ຂ່າວຫຼ້າສຸດ

ບຸນບັ້ງໄຟສະຫຼົດໃຈ

2.333 17 ພ.ພ. 2019 ນານາສາລະ

    ໄລ­ຍະ​ນີ້​ເລີ່ມ​ລະ­ດູ​ການ​ບຸນ​ບັ້ງ­ໄຟ ເຊິ່ງ​ເປັນ​ບຸນ​ປະ­ເພ­ນີ​ຂອງ​ຄົນ​ລາວ​ທີ່​ຖືກ​ຈັດ​ເຂົ້າ​ໃນ​ຮີດ 12 ຄອງ 14 ບຸນ​ບັ້ງ­ໄຟ​ທີ່​ຈັດ​ຂຶ້ນ​ໃນ​ແຕ່​ລະ​ປີ­ຜ່ານ­ມາ ເຖິງ​ແມ່ນ​ວ່າ​ຜົນ​ເສຍ​ຫາຍ​ບໍ່­ເກີດ​ແກ່​ຄົນ​ກໍ​ເກີດ​ແກ່​ສັດ ຫຼື ຊັບ​ສິນ ເຊິ່ງ​ອຸ­ບັດ­ເຫດ​ດັ່ງ­ກ່າວ​ສ່ວນ​ໃຫຍ່​ເກີດ​ຈາກ​ຄວາມ​ປະ­ໝາດ ທັງ​ເດັກ­ນ້ອຍ ແລະ ຜູ້​ໃຫຍ່ ຜູ້​ໃຫຍ່​ຜູ້​ປົກ­ຄອງ​ເວ­ລາ​ໄດ້​ກິນ​ໄດ້​ດື່ມ ໄດ້​ຟັງ​ເພງ​ກໍ​ມີ​ແຕ່​ເຫ​ຍັ້ນ​ກັບ​ເຫ​ຍັ້ນ ຈົນ​ລືມ​ຕັກ­ເຕືອນ​ລູກ​ຫຼານ ແລະ ປະ­ໝາດ​ບໍ່​ຄິດ​ຫາ​ວິ­ທີ​ປ້ອງ​ກັນ.

    ຂ່າວ​ເສົ້າ​ສະ­ຫຼົດ​ໃຈ​ວ່າ ບັ້ງ­ໄຟ​ນ້ອຍ​ແຕກ​ຊັດ​ໃສ່​ຫົວ​ເດັກ­ນ້ອຍ​ຕາຍ​ທາງ​ໂພນ​ໂຮງ ແຂວງ​ວຽງ​ຈັນ ໃນ​ວັນ​ທີ 4 ພຶດ­ສະ­ພາ ຜ່ານ​ມາ​ນັ້ນ ເຮັດ​ໃຫ້​ສັງ­ຄົມ​ລາວ​ໂຈດ​ຂານ​ກັນ​ວ່າ ໜ້າ​ສົງ­ສານ​ຜູ້​ໄດ້​ຮັບ​ເຄາະ​ຮ້າຍ ແລະ ຄອບ­ຄົວ​ຂອງ​ເດັກ­ນ້ອຍ​ຄົນ​ນັ້ນ ເຊິ່ງ​ແນ່­ນອນ​ເລື່ອງ​ແບບ​ນີ້ ບໍ່​ມີ​ໃຜ​ຢາກ​ໃຫ້​ເກີດ ແຕ່​ພວກ​ເຮົາ​ຕ້ອງ​ຕັ້ງ​ຄຳ​ຖາມ​ໃນ​ໃຈ​ວ່າ: ການ­ຈັດ­ຕັ້ງ ພໍ່​ແມ່​ຜູ້​ປົກ­ຄອງ​ໄດ້​ເອົາ­ໃຈ­ໃສ່​ຕັກ­ເຕືອນ​ຊາວ­ບ້ານ ແລະ ລູກ​ຫຼານ​ຂອງ​ຕົນ​ດີ​ພຽງ​ໃດ ? ການ­ຈັດ­ຕັ້ງ​ໄດ້​ຊີ້​ນຳ ແລະ ຄວບ​ຄຸມ​ຜູ້​ຂາຍ​ບັ້ງ­ໄຟ​ແບບ​ໃດ ? ບາງ­ເທື່ອ​ສາ­ເຫດ​ງ່າຍໆ​ເກີດ​ຈາກ​ຄວາມ​ມ່ວນ​ຄຶກ​ຄະ­ນອງ​ຂອງ​ໄວ​ລຸ້ນ​ເຍົາ­ວະ​ຊົນ ເມື່ອ​ໄກ​ຫູ​ໄກ​ຕາ​ພໍ່​ແມ່ ກໍ​ພາ­ກັນ​ໄປ​ຊື້​ບັ້ງ­ໄຟ​ນ້ອຍ​ມາ​ຈູດ​ຫຼິ້ນ ເຊິ່ງ​ຜ່ານ​ມາ​ເຄີຍ​ແຕກ​ໃສ່​ມື ໃສ່​ຕາ​ສູນ​ເສຍ​ກັນ​ຫຼາຍ​ກໍ­ລະ­ນີ ແຕ່​ຮ້າຍ​ແຮງ ວັນ​ທີ 4 ພຶດ­ສະ­ພາ ຢູ່​ບ້ານ​ໂພນ​ໄຊ ເມືອງ​ໂພນ​ໂຮງ​ນັ້ນ ບັ້ງ­ໄຟ​ຖືກ​ຫົວ​ເດັກ­ນ້ອຍ​ເຖິງ​ແກ່​ຊີ­ວິດ.

