ເບີ່ງບ້ານເຂົາເອົາບົດຮຽນ 09-05-2019

937 09 ພ.ພ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະຈຳ​ວັນ​ນີ້ ມີ​ເລື່ອງ​ທາງ​ການ​ອິນ​ເດຍ ຕ້ອງການ​ຫຼຸດ​ຈຳນວນ​ນັກ​ທ່ອງ​ທ່ຽວ​ທີ່​ເຂົ້າ​ຊົມ ທັດ​ສະ​ມາ​ຮານ ແລະ ປິດ​ທ້າຍ​ກັບ​ນະໂຍບາຍ ສ ເກົາຫຼີ ເພື່ອ​ສົ່ງເສີມ​ໃຫ້​ຄູ່​ຜົວ ເມຍ ມີ​ລູກ​ຫຼາຍ​ຄົນ

    ທີ່ ອິນ​ເດຍ ຂ່າວ​ນີ້​ອ່າວ​ແປກ​ເພາະ​ມັນ​ຍ່າງ​ສວນ​ກະແສ​ການ​ດຶງ​ດູດ​ນັກ​ທ່ອງ​ທ່ຽວ ເລື່ອງ​ມີ​ຢູ່​ວ່າ ທາງ​ການ​ອິນ​ເດຍ​ໄດ້​ປະກາດ​ເພີມ​ຄ່າ​ເຂົ້າ​ຢ້ຽມ​ຊົມ ອະນຸສອນ​ສະຖານ​ແຫ່ງ​ຄວາມ​ຮັກ ຊື່ວ່າ ທັດ​ສະ​ມາ​ຮານ ທີ່​ເມືອງ​ອັກ​ກຣາ ອະນຸສອນ​ນີ້​ເປັນ​ໜຶ່ງ​ໃນ​ສິ່ງ​ມະຫັດສະຈັນ​ຂອງ​ໂລກ ແລະ ໄດ້​ຖານະ​ເປັນ​ມໍລະດົກ​ໂລກ ເຫດຜົນ​ທີ່​ໄດ້​ປັບ​ຂຶ້ນ​ຄ່າ​ເຂົ້າ​ຊົມ ສະຖານທີ່​ທ່ອງ​ທ່ຽວ​ລື​ຊື່​ລະດັບ​ໂລກ​ແຫ່ງ​ນີ້ ກໍ​ເພື່ອ​ຫຼຸດຜ່ອນ​ຈຳນວນ​ຜູ້​ເຂົາ​ຊົມ​ລົງ ໃຫ້​ໄດ້​ປະມານ 15-20 % ການ​ປັບ​ຂຶ້ນ​ຄ່າ​ເຂົ້າ​ຊົມ​ທັດ​ສະ​ມາ​ຮານ ນັ້ນ​ສູງ​ເຖິງ​ວ່າ 5 ເທົ່າ ຄື​ຈາກ 50 ຮູ​ປີ ເປັນ250ຮູ​ປີ ປະມານ 5 ໂດ​ລາ​ສະຫະລັດ​ຕໍ່​ຄົນ ອັນ​ນີ້​ແມ່ນ​ສຳລັບ​ຄົນ​ອິນ​ເດຍ​ເອງ ສ່ວນ​ສຳລັບ​ນັກ​ທ່ອງ​ທ່ຽວ​ຕ່າງປະເທດ ນັ້ນ​ໄດ້​ເກັບ​ເພີ້ມ​ຂຶ້ນ​ຈາກ 16 ໂດ​ລາ ເປັນ 19 ໂດ​ລາ /ຄົນ ສະຖິຕິ​ປີ2016 ຊີ້​ໃຫ້​ເຫັນ​ວ່າ​ໝົດ​ປີ​ມີ​ນັກ​ທ່ອງ​ທ່ຽວ​ເຂົາ​ຊົມ​ທັດ​ສະ​ມາ​ຮານ ສູງ​ເຖິງ 6,5 ລ້ານ​ຄົນ​ໃນ​ແຕ່​ລະ​ວັນ ຈຳນວນ​ຄົນ​ອິນ​ເດຍ​ທີ່​ເຂົ້າ​ຊົມ​ສະຖານທີ່​ແຫ່ງ​ນີ້​ນັ້ນ​ມີ​ຈຳນວນ 1-1,5 ໝື່ນ​ຄົນ ແຕ່​ສຳລັບ​ວັນ​ພັກ​ຈະ​ເພີ່ມ​ຂຶ້ນ​ເປັນ 7 ໝື່ນ​ຄົນ ຕໍ່​ວັນ ທາງ​ການ​ອິນ​ເດຍ​ຢ້ານ​ວ່າການ​ມີ​ຜູ້​ເຂົ້າ​ຊົມ​ຢ່າງ​ຫຼວງຫຼາຍ​ຈະ​ສົ່ງ​ຜົນ​ກະທົບ​ຕໍ່​ສິ່ງແວດລ້ອມ​ອ້ອມ​ຂ້າງ​ຂອງ​ອະນຸສອນ​ສະຖານ ເຊິ່ງ​ອາດ​ຈະ​ສົ່ງ​ຜົນ​ເສຍ​ຕໍ່​ທັດ​ສະ​ມະ​ຮານ​ເອງ.

