ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 14-05-2019

950 14 ພ.ພ. 2019 ຫົວຂໍ້ຂ່າວອື່ນໆ

ມື້ນີ້​ຂໍ​ຊວນ​ທ່ານ​ຜູ້​ອ່ານ​ໄປ​ຮູ້​ກັບ​ການ​ອະນຸ​ຮັກ​ພັນ​ສັດ-ພັນ​ພືດ ຢູ່​ອິນ​ໂດ​ເນ​ເຊຍ ແລະ ນະໂຍບາຍ “ດິນ​ກະສິກຳ ແລະ ກັບ​ການ​ມີ​ລູກ​ຜູ້​ທີ 3 ” ຢູ່ ອີ​ຕາ​ລີ.

     ທີ່ ອິນ​ໂດ​ເນ​ເຊຍ:  ມີ​ຂ່າວ​ຈາກ​ອິນ​ໂດ​ເນ​ເຊຍ​ໃນ​ໄຕ​ມາດ​ທີ 3 ປີ 2018 ວ່າ​ທາງ​ການ​ຂອງ​ປະເທດ​ໄດ້​ເຄັ່ງ​ມາດ​ຕະການ​ອະນຸ​ຮັກ​ຄວາມ​ຫຼາກ​ຫຼາຍ​ດ້ານ​ຊີວະ​ນາໆພັນ ໂດຍ​ໄດ້​ເພີ່ມ​ຈຳນວນ​ສັດ ແລະ ພັນ​ພືດ ເຂົ້າ​ໃນ​ບັນຊີ​ອະນຸ​ຮັກ ຂຶ້ນ​ຫຼາຍ​ທົບ​ເທົ່າ ຄື​ຈາກ 294 ຊະນິດ​ໃນ​ປີ 1999 ມາ​ເປັນ 921 ຊະນິດ ໃນ​ປີ 2018  ບັນຊີ​ອະນຸ​ຮັກ​ສະບັບ​ປັບປຸງ​ໃໝ່​ນີ້​ໄດ້​ຖືກ​ຮັບຮອງ​ເອົາ ໃນ​ເດືອນ​ກໍລະກົດ ປີ 2018 ພາຍຫຼັງ​ໄດ້​ປະຕິບັດ​ຕາມ​ບັນຊີ​ເກົ່າ​ມາ​ເປັນ​ເວລາ 19 ປີ ບັນຊີ​ອະນຸ​ຮັກ​ພັນ​ສັດ​ແລະ ພັນ​ພືດ​ສະບັບ​ໃໝ່​ນີ້​ໄດ້​ບັນຈຸ​ເພີ່ມ​ປະເພດ​ນົກ​ທີ່​ມີ​ຮູບ​ຮ່າງ​ຈົບງາມ ແລະ ມີ​ສຽງ​ຮ້ອງ​ສຽງ​ຂັນ​ມ່ວນ​ສະອອນ​ໃຈ ແຕ່​ພ້ອມ​ດຽວ​ກັນ ກໍ​ໄດ້​ຄັດ​ອອກ​ຈາກ​ບັນຊີ​ປະເພດ​ສັດ ແລະ ພັນ​ພືດ ທີ່​ບໍ່​ມີ​ທ່າ​ອຽງ​ສູນພັນ ເວົ້າ​ໂດຍ​ສະຫຼຸບ​ແລ້ວ ບັນຊີ​ອະນຸ​ຮັກ​ພັນ​ສັດ ແລະ ພັນ​ພືດ ຂອງ​ອີນ​ໂດ​ເນ​ເຊຍ​ນັ້ນ ມີ​ການ​ປັບປຸງ​ຢ່າງ​ຕໍ່​ເນື່ອງ ປະເພດ​ສັດ ແລະ ພັນ​ພືດ​ທີ່​ຫວິດ​ຄວາມ​ສ່ຽງ​ຈະ​ສູນພັນ ກໍ​ຈະ​ຖືກ​ຄັດ​ອອກ​ຈາກ​ບັນຊີ ສ່ວນ​ຈຳພວກ​ທີ່​ມີ​ທ່າ​ອ່ຽງ​ຈະ​ສູນພັນ ກໍ​ຈະ​ຖືກ​ຈັດ​ເຂົ້າ​ບັນຊີ​ອະນຸ​ຮັກ ພັນ​ສັດ ແລະ ພັນ​ພືດ​ທີ່​ຈົດ​ເຂົ້າ​ບັນຊີ​ອະນຸ​ຮັກ​ນັ້ນ​ຕ້ອງ​ມີ​ເງື່ອນໄຂ​ດັ່ງ​ລຸ່ມ​ນີ້ ຄື: ຕ້ອງ​ແມ່ນ​ພັນ​ທີ່​ເປັນ​ເອກະລັກ​ສະເພາະ​ຂອງ​ແຕ່​ລະ​ເຂດ​ແຄວ້ນ ທ້ອງຖິ່ນ​ຂອງ​ປະເທດ ເປັນ​ຊະນິດ​ທີ່​ມີ​ຈຳນວນ​ໜ້ອຍ ຫຼື ມີ​ທ່າ​ອ່ຽງ​ຫຼຸດ​ລົງ ທ່ານ​ນາງ ອິນ​ດຼາ ສະ​ປະ​ລອຍ​ຕາ​ເຊຍ ຫົວໜ້າ​ກົມ​ອະນຸ​ຮັກ​ຊີວະ​ນາໆພັນ ກະຊວງ​ສິ່ງແວດລ້ອມ ແລະ ປ່າໄມ້ ອິນ​ໂດ​ເນ​ເຊຍ  ໄດ້​ໃຫ້​ຮູ້​ກ່ຽວ​ກັບ​ບັນຫາ​ອະນຸ​ຮັກ​ວ່າ ບັນຊີ​ອະນຸ​ຮັກ​ພັນ​ສັດ​ແລະ ພັນ​ພືດ​ນີ້ ສາມາດ​ປ່ຽນແປງ​ໄດ້​ເລື້ອຍໆ ຕາມ​ຈຳນວນ​ເພີ່ມ​ຂຶ້ນ ຫຼື ຫຼຸດ​ລົງ​ຂອງ​ພັນ​ສັດ  ແລະ ພັນ​ພືດ​ແຕ່​ລະ​ຊະນິດ.

