຸກໆ​ຄົນ​ທີ່​ຖືກ​ກ່າວ​ຫາ​ວ່າ ມີ​ບັນຫາ​ສໍ້​ລາດ​ບັງ​ຫຼວງ ສາເຫດ​ທີ່​ນຳໄປ​ສູ່​ການ​ສັ່ງ​ຫ້າມ​ດັ່ງກ່າວ ຕິດ​ພັນ​ກັບ​ຄະດີ ສໍ້​ລາດ​ບັງ​ຫຼວງ ໃນ​ກະຊວງ​ປ້ອງ​ກັນ​ປະເທດ​ອີ​ຣັກ ເຊິ່ງ​ເຮັດ​ໃຫ້​ເງິນ​ຫຼາຍ​ຕື້​ໂດ​ລາ​ສະຫະລັດ ສູນ​ເສຍ​ໄປ​ຢ່າງ​ໄຮ້​ປະໂຫຍດ ທ່ານ ຄາ​ລິດ ອານ ໂອ​ເບ​ດີ ລັດຖະມົນຕີ​ກະຊວງ​ດັ່ງກ່າວ ໄດ້​ກ່າວ​ຫາ​ນັກ​ການເມືອງ​ຈຳນວນ​ໜຶ່ງ​ວ່າ ມີ​ສ່ວນ​ພົວພັນ​ກັບ​ຄະດີ​ສໍ້​ລາດ​ບັງ​ຫຼວງ ທີ່​ກອບໂກຍ​ງົບປະມານ​ສຳລັບ​ການ​ປ້ອງ​ກັນ​ປະເທດ.

    ທີ່​ຮົງ​ກາ​ຣີ ມີ​ເລື່ອງ​ທວນ​ກະແສ ເກີດ​ຂຶ້ນ​ຢູ່​ປະເທດ​ຮົງ​ກາ​ຣີ ເມື່ອ​ກວ່າ 4 ປີຜ່ານມາ ນັ້ນ ກໍ​ຄື ເລື່ອງ ສະພາ​ແຫ່ງ​ຊາດ​ຂອງ​ປະເທດ​ນີ້ ໄດ້​ຮັບຮອງ​ເອົາ​ກົດໝາຍ ຫ້າມ​ຮ້ານ​ຄ້າ​ສ່ວນ​ໃຫຍ່ ເປີດ​ຂາຍເຄື່ອງ​ໃນ​ວັນ​ອາທິດ ເພາະ​ຖື​ເປັນ​ເລື່ອງ​ບັງຄັບ ຄົນ​ໃຫ້​ເຮັດ​ວຽກ​ແທນ​ທີ່​ຈະ​ໄດ້​ພັກຜ່ອນ​ໃນ​ວັນ​ພັກ​ດັ່ງກ່າວ ທີ່​ວ່າ​ເປັນ​ເລື່ອງ​ທວນ​ກະແສ​ນັ້ນ ກໍ​ເພາະວ່າ ສາວ​ຮົງ​ເກົາ​ຣີ 1 ໃນ 5 (1/5) ອອກ​ໄປ​ຈັບ​ຈ່າຍ​ຊື້​ເຄື່ອງ​ຂອງ​ໃນ​ວັນ​ອາທິດ ແນວ​ຄິດ​ຫ້າມ​ເປີດ​ຮ້ານ​ຄ້າ​ໃນ​ວັນ​ອາທິດ​ນີ້ ແມ່ນ​ພັກ​ຄຣິດ​ສະ​ຕຽນ ປະຊາທິປະໄຕ ປະຊາຊົນ ເປັນ​ເຈົ້າ​ການ​ສະເໜີ ແຕ່ຖືກ​ພັກ fidesz ຂອງ​ທ່ານ​ນາຍົກ ວິກ​ຕໍ ອໍ ບັນ ປະຕິເສດ ແລະ ຕໍ່​ມາ ຢູ່​ບໍ່​ຢູ່​ກໍ​ເຫັນ​ດີ​ກັບ​ການ​ສັ່ງ​ຫ້າມ​ດັ່ງກ່າວ ວ່າ​ກັນ​ວ່າ ຄຳ​ສັ່ງ​ຫ້າມ ເປີດ​ຮ້ານ​ຄ້າ​ໃນ​ວັນ​ອາທິດ​ນີ້​ໄດ້​ປະ​ເຊີນ​ກັບ​ແຮງ​ຕ້ານ​ຄືນ ຈາກ​ສະຫະພາບ​ແຮງ​ງານ ກຸ່ມ​ທຸລະ​ກິດ ສະມາຄົມ​ນາຍ​ຈ້າງ ແລະ ນັກ​ລົງທຶນ​ແຫ່ງ​ຊາດ ທີ່​ອ້າງ​ວ່າ ຄຳ​ສັ່ງ​ຫ້າມ​ຄວນ​ຈະ​ຜ່ານ​ການ​ລົງ​ປະຊາ​ມະຕິ​ທົ່ວ​ປະເທດ ແທນ​ທີ່​ການ​ອະນຸມັດ​ຜິດ ໂດຍ​ສະເພາະ ສ່ວນ​ຜູ້​ປະກອບ​ການ​ຮ້ານ​ສັບພະ​ສິນຄ້າ​ນັ້ນ ຕ່າງ​ກໍ​ອອກ​ມາ ສະແດງ​ທັດສະນະ​ວ່າ ຄຳ​ສັ່ງ​ຫ້າມ​ນີ້ ຈະ​ເຮັດ​ໃຫ້​ມີ​ຄົນ​ວ່າງ​ງານ​ສູງ​ເຖິງ 20 ພັນ​ຄົນ.

ຂ່າວທີ່ກ່ຽວຂ້ອງ