    ທີ່ ສ ເກົາຫຼີ ບັນຫາ​ຈຳນວນ​ຜູ້​ເຖົ້າ​ລົ້ນ​ເມືອງ​ແຕ່​ຈຳນວນ​ເດັກ​ເກີດ​ໃໝ່​ຜັດ​ນັບ​ມື້​ຫຼຸດ​ລົງ ໄດ້​ບັງຄັບ​ໃຫ້​ທາງ​ການ ສ ເກົາຫຼີ ຕ້ອງ​ເອົາ​ມາດ​ຕະການ​ແກ້​ໄຂ​ບັນຫາ​ນີ້​ຢ່າງ​ຮີບ​ດ່ວນ ອິງ​ຕາມ​ຈັງຫວະ​ການ​ຂະຫຍາຍ​ທາງ​ດ້ານ​ເສດຖະກິດ-ສັງຄົມ ຂອງ​ປະເທດ ສ ເກົາຫຼີ ຕ້ອງການ​ຄວາມ​ໝັ້ນຄົງ​ດ້ານ​ຊັບພະຍາກອນ​ມະນຸດ ໃນ​ຈຳນວນ​ລະຫວ່າງ 51 ລ້ານ​ຄົນ ເພື່ອ​ບັນລຸ​ເປົ້າໝາຍ​ນີ້​ແມ່ຍິງ ສ ເກົາຫຼີ ໃນ​ໄວ​ຈະເລີນ​ພັນ ຕ້ອງ​ສາມາດ​ມີ​ລູກ​ໄດ້​ໃນ​ອັດຕາ 2,1/ຄົນ ສະຖິຕິ​ປີ 2008 ຊີ້​ບອກ​ວ່າ​ຈຳນວນ​ລູກ​ທີ່​ແມ່ຍິງ​ເກົາຫຼີ​ຄົນ​ໜຶ່ງ​ສາມາດ​ມີ​ໄດ້​ໃນ​ຊົ່ວ​ຊີວິດ​ນັ້ນ​ຢູ່​ໃນ​ອັດຕາ 1,19 ແລະ ໄດ້​ຫຼຸດ​ລົງ​ມາ​ເປັນ 1,05 ໃນ​ປີ 2017 ຄາດ​ວ່າ​ຖ້າ​ບໍ່​ມີ​ມາດ​ຕະການ​ແກ້​ໄຂ​ອັດຕາ​ຕົວ​ເລກ​ອາດ​ຫຼຸດ​ລົງ​ເປັນ 1,0 ໃນຕໍ່ໜ້າ ( ວຽງ​ຈັນ​ທາມ) 27 ທັນວາ 2018 ຍ້ອນ​ແນວ​ນີ້​ທາງ​ການ ສ ເກົາຫຼີ ຈຶ່ງ​ໄດ້​ກຳນົດ​ແຜນ​ສົ່ງເສີມ​ໃຫ້​ຄູ່​ຜົວ​ເມຍ​ຊາວ​ເກົາຫຼີ ມີ​ລູກ​ຫຼາຍ​ຂຶ້ນ​ດ້ວຍ​ນະໂຍບາຍ​ຈ່າຍ​ເງິນ​ຄ່າ​ພັກ ເພື່ອ​ເບິ່ງແຍງ​ລູກ​ເພີ້ມ​ຂຶ້ນ​ຈາກ 2 ລ້ານ​ວອນ​ເປັນ 2,5 ລ້ານ​ວອນ (ປະມານ 2.200 ໂດ​ລາ​ສະຫະລັດ) ຕໍ່​ຄົນ ເປັນ​ເວລາ 3ເດືອນ ນອກຈາກ​ນັ້ນ​ທາງ​ການ ສ ເກົາຫຼີ  ຍັງ​ຊຸກຍູ້​ໃຫ້​ຜູ້​ຊາຍ(ຜົວ)ລາ​ພັກ​ເພື່ອ​ຊ່ວຍ​ເມຍ ແມ່ລູກອ່ອນ ເບິງ​ແຍງ​ລູກ​ອີກ​ດ້ວຍ ໃນ​ປີ 2008 ບັນດາ​ຜົວ​ທີ່​ລາ​ພັກ​ເພື່ອ​ຊ່ວຍ​ເມຍ​ລ້ຽງ​ດູ​ລູກ​ອ່ອນ​ນັ້ນ ມີ​ພຽງ 355 ຄົນ ແຕ່​ໄດ້​ເພິ່ມ​ຂຶ້ນ​ເປັນ 12,043 ຄົນ ໃນ​ປີ 2017 ສຳລັບ​ແມ່ຍິງ​ທີ່​ລາ​ພັກ​ເພື່ອ​ເບິ່ງແຍງ​ລູກ​ນັ້ນ​ມີ​ສູງ​ເຖິງ 78.080 ຄົນ ໃນ​ປີ 2017 ທຽບ​ກັບ​ຈຳນວນ 28.790 ຄົນ​ໃນ​ປີ 2008 ເພື່ອ​ສືບຕໍ່ ຊວ່ຍ​ເຫຼືອ​ຜູ້​ເປັນ​ພໍ່-ແມ່​ໃນ​ການ​ເບິ່ງແຍງ​ລູກ​ນອ້ຍ​ລັດຖະບານ ສ ເກົາຫຼີ ມີ​ແຜ່ນ​ສະໜອງ​ຜົນ​ປະໂຫຍດ  (ເງິນ​ສະໜັບສະໜູນ) ໃຫ້​ພວກ​ເຂົາເຈົ້າ​ເປັນ​ແຕ່​ລະ​ເດື່ອນ​ຊຶ່ງ​ກວມ​ເອົາ​ທັງ​ໝົດ 84 ເດືອນ ແຜນການ​ນີ້​ຈະ​ເລີ່ມ​ປະຕິບັດ​ນັບ​ແຕ່​ເດຶອນ​ກັນຍາ​ປີ 2019 ເປັນຕົ້ນ​ໄປ.

ຂ່າວທີ່ກ່ຽວຂ້ອງ