    ທີ່ ອີ​ຕາ​ລີ: ໃນ​ປີ 2018 ມີ​ຂ່າວ​ມາ​ວ່າ ທາງ​ການ​ອີ​ຕາ​ລີ ໄດ້​ກຳນົດ​ໄລຍະ​ແຕ່​ປີ 2019 ຫາ​ປີ 2021 (3 ປີ) ເປັນ​ຊຸມ​ປີ​ສົ່ງເສີມ​ໃຫ້​ຄູ່​ຜົວ​ເມຍ ໂດຍ​ສະເພາະ ໃນ​ເຂດ​ຊົນນະບົດ​ຂອງ​ປະເທດ ໃຫ້​ມີ​ລູກ​ດົກ ຄື: ຖ້າ​ຄູ່​ຜົວ​ເມຍ​ໃດ ສາມາດ​ຜະລິດ​ລູກ​ຄົນທີ 3 ໄດ້ ໃນ​ຂອບ​ເວລາ​ດັ່ງກ່າວ​ກໍ​ຈະ​ໄດ້​ດິນ​ປູກຝັງ​ລ້າໆ ເປັນ​ລາງວັນ​ນຳ​ໃຊ້​ໄດ້​ເຖິງ 20 ປີ ແຕ່​ກໍ​ມີ​ເງື່ອນໄຂ​ຢູ່​ວ່າ ລູກ​ຄົນທີ 3 ນັ້ນ ຕ້ອງ​ເກີດ​ຈາກ​ພໍ່​ແມ່​ທີ່​ແຕ່ງດອງ ເປັນ​ຜົວ​ເມຍ​ກັນ​ຢ່າງ​ຖືກຕ້ອງ ຕາມ​ກົດໝາຍ​ແທ້ໆ ບໍ່​ແມ່ນ​ເກີດ​ຈາກ​ການ​ຢູ່​ຮ່ວມ​ກັນ​ເປັນ​ລະດູ​ການ ທັງ​ນີ້ ກໍ​ເພື່ອ​ປ້ອງ​ກັນ​ບໍ່​ໃຫ້​ມີ​ຜູ້​ແອບ​ອ້າງ ເພື່ອ​ຮັບ​ນະໂຍບາຍ​ທີ່​ດິນ​ກະສິກຳ ສຳລັບ​ຄົນ​ຕ່າງປະເທດ ທີ່​ຕ້ອງການ​ໄດ້​ນະໂຍບາຍ​ນີ້​ນັ້ນ​ຕ້ອງ​ໄດ້​ໃຊ້​ຊີວິດ​ຢູ່​ອີ​ຕາ​ລີ ແບບ​ຖາວອນ ຜ່ານ​ມາ​ແລ້ວ​ຢ່າງ​ໜ້ອຍ 10 ປີ ອີ​ຕາ​ລີ​ມີ​ພົນລະເມືອງ​ກວ່າ 60 ລ້ານ​ຄົນ ແຕ່​ອັດຕາ​ການ​ເກີດ​ນັ້ນ​ນ້ອຍ​ທີ່​ສຸດ​ທຽບ​ກັບ​ບັນດາ​ປະເທດ​ໃນ​ເອີ​ຣົບ ຄື: ມີ​ພຽງ 464.000 ຄົນ ໃນ​ປີ2017 ແຕ່​ຈຳນວນ​ຄົນ​ເຖົ້າ​ນັ້ນ​ຜັດ​ເພີ່ມ​ຂຶ້ນ.

ຂ່າວທີ່ກ່ຽວຂ້ອງ