    ຄໍ​ລຳ​ນາ­ນາ​ສາ­ລະ​ແຕ່​ລະ​ປີ​ກໍ​ເຄີຍ​ຂຽນ​ແນະ­ນຳ​ຕັກ­ເຕືອນ​ວ່າ ເຮັດ­ບຸນ​ປາງ​ໃດ​ກໍ​ຄວນ​ເອົາ​ພຽງ​ພິ­ທີ­ກຳ ແລະ ຄວາມ​ມ່ວນ​ເຮ​ຮາ​ຂຶ້ນ​ໜ້າ​ຢ່າງ​ດຽວ ພໍ່​ແມ່​ປະ­ຊາ­ຊົນ​ຕ້ອງ​ມີ​ສະ­ຕິ​ຕັກ­ເຕືອນ​ລູກ​ຫຼານ​ຂອງ​ຕົນ (ຜູ້​ຊື້-ຜູ້​ຂາຍ) ໃຫ້​ເຫັນ​ເຖິງ​ຜົນ​ຮ້າຍ​ຂອງ​ມັນ ສິ່ງ​ທີ່​ຕາມ​ມາ​ກັບ ບຸນ​ບັ້ງ­ໄຟ ຄື ການ​ພະ­ນັນ ແລະ ມຶນ­ເມົາ​ຂັບ​ລົດ​ຊົນ​ກັນ ບາງ​ກໍ­ລະ­ນີ​ດື່ມ​ເມົາ​ແລ້ວ​ກໍ​ອາ​ລະ​ວາດ​ຊົກ​ຕີ​ກັນ ເຮັດ​ໃຫ້​ກອງ​ຫຼອນ ແລະ ການ­ຈັດ­ຕັ້ງ​ບ້ານ​ປວດ​ຫົວ​ພໍ​ສົມ­ຄວນ.

    ບຸນ​ບັ້ງ­ໄຟ​ປີ​ນີ້ ສ່ວນ​ຕົວ​ຜູ້​ຂຽນ​ຈຶ່ງ​ຂໍ​ຝາກ​ເຖິງ​ຂັ້ນ​ເທິງ-ຂັ້ນ​ລຸ່ມ​ຮີບ​ຮ້ອນ​ປະ­ສານ​ຕັກ­ເຕືອນ ຫາ​ທາງ​ປ້ອງ​ກັນ​ນຳ​ກັນ ເພື່ອ​ບໍ່​ໃຫ້​ອຸ­ບັດ­ເຫດ​ເກີດ​ຂຶ້ນ ສູນ​ເສຍ​ທັງ​ຊີ­ວິດ ແລະ ຊັບ​ສິນ ! ກັນ​ດີ​ກວ່າ​ແກ້​ພາຍ­ຫຼັງ ນໍ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