ຂ່າວຫຼ້າສຸດ

ມຸງຄຸນຕື່ນຂ່າວ

2.281 10 ພ.ພ. 2019 ນານາສາລະ

    ຄຳ​ເວົ້າ​ຂ້າງ​ເທິງ​ນັ້ນ ຖ້າ­ວ່າ​ຜູ້​ໃດ​ແກ່​ວັດ​ແດ່ ກໍ​ຈະ​ເຂົ້າ­ໃຈ​ທັນ­ທີ​ວ່າ ຜູ້​ຂຽນ​ຢາກ​ເວົ້າ​ເຖິງ​ກະ­ແສ​ຄວາມ​ເຊື່ອ​ທີ່​ເກີດ​ຂຶ້ນ​ຢ່າງ​ຫຼວງ­ຫຼາຍ​ໃນ​ສັງ­ຄົມ​ບ້ານ​ເຮົາ ເຊິ່ງ​ອາດ​ສ້າງ​ຄວາມ​ສັບ­ສົນ​ເກີດ​ຂຶ້ນ​ໃນ​ສັງ­ຄົມ​ພໍ​ສົມ­ຄວນ ບວກ​ໃສ່​ກັບ​ການ​ໂຄ­ສະ­ນາ​ຂອງ​ສື່​ອອນ​ລາຍ ອິດ­ສະ­ຫຼະ ເຊັ່ນ: ເຈົ້າ​ຂອງ​ເພດ (page) ທີ່​ຢາກ​ມີ​ຊື່​ສຽງ​ໂດ່ງ​ດັງ ຈຶ່ງ​ກອບ​ປີ້​ເອົາ​ຮູບ​ນັ້ນ ຂ່າວ​ນີ້​ມາ​ລົງ​ໃນ​ໜ້າ​ເພດ​ຂອງ​ຕົນ ທັງໆ​ທີ່​ເຈົ້າ​ຂອງ​ສື່​ກໍ​ປາ­ກົດ​ມີ​ໃຫ້​ເຫັນ​ວ່າ ຂຽນ​ພາ­ສາ​ລາວ​ຍັງ​ບໍ່​ຖືກ.

    ເວົ້າ​ເລື່ອງ​ຄວາມ​ເຊື່ອ​ນີ້ ພະ­ພຸດ­ທະ­ເຈົ້າ​ເນັ້ນ​ໃຫ້​ພວກ​ເຮົາ​ເຊື່ອ​ຢ່າງ​ມີ​ເຫດ­ຜົນ ປະ­ກອບ​ດ້ວຍ​ປັນ­ຍາ ພິ­ຈາ­ລະ­ນາ​ວ່າ ມີ​ມູນ​ຄວາມ​ຈິງ​ຫຼາຍ​ໜ້ອຍ​ພຽງ​ໃດ ເຊິ່ງ​ເພິ່ນ​ສອນ​ເລື່ອງ​ຄວາມ​ເຊື່ອ​ນີ້​ໃຫ້​ແກ່​ປະ­ຊາ­ຊົນ​ເຜົ່າ ກາ​ລາ​ມະ ຢູ່ ອິນ​ເດຍ ມີ​ຫຼັກ​ແຍກ​ແຍະ​ຄວາມ​ເຊື່ອ​ໄວ້ 10 ປະ­ການ ຄື: (1) ຢ່າ​ຟ້າວ​ເຊື່ອ​ພຽງ​ແຕ່​ໄດ້​ຟັງ​ຕາມ​ກັນ​ມາ (2) ຢ່າ​ຟ້າວ​ເຊື່ອ​ພຽງ​ແຕ່​ຖື​ປະ­ຕິ­ບັດ​ສືບ​ກັນ​ມາ (3) ຢ່າ​ຟ້າວ​ເຊື່ອ​ພຽງ​ຂ່າວ​ລື (4) ຢ່າ​ຟ້າວ​ເຊື່ອ​ເພາະ​ພຽງ​ແຕ່​ການ​ອ້າງ​ຕຳ­ລາ​ຄຳ​ພີ (5) ຢ່າ​ປົງ­ໃຈ​ເຊື່ອ​ພຽງ​ເພາະ­ວ່າ​ມີ​ເຫດ­ຜົນ (6) ຢ່າ​ເຊື່ອ​ເພາະ​ອະ­ນຸ­ມານ (7) ຢ່າ​ຟ້າວ​ເຊື່ອ​ພຽງ​ເພາະ­ວ່າ ພິ­ຈາ­ລະ­ນາ​ມີ​ເຫດ­ຜົນ (8) ຢ່າ​ຟ້າວ​ເຊື່ອ​ພຽງ​ເພາະ­ວ່າ​ມັນ​ເຂົ້າ​ກັບ​ທິດ​ສະ​ດີ (9) ຢ່າ​ເຊື່ອ​ພຽງ​ເພາະ​ເບິ່ງ​ຕາມ​ລັກ­ສະ­ນະ​ເປັນ​ໄປ​ໄດ້ (10) ຢ່າ​ຟ້າວ​ເຊື່ອ​ພຽງ​ເພາະ­ວ່າ ເພື່ອ​ເປັນ​ສະ­ມະ­ນະ ຫຼື ຄູ​ຂອງ​ເຮົາ.

