ຂ່າວຫຼ້າສຸດ

​ສປປ ເກົາຫຼີ ປະ​ເຊີນ​ກັບ​ໄພ​ແຫ້ງແລ້ງ​ຮ້າຍ​ແຮງ​ທີ່​ສຸດ​ໃນ​ຮອບ 37 ປີ

847 20 ພ.ພ. 2019 ຂ່າວຕ່າງປະເທດ
​ສປປ ເກົາຫຼີ ປະ​ເຊີນ​ກັບ​ໄພ​ແຫ້ງແລ້ງ​ຮ້າຍ​ແຮງ​ທີ່​ສຸດ​ໃນ​ຮອບ 37 ປີ

    ສຳນັກ​ຂ່າວສານ​ສູນ​ກາງ​ເກົາຫຼີ (KCNA) ລາຍ​ງານ​ເມື່ອ​ວັນ​ທີ 15 ພຶດສະພາ​ທີ່​ຜ່ານ​ມາ ວ່າ​ປະລິມານ​ນ້ຳ​ຝົນ ແລະ ​ປະລິມານ​ຫິມະ​ທີ່​ຕົກລົງ​ມາ​ໂດຍ​ສະເລ່ຍ​ຢູ່​ໃນ ​ສປປ ເກົາຫຼີ ໃນ​ປີ​ນີ້ ບັນລຸ​ລະດັບ​ຕ່ຳ​ສຸດ​ໃນ​ຮອບ 37 ປີຜ່ານມາ. ການ​ລາຍ​ງານ​ຂ່າວ​ດັ່ງກ່າວ ມີ​ອອກ​ມາ​ບໍ່​ພໍ​ເທົ່າໃດ​ມື້ ຫຼັງ​ຈາກ​ທີ່​ສະຫະ​ປະຊາ​ຊາດ ສະແດງ​ຄວາມ​ກັງວົນ​ຢ່າງ​ເລິກເຊິ່ງ ກ່ຽວ​ກັບ​ສະພາບ​ຂາດແຄນ​ສະບຽງ​ອາຫານ​ຢ່າງ​ຮ້າຍ​ແຮງ​ຢູ່​ໃນ ​ສປປ ເກົາຫຼີ.

    KCNA ໃຫ້​ຮູ້​ວ່າ ນັບ​ແຕ່​ເດືອນ​ມັງກອນ ຫາ​ຕົ້ນ​ເດືອນ​ພຶດສະພາ​ປີ​ນີ້ ປະລິມານ​ນ້ຳ​ຝົນ ແລະ​ຫິມະ ຢູ່​ໃນ ​ສປປ ເກົາຫຼີ ບັນລຸ​ພຽງ​ທີ່​ລະດັບ 54,4 ​ມມ ນັບ​ວ່າ​ເປັນ​ປະລິມານ​ທີ່​ຕ່ຳ​ທີ່​ສຸດ ນັບ​ແຕ່​ໃນ​ໄລຍະ​ເວລາ​ດຽວ​ກັນ​ຂອງ​ປີ 1982 ເປັນຕົ້ນ​ມາ (ຢູ່​ທີ່ 51,2 ​ມມ). KCNA ໃຫ້​ຮູ້​ຕື່ມ​ວ່າ ການ​ນຳ​ຂະແໜງ​ກະສິກຳ​ຂອງ ​ສປປ ເກົາຫຼີ ພວມ​ຊີ້​ນຳ​ຄວາມ​ພະຍາຍາມ ເພື່ອ​ຮັບປະກັນ​ແຫຼ່ງ​ນ້ຳ ແລະ ຫຼຸດຜ່ອນ​ຄວາມ​ເສຍ​ຫາຍ ທີ່​ເກີດ​ຈາກ​ໄພ​ແຫ້ງແລ້ງ.

    ໃນ​ບົດ​ລາຍ​ງານ​ສະບັບ​ໜຶ່ງ ທີ່​ໄດ້​ປະກາດ​ເມື່ອ​ຕົ້ນ​ເດືອນ​ພຶດສະພາ​ທີ່​ຜ່ານ​ມາ ໂຄງການ ອາຫານ​ໂລກ (WFP) ແລະ​ອົງການ​ອາຫານ ແລະ​ກະສິກຳ (FAO) ຂອງ​ສະຫະ​ປະຊາ​ຊາດ ໃຫ້​ຮູ້​ວ່າ ​ສປປ ເກົາຫຼີ ຕ້ອງການ​ທັນ​ຍາ​ຫານ​ຕື່ມ​ອີກ​ປະມານ 1,36 ລ້ານ​ໂຕນ ເພື່ອ​ແກ້​ໄຂ​ສະພາບ​ຂາດແຄນ​ສະບຽງ​ອາຫານ​ໃນ​ປີ​ນີ້.

    ບົດ​ລາຍ​ງານ​ດັ່ງກ່າວ ກໍ​ຢັ້ງຢືນ​ການ​ຄາດ​ຄະເນ​ປະລິມານ​ການ​ຜະລິດ​ທັນ​ຍາ​ຫານ​ຂອງ ​ສປປ ເກົາຫຼີ ໃນ​ປີ​ກາຍ​ຢູ່​ທີ່ 4,9 ລ້ານ​ໂຕນ ຊຶ່ງ​ເປັນ​ລະດັບ​ຕ່ຳ​ສຸດ ນັບ​ແຕ່​ປີ 2008 ເປັນຕົ້ນ​ມາ ແລະ ມີ​ປະຊາຊົນ ​ສປປ ເກົາຫຼີ ປະມານ 10,1 ລ້ານ​ຄົນ ກວມ​ເອົາ 40% ຂອງ​ຍອດ​ຈຳນວນ​ປະຊາກອນ ພວມ​ຕ້ອງການ​ຄວາມ​ຊ່ວຍເຫຼືອ​ດ້ານ​ທັນ​ຍາ​ຫານ.

ຂ່າວທີ່ກ່ຽວຂ້ອງ