    ຫຼັກ​ຄວາມ​ເຊື່ອ 10 ປະ­ການ​ນີ້ ສັງ­ຄົມ​ບ້ານ​ເຮົາ​ຄວນ​ນຳ​ມາ​ປຽບ­ທຽບ ໂດຍ​ສະ­ເພາະ ຂ່າວ​ລື ຫຼື ຂ່າວ​ອອນ​ລາຍ ທີ່​ເກີດ​ຂຶ້ນ​ປະ­ຈຳ​ວັນ ເພາະ​ອາດ​ຊັກ​ພາ­ໃຫ້​ຜູ້​ຫູ​ເບົາ​ໃຈ­ງ່າຍ​ຫຼົງ​ເຊື່ອ​ງ່າຍ ຕົກ​ຢູ່​ໃນ​ກົນ​ຫຼອກ​ລວງ​ຂອງ​ພວກ​ສັດ­ຕູ​ບໍ່​ຫວັງ​ດີ​ຕໍ່​ຊາດ ໂດຍ​ສະ­ເພາະ ຕໍ່​ເລ່­ຫຼ່ຽມ​ຂອງ​ສັດ­ຕູ​ທີ່​ຢາກ​ຫັນ­ປ່ຽນ​ໂດຍ​ສັນ­ຕິ ດັ່ງ­ນັ້ນ ທຸກ​ຄົນ​ໃນ​ສັງ­ຄົມ ຈຶ່ງ​ຕ້ອງ​ມີ​ສະ­ຕິ​ຕື່ນ​ໂຕ​ສະ­ຫຼາດ​ແຍກ​ແຍະ​ຄິດ​ຫາ​ເຫດ­ຜົນ​ຖີ່​ຖ້ວນ ຜູ້​ຂຽນ​ຂໍ​ຍົກ​ຕົວ­ຢ່າງ​ຕື່ມ ເຊັ່ນ: ການ​ຫຼິ້ນ​ເຟ​ສ​ບຸກ ບາງ​ຄົນ​ຫູ​ເບົາ​ໃຈ­ງ່າຍ ແລະ ເຊື່ອ​ງ່າຍ​ດ້ວຍ​ການ​ໄປ​ກົດ​ແຊ​ຮູບ​ພາບ​ແປກ​ປະ­ຫຼາດ ຄິດ​ວ່າ​ເປັນ​ມຸງ­ຄຸນ​ຄວາມ​ດີ ຂໍ​ວິ້ງ​ວອນ​ໃຫ້​ໝູ່­ຄູ່​ແຊ​ກັນ​ຕໍ່​ໄປ ບອກ​ວ່າ​ຈະ​ພົບ​ໂຊກ​ລາບ​ລ້ຳ​ລວຍ ? ຖ້າ­ວ່າ​ພຽງ​ແຕ່​ກົດ​ແຊ​ແລ້ວ ມີ​ໂຊກ​ລາບ ຄົນ​ທັງ​ໝົດ​ໃນ​ສັງ­ຄົມ​ຄົງ​ບໍ່​ຕ້ອງ​ຫາ​ວຽກ​ເຮັດ ?.

    ຄວາມ​ເຊື່ອ​ຕ້ອງ​ໄປ​ຄຽງ​ຄູ່​ກັບ​ປັນ­ຍາ​ໃຫ້​ສົມ​ເຫດ­ຜົນ ເພາະ​ໃນ​ໂລກ​ນີ້​ບໍ່​ມີ​ຄວາມ​ສຳ­ເລັດ​ໃດ​ທີ່​ສົມ​ຫວັງ​ໂດຍ​ບໍ່​ລົງ­ມື​ປະ­ຕິ­ບັດ ຖ້າ​ຜູ້​ໃດ​ໄປ​ເຊື່ອ​ໃນ​ພວກ​ຖື​ຄະ­ຕິ​ຝັນ​ເອົາ ໂດຍ​ບໍ່​ລົງ­ມື​ເຮັດ ຊີ­ວິດ​ກໍ​ຈະ​ພົບ​ແຕ່​ຄວາມ­ທຸກ​ຈົນ ເປັນ​ເຫດ​ໃຫ້​ບໍ່​ຢາກ​ປະ­ກອບ​ອາ­ຊີບ ພຽງ​ແຕ່​ຄິດ​ຫາ​ລັກ​ເອົາ​ຊັບ​ຂອງ​ຜູ້​ອື່ນ.

ຂ່າວທີ່ກ່ຽວຂ້ອງ